តើពេលវេលាពិតជារំកិលឆ្ពោះទៅរកសង្រ្គាមនៅកោះតៃវ៉ាន់ឬ?

កងទ័ព PLA កំពុងបង្កើតការហ្វឹកហ្វឺន។ ក្តីបារម្ភកំពុងកើនឡើងថា ប្រទេសចិនកំពុងត្រៀមខ្លួនសម្រាប់ការព្យាយាមឈ្លានពានលើកោះតៃវ៉ាន់។ រូបថត៖ បញ្ជាការដ្ឋានខាងកើតរបស់ចិន

គណបក្សកុម្មុយនីស្តចិន (CCP) បានអំពាវនាវឱ្យបង្កើនសមត្ថភាពប្រយុទ្ធរបស់កងទ័ពរំដោះប្រជាជនចិន (PLA) ដើម្បីអាចឈានទៅសម្រេចឱ្យបាននូវ «ការបង្រួបបង្រួមជាតិ» ជាមួយកោះតៃវ៉ាន់ បន្ទាប់ពីគណៈកម្មការយោធាថ្មីត្រូវបានបង្កើតឡើងកាលពីថ្ងៃអាទិត្យ។

លោក Zhang Youxia ដែលជាអនុប្រធានគណៈកម្មការយោធាមជ្ឈឹម (CMC) របស់គណបក្សកុម្មុយនីស្តចិន បាននិយាយនៅក្នុងកិច្ចប្រជុំកាលពីថ្ងៃអង្គារ ទី ២៥ ខែតុលាថា «កងទ័ពចិននឹងធ្វើកំណែទម្រង់ និងពង្រឹងការច្នៃប្រឌិតរបស់ខ្លួនឱ្យបានកាន់តែស៊ីជម្រៅ, នឹងផ្លាស់ប្តូររបៀបហ្វឹកហ្វឺន, ជ្រើសរើសមនុស្សថ្មីៗ ដែលមានទេពកោសល្យ ហើយនឹងបន្តរៀនសូត្រពី ស្មារតីនៃសមាជបក្សលើកទី ២០»។

របាយការណ៍ពេញលេញនៃសមាជបក្សដែលបានចេញផ្សាយកាលពីថ្ងៃអង្គារ បានបង្ហាញថា «អគ្គលេខាធិការ ស៊ី ជីនពីង បានលើកឡើងទាក់ទងនឹងការបង្រួបបង្រួមដោយសន្តិវិធីជាមួយកោះតៃវ៉ាន់ ក៏ប៉ុន្តែលោកក៏បានរំលេចឡើងអំពីការបង្រួបបង្រួមដោយប្រើកម្លាំងផងដែរនៅក្នុងសុន្ទរកថារបស់លោកនៅថ្ងៃទី ១៦ ខែតុលា»។

ប្រព័ន្ធផ្សព្វផ្សាយកោះតៃវ៉ាន់ និងអ្នកអត្ថាធិប្បាយផ្សេងៗទៀត បាននិយាយថា «ហានិភ័យនៃការអាចកើតមានការលុកលុយដោយកងទ័ព PLA នៅក្នុងពេលឆាប់ៗ បានកើនឡើងនៅក្រោយសមាជបក្ស» ដោយក្នុង នោះ មតិជាច្រើនបានលើកឡើងថា «សង្រ្គាមនៅច្រកសមុទ្រតៃវ៉ាន់ អាចនឹងផ្ទុះឡើងនៅចន្លោះឆ្នាំ ២០២៥-២០២៧ និងមិនទំនងជាផ្ទុះឡើងនៅមុនឆ្នាំ ២០២៤ នោះឡើយ»។

សូមអាន មិនទាន់មាន «ស្ថានភាពធម្មតាតាមគន្លងថ្មី» នៅច្រកសមុទ្រតៃវ៉ាន់នៅឡើយទេ

កាលពីថ្ងៃចន្ទ ទីផ្សារហ៊ុន «Hang Seng Index» របស់ទីក្រុងហុងកុងបានធ្លាក់ចុះជាង ១.០០០ ពិន្ទុ មកនៅត្រឹមតម្លៃ ១៥.១៨០ ដែលជាកម្រិតទាបបំផុតនៅក្នុងរយៈពេល ១៣ ឆ្នាំកន្លងមកនេះ។ នេះគឺជាការឆ្លើយតបផ្នែកទីផ្សារទៅនឹងថ្នាក់ដឹកនាំថ្មីរបស់ចិនដែលត្រូវបានបង្កើតឡើងកាលពីថ្ងៃអាទិត្យ បូករួមនឹងការភ័យខ្លាចអំពីការដែលអាចនឹងផ្ទុះឡើងនៃជម្លោះតៃវ៉ាន់។ ទីផ្សារហ៊ុននេះបានស្ទុះងើបឡើងវិញ ១% កាលពីថ្ងៃពុធ ក៏ប៉ុន្តែនៅតែធ្លាក់ចុះ ៥,៥% បើធៀបនឹងកាលពីថ្ងៃសុក្រមុន។

