លោកនាយករដ្ឋមន្រ្តី ហ៊ុន សែន អញ្ជើញជួបឯកអគ្គរដ្ឋទូតកូរ៉េថ្មីប្រចាំនៅកម្ពុជា

លោកនាយករដ្ឋមន្រ្តី ហ៊ុន សែន អញ្ជើញជួបឯកអគ្គរដ្ឋទូតកូរ៉េថ្មីប្រចាំនៅកម្ពុជា

នៅល្ងាចថ្ងៃទី២១ ខែវិច្ឆិកា ឆ្នាំ២០១៩នេះ បន្ទាប់ពីបានអញ្ជើញជួបពិភាក្សាការងារជាមួយ ឯកអគ្គរដ្ឋទូតសហរដ្ឋអាមេរិកប្រចាំនៅកម្ពុជារួចហើយ លោកនាយករដ្ឋមន្រ្តី ហ៊ុន សែន បានអញ្ជើញទទួលជួបពិភាក្សាការងារជាបន្តទៀតជាមួយ លោក ផាក ហ៊ីង ឃ្យុង(Park Heung Kyeong) ឯកអគ្គរដ្ឋទូតសាធារណរដ្ឋកូរ៉េថ្មី ប្រចាំនៅកម្ពុជា។

នៅក្នុងជំនួបនេះ លោកនាយករដ្ឋមន្រ្តី ហ៊ុន សែន បានសំដែងនូវការអបអរសាទរចំពោះលោកឯកអគ្គរដ្ឋទូតថ្មីនៃសាធារណរដ្ឋកូរ៉េ ដែលត្រូវបានតែងតាំងជាឯកអគ្គរដ្ឋទូតប្រចាំនៅព្រះរាជាណាចក្រកម្ពុជា។

អ្វីដែលសំខាន់នៅក្នុងជំនួបនេះ ក្រោយពីបានតែងតាំងជាឯកអគ្គរដ្ឋទូតសាធារណរដ្ឋកូរ៉េប្រចាំកម្ពុជារួចហើយ គឺមាន ១) កិច្ចប្រជុំកុំពូលរម្លឹកខួបអនុស្សាវរីយ៍ អាស៊ាន-កូរ៉េ និង ២)កិច្ចប្រជុំកំពូលមេគង្គ-កូរ៉េ ដែលកន្លងមកភាគីកូរ៉េក៏បានទទួលយកនូវគំនិតផ្តួចផ្តើមនេះដែលកាលពីមុនគឺមានត្រឹមតែកម្រិតរដ្ធមន្រ្តីតែប៉ុណ្ណោះ ប៉ុន្តែពេលនេះ គឺកម្រិតប្រមុខដឹកនាំរដ្ធាភិបាលចូលរួម។ លោកនាយករដ្ឋមន្រ្តី ហ៊ុន សែន ពិតជាមានក្តីសមោនស្សរីករាយដែលភាគីកូរ៉េ ក៏ដូចជាប្រទេសមេគង្គ៤ផ្សេងទៀត បានទទួលយកគំនិតផ្តួចផ្តើមបង្កើនកម្រិតប្រមុខដឹកនាំប្រទេសអោយបានចូលរួមនៅក្នុងកិច្ចប្រជុំកំពូលមេគង្គ-កូរ៉េ។

លោកនាយករដ្ឋមន្ត្រី នឹងដឹកនាំគណៈប្រតិភូជាន់ខ្ពស់ អញ្ជើញទៅចូលរួមក្នុងកិច្ចប្រជុំកំពូលទាំងពីរខាងលើនេះ នៅសាធារណរដ្ឋកូរ៉េ នៅថ្ងៃអាទិត្យ ទី២៤ វិច្ឆិកា នេះ។

