កម្ពុជា ប្រកាសដាក់ឱ្យអនុវត្ត «យុទ្ធសាស្ត្រការទូតសេដ្ឋកិច្ច ឆ្នាំ២០២១-២០២៣»
កម្ពុជា ប្រកាសដាក់ឱ្យអនុវត្ត «យុទ្ធសាស្ត្រការទូតសេដ្ឋកិច្ច ឆ្នាំ២០២១-២០២៣»
ក្រសួងការបរទេស និងសហប្រតិបត្តិការអន្តរជាតិ បានប្រកាសដាក់ឱ្យអនុវត្ត “យុទ្ធសាស្ត្រការទូតសេដ្ឋកិច្ចឆ្នាំ២០២១-២០២៣ របស់ក្រសួងការបរទេស និងសហប្រតិបត្តិការអន្តរជាតិ” នៅសណ្ឋាគារ សូហ្វីតែល ភ្នំពេញ ភូគីត្រា នាព្រឹកថ្ងៃទី១៨ ខែមករា ឆ្នាំ២០២១។
លោក ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានលើកឡើងថា គំនិតស្តីពី ការបញ្ចូលការងារសេដ្ឋកិច្ច ឲ្យទៅជាសមាសភាគដ៏សំខាន់ និងខានមិនបាននៃការងារការទូតរបស់យើង មានតាំងពីឆ្នាំដំបូងនៃការចូលមកកាន់តំណែងជារដ្ឋមន្ត្រីការបរទេស និងសហប្រតិបត្តិការអន្តរជាតិរបស់ខ្ញុំមកម្ល៉េះ។ បន្ទាប់ពីបានប្រមូលធាតុចូល និងធាតុផ្សំល្មមគ្រប់គ្រាន់ ស្តីពីសមាសភាគថ្មីមួយនេះហើយនោះ ក្រសួងក៏បានប្រកាសជាផ្លូវការជាលើកដំបូង ចាត់ទុកការងារការទូតសេដ្ឋកិច្ចជាការងារធំមួយ ក្នុងចំណោមការងារធំទាំង៥ របស់ក្រសួង នៅពេលប្រារព្ធសន្និបាតប្រចាំឆ្នាំរបស់ក្រសួង នាដើមឆ្នាំ២០១៨។
លោកឧបនាយករដ្ឋមន្ត្រី ប្រាក់ សុខុន បានលើកឡើងថា គោលនយោបាយនេះ ត្រូវបាន លោកនាយករដ្ឋមន្ត្រី ហ៊ុន សែន គាំទ្រយ៉ាងពេញលេញ ដោយលោកបានបញ្ជាក់ថា ការទូតសេដ្ឋកិច្ច គឺជាអាទិភាពមួយ សម្រាប់គោលនយោបាយការបរទេសកម្ពុជា ដោយមានតួនាទីយ៉ាងសំខាន់ក្នុងការធ្វើពិពិធកម្មប្រភពកំណើន និងដៃគូសេដ្ឋកិច្ច និងពាណិជ្ជកម្ម។ ផ្អែកលើស្មារតីនេះ យើងបានចំណាយពេលជាង ២ឆ្នាំ ដើម្បីសម្រេចតាក់តែងឯកសារយុទ្ធសាស្ត្រ ដែលយកមកផ្សព្វផ្សាយថ្ងៃនេះ។
លោក ប្រាក់ សុខុន បញ្ជាក់ថា ឯកសារយុទ្ធសាស្ត្រការទូតសេដ្ឋកិច្ចឆ្នាំ២០២១-២០២៣ ត្រូវបានរៀបចំឡើង នៅក្នុងកាលៈទេសៈ ដែលស្ថានភាពពិភពលោក ក៏ដូចជាកម្ពុជា កំពុងប្រឈមទៅនឹងការគំរាមកំហែងធ្ងន់ធ្ងរបំផុតមិនធ្លាប់ជួប ក្នុងរយៈពេលជាង ៣ទសវត្សចុងក្រោយនេះ។ ការគំរាមគំហែងនេះ បណ្តាលមកពីកត្តាគួបផ្សំគ្នាជាច្រើន។ កត្តាធំជាងគេ ២ គឺទី១ កត្តាធម្មជាតិ និងទី២ កត្តាមនុស្ស។
