ឯកឧត្តមរដ្ឋមន្រ្តីក្រសួងកសិកម្ម ជំរុញការនាំចេញស្វាយចន្ទី និងម្រេច ឆ្ពោះទៅកាន់ទីផ្សារអឺរ៉ុប

ឯកឧត្តមរដ្ឋមន្រ្តីក្រសួងកសិកម្ម ជំរុញការនាំចេញស្វាយចន្ទី និងម្រេច ឆ្ពោះទៅកាន់ទីផ្សារអឺរ៉ុប

នៅថ្ងៃទី១០ ខែវិច្ឆិកា ឆ្នាំ២០២៦ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអញ្ជើញចូលរួមវេទិកាពាណិជ្ជកម្មគ្រាប់ស្វាយចន្ទី និងម្រេច ឆ្នាំ២០២៦ ក្រោមមូលបទ «នាំកម្ពុជាទៅកាន់ពិភពលោក៖ ការជំរុញធុរកិច្ចឆ្ពោះទៅទីផ្សារអឺរ៉ុប» ដែលប្រារព្ធធ្វើឡើងនៅសណ្ឋាគារសូហ្វីតែល ភូគីត្រា ភ្នំពេញ។

រាជរដ្ឋាភិបាល បានបើកនិងពង្រីកការនាំចេញទៅកាន់ទីផ្សារសហភាពអឺរ៉ុប សម្រាប់កសិផលមានសក្តានុពលរបស់កម្ពុជា ដូចជាគ្រាប់ស្វាយចន្ទី និងម្រេច ដើម្បីបង្កើតតម្លៃបន្ថែម និងផ្ដល់ផលចំណេញសេដ្ឋកិច្ចជូនគ្រួសារកសិករជាអ្នកផលិត។

នៅក្នុងគោលដៅនេះក្រសួងកសិកម្ម បានបន្តជ្រោមជ្រែងប្រជាកសិករតាមរយៈកម្មវិធីហិរញ្ញប្បទានដើម្បីលើកស្ទួយផលិតកម្ម ការចងក្រងសហគមន៍កសិកម្មទំនើប និងការដាក់ពង្រាយមន្ត្រីកសិកម្មឃុំ ដើម្បីរួមចំណែកកាត់បន្ថយថ្លៃដើមផលិតកម្ម តភ្ជាប់ខ្សែច្រវាក់តម្លៃ លើកកម្ពស់ការអនុវត្តកសិកម្មល្អ(GAP) និងពង្រឹងគុណភាព សុវត្ថិភាព និងភាពធន់នៃផលិតកម្មកសិកម្ម។

ការសម្រេចបាននូវការនាំកសិផលកម្ពុជាទៅកាន់ទីផ្សារសហភាពអឺរ៉ុប ដែលជាទីផ្សារតម្រូវការស្តង់ដារគុណភាព និងសុវត្ថិភាពខ្ពស់បំផុតក្នុងពិភពលោក គឺជាសក្ខីភាពបញ្ជាក់យ៉ាងច្បាស់ពីគុណភាព ភាពធន់ និងសមត្ថភាពឆ្លើយតបរបស់កសិករ អ្នកកែច្នៃ និងអ្នកនាំចេញកម្ពុជា។

ក្រសួងកសិកម្ម រុក្ខាប្រមាញ់ និងនេសាទ ស្វាគមន៍យ៉ាងកក់ក្តៅដល់ ដៃគូអភិវឌ្ឍន៍ វិនិយោគិន និងធុរជនទាំងអស់ក្នុងការបន្តគាំទ្រ និងធ្វើការវិនិយោគលើការពង្រឹងខ្សែច្រវាក់តម្លៃផលិតផលកសិកម្មកម្ពុជា ដើម្បីប្រែក្លាយសក្តានុពលកសិកម្មឱ្យទៅជាឱកាសសេដ្ឋកិច្ចប្រកបដោយនិរន្តរភាព៕