វេទិកាសន្ទនារវាងវេទិកាសម្ព័ន្ធសង្គមស៊ីវិល ជាមួយអង្គការ សមាគម សហជីព និងសហគមន៍
វេទិកាសន្ទនារវាងវេទិកាសម្ព័ន្ធសង្គមស៊ីវិល ជាមួយអង្គការ សមាគម សហជីព និងសហគមន៍
វេទិកាសម្ព័ន្ធសង្គមស៊ីវិល ជួបប្រជុំជាមួយអាជ្ញាធរខេត្តពោធិ៍សាត់ ខេត្តបាត់ដំបង និងខេត្តប៉ៃលិន និងអង្គការសង្គមស៊ីវិល ដើម្បីជជែកពិភាក្សានិងពិគ្រោះយោបល់លើបញ្ហាប្រឈមនានា
(ខេត្តប៉ៃលិន)៖ វេទិកាសម្ព័ន្ធសង្គមស៊ីវិល (វ.ស.ស.) បានបន្តរៀបចំ«វេទិកាសន្ទនារវាងវេទិកាសម្ព័ន្ធសង្គមស៊ីវិល ជាមួយអង្គការ សមាគម សហជីព និងសហគមន៍» នៅខេត្តពោធិ៍សាត់ ខេត្តបាត់ដំបង និងខេត្តប៉ៃលិន ចាប់ពីថ្ងៃទី១៨ ដល់ថ្ងៃទី២០ ខែមេសា ឆ្នាំ២០១៨ ដោយមានការសហការពេញលេញពីសំណាក់អាជ្ញាធរខេត្តទាំងបីនេះ ក្នុងគោលបំណងស្វែងយល់សុខទុក្ខតាមរយៈការពិភាក្សា និងពិគ្រោះយោបល់ដោយផ្ទាល់ជាមួយអង្គការសង្គមស៊ីវិល ដែលមានប្រតិបត្តិការនៅក្នុងខេត្តនីមួយៗ។
នៅក្នុងវេទិកាសន្ទនាដាច់ដោយឡែកពីគ្នានៅខេត្តទាំងបីនេះ លោក កឹមរ័ត្ន វិសិដ្ឋ ប្រធានក្រុមប្រឹក្សាភិបាល វ.ស.ស. បានអញ្ជើញចូលរួមជាគណៈអធិបតីជាមួយលោក ម៉ៅ ធនិន អភិបាលខេត្តពោធិ៍សាត់ លោក ងួន រតនៈ អភិបាលខេត្តបាត់ដំបង លោក កើត សុធា អភិបាលខេត្តប៉ៃលិន និងលោក ឡី ចាន់ឆាយ ប្រធានក្រុមប្រឹក្សាខេត្តប៉ៃលិន និងដោយមានការចូលរួមពីតំណាងតំណាងមន្ទីរ-អង្គភាពចំណុះសាលាខេត្ត ព្រមទាំងតំណាងអង្គការ សមាគម សហជីព និងសហគមន៍នានានៅក្នុងខេត្តទាំងបីនេះ។
ដោយស្ថិតក្នុងបរិយាកាសស្និទ្ធស្នាល វ.ស.ស. អាជ្ញាធរខេត្ត និងតំណាងអង្គការ សមាគម សហជីព និងសហគមន៍ បានធ្វើការសន្ទនាពិគ្រោះយោបល់ត្រង់ទៅត្រង់មកជាមួយគ្នា ដោយបានលើកឡើងអំពីបញ្ហាប្រឈមជាក់ស្តែងដែលកើតមាននៅក្នុងមូលដ្ឋាននៃខេត្តនីមួយៗ រួមទាំងសំណូមពរមួយចំនួនផងដែរ។ ជាលទ្ធផល បញ្ហាប្រឈម និងសំណូមពរជាក់ស្តែងមួយចំនួនរបស់ប្រជាពលរដ្ឋ ត្រូវបានដោះស្រាយនៅក្នុងកិច្ចសន្ទនាដោយផ្ទាល់តែម្តង។ ចំពោះបញ្ហាប្រឈមនិងសំណូមពរមួយចំនួនទៀត អាជ្ញាធរខេត្តនិងភាគីពាក់ព័ន្ធ សន្យាថានឹងលើកយកទៅពិភាក្សាឱ្យបានល្អិតល្អន់ ដើម្បីស្វែងរកដំណោះស្រាយ។
អង្គវេទិកាសន្ទនាទាំងបីនេះ បានវាយតម្លៃខ្ពស់ចំពោះការរៀបចំឱ្យមានវេទិកាសន្ទនាបែបនេះ ដោយបានចូលរួមចំណែកក្នុងការចែករំលែកនូវទស្សនៈនិងបទពិសោធន៍រវាងគ្នាទៅវិញទៅមក សំដៅពង្រឹងភាពជាដៃគូជាមួយគ្នាឲ្យកាន់តែជិតស្និទ្ធថែមទៀត រវាងរាជរដ្ឋាភិបាល និងអង្គការសង្គមស៊ីវិល។
មកទល់បច្ចុប្បន្ននេះ រាជរដ្ឋាភិបាលតែងតែផ្តល់សារៈសំខាន់ខ្ពស់ចំពោះតួនាទីនិងការចូលរួមចំណែករបស់អង្គការសង្គមស៊ីវិល ដែលបានបំពេញការងារយ៉ាងសកម្ម ជាមួយគ្រប់ភាគីពាក់ព័ន្ធនិងរាជរដ្ឋាភិបាល ដើម្បីលើកកម្ពស់សុខុមាលភាពប្រជាពលរដ្ឋ និងជំរុញការអភិវឌ្ឍសេដ្ឋកិច្ច សង្គមកិច្ចឲ្យមានការរីកចម្រើនប្រកបដោយចីរភាព។ ក្នុងន័យនេះ វ.ស.ស. គឺជាយន្តការសម្របសម្រួលបន្ថែម ក្នុងការពង្រឹងនិងពង្រីកកិច្ចសហប្រតិបត្តិការ និងភាពជាដៃគូអភិវឌ្ឍន៍ រវាងរាជរដ្ឋាភិបាល និងអង្គការសង្គមស៊ីវិល ដែលជាដៃគូមិនអាចខ្វះបានក្នុងការអភិវឌ្ឍសង្គមជាតិឲ្យកាន់តែមានការរីកចម្រើន។ វ.ស.ស. នឹងចូលរួមជំរុញតួនាទីរបស់អង្គការសង្គមស៊ីវិល និងលើកទឹកចិត្តឱ្យអង្គការសង្គមស៊ីវិលចូលរួមចំណែកកាន់តែសកម្មថែមទៀត ក្នុងការអនុវត្តគម្រោងជាក់ស្តែង ដែលឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋមូលដ្ឋាន តាមរយៈអង្គការសង្គមស៊ីវិល ដែលជាដៃគូរបស់ វ.ស.ស.៕