លោក ប្រាក់ សុខុន បានបញ្ជាក់ថា ការផ្ទុះ និងការរីករាលដាលនៃជំងឺឆ្លងកូវីដ-១៩ បានធ្វើឱ្យពិភពលោកទាំងមូលរង្គោះរង្គើ។ កត្តាធម្មជាតិមួយនេះ មិនត្រឹមតែប៉ះពាល់ដល់វិស័យសុខាភិបាល ក្នុងកំរិតមិនធ្លាប់មានប៉ុណ្ណោះទេ វាក៏បណ្តាលឱ្យសេដ្ឋកិច្ចពិភពលោកទាំងមូលធ្លាក់ក្នុងវិបត្តិជ្រាលជ្រៅ។ កូវីដ-១៩ បានរុញឱ្យច្រវាក់ផ្គត់ផ្គង់តំបន់ និងពិភពលោករអាក់រអួល និងកាត់ផ្តាច់ក្នុងកំរិតធ្ងន់ធ្ងរ វិស័យទេសចរណ៍ធ្លាក់ចុះយ៉ាងគំហុកសឹងដល់បាត វិស័យដឹកជញ្ជូន ពិសេសផ្លូវអាកាសគាំងដំណើរការ ទំនុកចិត្តខាងធុរកិច្ច និងអតិថិជនចុះខ្សោយដោយសារវិធានការរឹតត្បិតនានា ដើម្បីឃុំគ្រងកុំឱ្យជំងឺរាលដាល។ ជំងឺឆ្លងនេះ ក៏បង្កហានិភ័យកាន់តែធំឡើង នៃការក្ស័យធនផ្នែកធុរកិច្ច ដែលនឹងបង្កការបាត់បង់ការងាររបស់មនុស្សរាប់រយលាននាក់។ ទោះបីជាមានដំណើរការចាក់វ៉ាក់សាំងបង្ការជំងឺនេះជាបណ្តើរៗហើយក៏ដោយ ក៏គេពុំទាន់អាចប្រមើលមើលឃើញអំពីការវិលត្រឡប់មកវិញ នូវប្រក្រតីភាពនៃដំណើរការសេដ្ឋកិច្ចពិភពលោកនោះដែរ។
លោកឧបនាយករដ្ឋមន្ត្រី បញ្ជាក់ថា ផលប៉ះពាល់របស់កូវីដ-១៩ មិនត្រឹមតែលាតសន្ធឹងលើវិស័យសេដ្ឋកិច្ច សង្គម និងហិរញ្ញវត្ថុប៉ុណ្ណោះទេ តែក៏ហក់ចូលក្នុងសង្វៀននយោបាយ ដោយការធ្វើនយោបាយតូបនីយកម្ម ដើម្បីយកកំហុសនៃអសមត្ថភាពរបស់ខ្លួនក្នុងការទប់ស្កាត់ជំងឺនេះ ទៅទំលាក់ឱ្យអ្នកដទៃ។ ការប្រកួតប្រជែងគ្នាខាងភូមិសាស្ត្រនយោបាយ និងយុទ្ធសាស្ត្រដ៏តានតឹងរវាងមហាអំណាចធំបំផុតទាំងពីរ កំពុងឈានទៅរកសង្គ្រាមត្រជាក់បែបថ្មី ដែលធ្វើឱ្យមានការផ្លាស់ប្តូរយ៉ាងជ្រាលជ្រៅ ឆាប់រហ័ស ពិបាកប៉ាន់ស្មាន និងប្រកបដោយ គ្រោះថ្នាក់បំផុត។ កត្តាមនុស្សនេះ កំពុងធ្វើឱ្យស្ថិរភាព និងវិបុលភាព រយៈពេល ជាង៧០ឆ្នាំដែលកើតចេញពីសណ្តាប់ធ្នាប់អន្តរជាតិផ្អែកលើពហុប៉ូលនិយម និងច្បាប់អន្តរជាតិនោះ ទទួលរងភាពរង្គោះរង្គើយ៉ាងខ្លាំង។ នេះក៏ដោយសារការរំលោភបំពាន និងលែងគោរពនូវគុណតម្លៃទាំងឡាយ ដែលជាមូលដ្ឋានគ្រឹះនៃសណ្តាប់ធ្នាប់នេះ និងការងាកទៅរកឯកតោភាគីនិយម ការប្រើកំលាំងបាយគាបសង្កត់ប្រទេសទន់ខ្សោយ៕
