ក្រសួងវប្បធម៌ និងវិចិត្រសិល្បៈ ជួសជុលព្រះពុទ្ធរូបប្រាសាទចតុមុខ
ក្រសួងវប្បធម៌ និងវិចិត្រសិល្បៈ ជួសជុលព្រះពុទ្ធរូបប្រាសាទចតុមុខ
ប្រជាជន និងអ្នកស្រឡាញវប្បធ៌មមានការភ្ញាក់ផ្អើល និងកោតសរសើរយ៉ាងខ្លាំងដល់ក្រុមអ្នកភិរក្សរបស់នាយកដ្ឋានគាំពារ និងអភិរក្សសំណង់បុរាណនៃក្រសួងវប្បធ៌ម និងវិចិត្រសិល្បៈ នៅពេលដែលក្រុមការងារនេះកំពុងធ្វើការជួសជុលប្រាសាទចតុមុខ នៃក្រុមប្រាសាទបាកាណ (ព្រះខ័នកំពង់ស្វាយ) នៅខេត្តព្រះវិហារ ហើយពួកអ្នកជំនាញបានកាយចេញនូវប្រអប់ព្រះបាតព្រះពុទ្ធរូបមួយអង្គដែលបានបាក់បែក និងប្រមូលផ្គុំរូបបដិមាដើម្បីរៀបចំដំណើរការជួសជុលឡើងវិញ។
លោក គឹម សុធិន ប្រធាននាយកដ្ឋានគាំពារ និងអភិរក្សសំណង់បុរាណ នៃក្រសួងវប្បធ៌ម និងវិចិត្រសិល្បៈ បានឱ្យដឹងថា «ពេលនេះក្រុមអ្នកជំនាញរបស់យើងដែលមានគ្នា ៤៤នាក់ កំពុងរៀបចំផ្គុំ និងជួសជុលព្រះពុទ្ធរូបបុរាណ មួយអង្គយ៉ាងធំ យ៉ាងយកចិត្តទុកដាក់បំផុត ហើយក្រុមការងាររបស់យើងក៏បានប្រមូលបំណែកនៃរូបបដិមាទាំងនោះដើម្បីផ្គុំសាកល្បងមុននឹងធ្វើការជួសជុល។ នៅទីនេះយើងមានការងារជាច្រើនដែលត្រូវអភិរក្ស ដែលទាមទារឱ្យក្រុមជំនាញយើងយកចិត្តទុកដាក់បំផុត»។
គម្រោងការជួសជុលចតុមុខនៃក្រុមប្រាសាទបាកាណ (ព្រះខ័នកំពង់ស្វាយ) នៅខេត្តព្រះវិហារនេះ បើកការដ្ឋានកាលពីថ្ងៃទី ១៩ ខែមីនា ឆ្នាំ ២០១៨ ក្រោមការឧបត្ថម្ភពីសំណាក់លោកជំទាវ ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច ដោយមានការឧបត្ថម្ភ និងគាំទ្រយ៉ាងពេញទំហឹងពីសំណាក់សម្តេចនាយករដ្ឋមន្ត្រី ហ៊ុន សែន ព្រមទាំងមានការជួយឧបត្ថម្ភគាំទ្រយ៉ាងច្រើនពីសប្បុរសជនផងដែរ៕