នៅថ្ងៃទី ២២ ខែតុលា សមាជជាតិរបស់គណបក្ស CPC លើកទី ២០ ដែលមានរយៈពេល ១ សប្តាហ៍ ត្រូវបានបិទបញ្ចប់ និងបានបង្កើតគណៈកម្មាធិការមជ្ឈឹមថ្មី ដែលមានសមាជិកចំនួន ២០៥ រូប។ នៅក្នុងកិច្ចប្រជុំលើកដំបូងរបស់ខ្លួន នៅថ្ងៃបន្ទាប់ការិយាល័យនយោបាយដែលមានសមាជិក ២៤ រូប, គណៈកម្មាធិការអចិន្ត្រៃយ៍នៃការិយាល័យនយោបាយដែលមានសមាជិក ៧រូប និងគណៈកម្មការយោធាមជ្ឈឹមដែលមានសមាជិក ៧រូប ក៏ត្រូវបានបង្កើតឡើង។

សូមអាន ការព្យាករណ៍ខុសលើលោក ស៊ី ជីនពីង និងការរះឡើងរបស់ លោក Li

លោក ស៊ី ជីនពីង នៅតែជាប្រធានគណៈកម្មការយោធាមជ្ឈឹម (CMC) ខណៈដែលលោក Zhang នៅបន្តជាអនុប្រធាន CMC ដដែល។ លោក Zhang ដែលមានវ័យ ៧២ ឆ្នាំ ធ្លាប់បានប្រយុទ្ធនៅក្នុងសង្គ្រាមចិន-វៀតណាមក្នុងឆ្នាំ ១៩៧៩ និងការប្រយុទ្ធបន្ទាប់នៅឆ្នាំ ១៩៨៤។ ឪពុករបស់លោក គឺលោក Zhang Zongxun គឺជាមិត្តជិតស្និទ្ធរបស់ឪពុករបស់លោក ស៊ី ជីនពីង គឺលោក Xi Zhongxun នៅក្នុងកងទ័ព PLA។

លោក He Weidong ដែលមានវ័យ ៦៥ ឆ្នាំ ត្រូវបានជ្រើសរើសជាអនុប្រធាន CMC ម្នាក់ទៀតកាលពីថ្ងៃអាទិត្យ។ លោកកើតនៅខេត្ត Jiangsu និងបានបញ្ចប់ការសិក្សាពីមហាវិទ្យាល័យបញ្ជាការដ្ឋានកងទ័ព PLA នៅក្នុងទីក្រុង Nanjing។ លោកគឺជាមេបញ្ជាការនៅបញ្ជាការដ្ឋានភាគខាងកើត (East Theater Command) នៅចន្លោះឆ្នាំ ២០១៩ រហូតដល់ដើមឆ្នាំនេះ។

លោក Miao Hua ដែលមកពីខេត្ត Fujian និងដែលមានវ័យ ៦៦ ឆ្នាំក៏បានបន្តអាណត្តិរបស់លោកនៅក្នុងគណៈកម្មការយោធាមជ្ឈឹម (CMC) ផងដែរ។ បន្ទាប់ពីលោក ស៊ី ជីនពីង បាននិយាយនៅក្នុងពិធីបើកសមាជបក្សកាលពីថ្ងៃទី ១៦ ខែតុលាថា «ប្រទេសចិននឹងមិនបោះបង់ជម្រើសនៃការបង្រួបបង្រួមកោះតៃវ៉ាន់ឡើងវិញដោយប្រើប្រាស់កម្លាំង» រដ្ឋមន្ត្រីការបរទេសអាមេរិក លោក Antony បាននិយាយនៅថ្ងៃបន្ទាប់ថា «កងទ័ព PLA អាចព្យាយាមដណ្តើមយកកោះតៃវ៉ាន់នៅក្នុងពេលវេលាលឿនជាងការរំពឹងទុក»។

លោក Mike Gilday ដែលជាប្រធានប្រតិបត្តិការកងទ័ពជើងទឹកអាមេរិកបានប្រាប់ក្រុមប្រឹក្សាអាត្លង់ទិក កាលពីថ្ងៃទី ១៩ ខែតុលាថា «ប្រទេសចិនអាចនឹងចាប់ផ្តើមការលុកលុយតៃវ៉ាន់នៅចុងឆ្នាំ ២០២២ ឬនៅដើមឆ្នាំ ២០២៣»។ លោក Chen Ming-tong ដែលជាអគ្គនាយកនៃការិយាល័យសន្តិសុខជាតិកោះតៃវ៉ាន់ បាននិយាយថា «ខណៈដែលមនុស្សភាគច្រើនជឿថា កងទ័ព PLA នឹងមិនវាយប្រហារកោះតៃវ៉ាន់នៅមុនឆ្នាំ ២០២៥ វាមានលទ្ធភាពកាន់តែខ្ពស់ដែលចិនអាចបើកការឈ្លានពាននៅឆ្នាំក្រោយ»។