ឆ្លៀតក្នុងឱកាសនេះដែរ លោកនាយករដ្ឋមន្រ្តី ហ៊ុន សែន បានមានប្រសាសន៍រំលឹកពីទំនាក់ទំនងកូរ៉េ និងកម្ពុជាដែលមានរូបលោកផ្ទាល់ជាស្ថាបនិកនៃទំនាក់ទំនងការទូតរវាងប្រទេសទាំងពីរ ដែលមកដល់ពេលនេះគឺមានការរីកចម្រើនយ៉ាងច្រើនលើគ្រប់វិស័យ រួមទាំងវិស័យការងារសំរាប់ពលករខ្មែរជាង៥ម៉ឺននាក់ដែលកំពុងធ្វើការនៅសាធារណរដ្ឋកូរ៉េនាបច្ចុប្បន្ន ដែលនាំមកនូវប្រាក់ចំណូលរាប់រយលានដុល្លារមកកម្ពុជា។ លោក គ្រោងនឹងជួបជាមួយបងប្អូនពលករខ្មែរនៅកូរ៉េ នៅថ្ងៃទី២៤ ខែវិច្ឆិកា ខាងមុខនេះ។

លោក Park Heung Kyeong ឯកអគ្គរដ្ឋទូតកូរ៉េ ក៏បានអរគុណ លោកនាយករដ្ឋមន្ត្រី ហើយបានបញ្ជាក់ជូនលោក ថា ក្នុងនាមជាឯកអគ្គរដ្ឋទូតថ្មី លោកនឹងបន្តធ្វើយ៉ាងណាឲ្យកិច្ចសហប្រតិបត្តិការទ្វេភាគី បន្តមានភាពរីកចម្រើនថែមទៀត ជាពិសេសនឹងជំរុញធ្វើយ៉ាងណាអោយបន្តលើការអភិវឌ្ឍលើវិស័យផ្សេងៗ ដូចជាវិស័យពាណិជ្ជកម្ម វិនិយោគ ទេសចរណ៍ និងវិស័យផ្សេងៗទៀត។ ពាក់ព័ន្ធនឹងការដំឡើងកម្រិតនៃកិច្ចប្រជុំរដ្ឋមន្ត្រីការបរទេសមេគង្គ កូរ៉េ ឲ្យទៅជាកម្រិតកិច្ចប្រជុំកំពូលរវាងមេដឹកនាំប្រមុខរដ្ឋ ប្រមុខរដ្ឋាភិបាលមេគង្គកូរ៉េនោះ អគ្គរដ្ឋទូតក៏បានកោតសរសើរលោកនាយករដ្ឋមន្ត្រីនូវគំនិតផ្តួចផ្តើមដ៏ឈ្លាសវៃរបស់ លោកនាយករដ្ឋមន្រ្តី។

នៅក្នុងកិច្ចពិភាក្សាគ្នានេះដែរ លោកនាយករដ្ឋមន្រ្តី ហ៊ុន សែន បានថ្លែងអំណរគុណដល់កូរ៉េដែលបានជួយដល់កម្ពុជា រួមទាំងភ្នាក់ងារសហប្រតិបត្តិការអន្តរជាតិកូរ៉េ ដែលនឹងផ្ដល់ជំនួយ១០លានដុល្លារដល់វិស័យដោះមីននៅកម្ពុជា។ លោកបានបញ្ជាក់ផងដែរថាកម្ពុជា និងកូរ៉េគឺនៅមានសក្កានុពលជាច្រើនដែលយើងអាចសហការជាមួយគ្នាបាន។ ប៉ុន្តែសហប្រតិបត្តិការមួយដ៏សំខាន់ដែល លោក​ ចង់បានឆាប់បំផុតនោះ គឺចង់អោយមាន “ កិច្ចព្រមព្រៀងពាណិជ្ជកម្មសេរីរវាងកម្ពុជា-កូរ៉េ” ដើម្បីធ្វើយ៉ាងណាបើកទីផ្សារនៅកូរ៉េឲ្យបានច្រើនសម្រាប់ការនាំចេញកសិផលកម្ពុជាទៅកាន់នោះ។​ លោក បានជូនពរអោយលោកឯកអគ្គរដ្ធទូត Park Heung Kyeong ទទួលបានជោគជ័យនៅក្នុងបេសកកម្មការទូតនៅកម្ពុជា៕