លោក Zhao Chunshan ដែលជាសាស្ត្រាចារ្យកិត្តិយសនៅសាកល វិទ្យាល័យ Tamkang នៅកោះតៃវ៉ាន់បានឱ្យដឹងថា «ការវាយប្រហាររបស់ចិនមកលើកោះតៃវ៉ាន់អាចនឹងមិនកើតឡើងនៅមុនការបោះឆ្នោតជ្រើសរើសប្រធានាធិបតីរបស់កោះនេះ នៅដើមឆ្នាំ ២០២៤ ទេ ក៏ប៉ុន្តែហានិភ័យនឹងបន្តកើនឡើងបន្តិចម្តងៗ ជាពិសេសនៅពេលមហាសន្និបាតបក្សលើកទី ២១ ឆ្នាំ ២០២៧ ខិតជិតមកដល់»។

លោក Ming Chu-cheng ដែលជាសាស្ត្រាចារ្យនៅនាយកដ្ឋានវិទ្យាសាស្ត្រនយោបាយនៃសកលវិទ្យាល័យជាតិតៃវ៉ាន់បាននិយាយថា «បញ្ហាថាតើកងទ័ព PLA នឹងវាយប្រហារកោះតៃវ៉ាន់ឬអត់ វានឹងអាស្រ័យលើស្ថានភាពអន្តរជាតិ។ ក្នុងករណីលោក ស៊ី ជីនពីង យល់ខុសចំពោះស្ថានភាពអន្តរជាតិ មេដឹកនាំចិនរូបនេះអាចនឹងចាប់ផ្តើមសង្រ្គាមប្រឆាំងនឹងកោះតៃវ៉ាន់ បើទោះបីជាសង្គ្រាមនឹងនាំមកនូវផលអាក្រក់សម្រាប់ប្រទេសចិនក៏ដោយ»។

លោកបានបន្តថា «ការតែងតាំងលោក He Weidong និងលោក Miao Hua ឱ្យទៅកាន់តំណែងនៅក្នុងគណៈកម្មការ CMC នឹងបង្កើនឱកាសនៃការវិនិច្ឆ័យខុស ដោយសារតែអ្នកទាំងពីរ មានទំនោរក្នុងការបន្ទរ ជាជាងការត្រួតពិនិត្យមើលមតិយោបល់របស់លោក ស៊ី ជីនពីង»។ គណៈកម្មការ CMC បានបើកកិច្ចប្រជុំការងារលើកដំបូងរបស់ខ្លួនកាលពីថ្ងៃអង្គារដើម្បីសិក្សាអំពីស្មារតីរបស់លោក ស៊ី ជីនពីង និងសមាជបក្សលើកទី ២០ ហើយកិច្ចប្រជុំនេះត្រូវបានដឹកនាំដោយលោក He Weidong ក្រោមការចូលរួមរបស់លោក Zhang។

លោក Zhang បាននិយាយថា «គណៈកម្មការ CMC នឹងរៀនសូត្រពីរបៀបអនុវត្តទស្សនៈរបស់លោក ស៊ី ជីនពីង ស្តីពីសង្គមនិយមតាមបែបចិននៅក្នុងយុគសម័យថ្មី ហើយនឹងជំរុញផែនការរបស់លោកក្នុងការពង្រឹងកងទ័ពចិន។ គណៈកម្មការ CMC នឹងខិតខំបង្កើនគុណភាពនៃការអភិវឌ្ឍកងទ័ព»។ របាយការណ៍ទាំងស្រុងនៃសមាជបក្សលើកទី ២០ បានលើកឡើងថា «ប្រទេសចិននឹងធ្វើទំនាក់ទំនងជាមួយកោះតៃវ៉ាន់ ដែលគាំទ្រគំនិតស្តីពីការបង្រួបបង្រួមជាមួយចិនដីគោក ហើយនឹងព្យាយាមប្រើប្រាស់រាល់គ្រប់មធ្យោបាយ ដើម្បីសម្រេចឱ្យបាននូវផែនការនេះដោយសន្តិវិធី»។

របាយការណ៍បានលើកឡើងទៀតថា «វាគឺជាបេសកកម្មជាប្រវត្តិសាស្ត្រសម្រាប់ប្រទេសចិនក្នុងការដោះស្រាយបញ្ហាតៃវ៉ាន់» ដោយក្នុងនោះ លោក ស៊ី ជីនពីង បាននិយាយនៅថ្ងៃទី ១៦ ខែតុលាថា «វានឹងត្រូវធ្វើឡើងដោយប្រើប្រាស់កម្លាំងក្នុងករណីចាំបាច់»៕

Asia Times