គណៈរដ្ឋមន្ត្រី អនុម័តទាំងស្រុងលើ «សេចក្តីព្រាងផែនការជាតិទសវត្សរ៍សកម្មភាពសុវត្ថិភាពចរាចរណ៍ផ្លូវគោកឆ្នាំ ២០២១-២០៣០»
គណៈរដ្ឋមន្ត្រី អនុម័តទាំងស្រុងលើ «សេចក្តីព្រាងផែនការជាតិទសវត្សរ៍សកម្មភាពសុវត្ថិភាពចរាចរណ៍ផ្លូវគោកឆ្នាំ ២០២១-២០៣០»
កិច្ចប្រជុំគណៈរដ្ឋមន្ត្រីដឹកនាំដោយសម្តេចតេជោ ហ៊ុន សែន នាយករដ្ឋមន្ត្រីកម្ពុជា នាព្រឹកថ្ងៃសុក្រ ទី០៧ ខែមេសា ឆ្នាំ២០២៣ បានអនុម័តទាំងស្រុងហើយលើ «សេចក្តីព្រាងផែនការជាតិទសវត្សរ៍សកម្មភាពសុវត្ថិភាពចរាចរណ៍ផ្លូវគោកឆ្នាំ២០២១-២០៣០»។
ផែនការជាតិទសវត្សរ៍សកម្មភាពសុវត្ថិភាពចរាចរណ៍ផ្លូវគោក ជាផែនការសកម្មភាពរយៈ១០ឆ្នាំ ចាប់ពីឆ្នាំ២០២១-២០៣០។ នេះជាផែនការជាតិលើកទី២ បន្តពីផែនការជាតិលើកទី១ ឆ្នាំ២០១១ ដល់ឆ្នាំ២០២០ ដែលបានអនុវត្តរួចកន្លងមក។ ផែនការនេះក៏បានសម្របសម្រួលទៅតាមផែនការសកម្មភាពសកលរបស់អង្គការសហប្រជាជាតិ ផ្អែកតាមច្បាប់ស្តីពីចរាចរណ៍ផ្លូវគោកស្របទៅនឹងការវិវឌ្ឍន៍ជឿនលឿនរបស់ជាតិលើគ្រប់វិស័យ ពិសេសវិស័យពាក់ព័ន្ធសកម្មភាពចរាចរណ៍ផ្លូវគោកដូចជា អត្រាកំណើនប្រជាជន កំណើនសេដ្ឋកិច្ច កំណើនយានយន្ត ការអភិវឌ្ឍវិស័យផ្លូវថ្នល់ ស្ថានភាពគ្រោះថ្នាក់ចរាចរណ៍ផ្លូវគោក បទពិសោធន៍ល្អៗនៃវិធានការរឹតបន្តឹងអនុវត្តច្បាប់ និងបញ្ហាប្រឈមនានា។
លោក ផៃ ស៊ីផាន រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល បានឱ្យដឹងថា សេចក្តីព្រាងផែនការជាតិទសវត្សរ៍សកម្មភាពសុវត្ថិភាពចរាចរណ៍ផ្លូវគោកឆ្នាំ២០២១-២០៣០ មានគោលបំណង កាត់បន្ថយចំនួនអ្នកស្លាប់ និងអ្នករបួសដោយសារគ្រោះថ្នាក់ចរាចរណ៍ផ្លូវគោកឱ្យបាន៥០ភាគរយ នៅឆ្នាំ២០៣០ ដោយផ្តោតលើគោលដៅសំខាន់ចំនួន២ គឺទី១៖ កាត់បន្ថយចំនួនអ្នកស្លាប់ និងរបួសតាមកត្តាហានិភ័យនៃគ្រោះថ្នាក់ចរាចរណ៍ផ្លូវគោក និងទី២៖ បង្កើនប្រសិទ្ធភាពការអនុវត្តការងារសុវត្ថិភាពចរាចរណ៍ផ្លូវគោកដោយផ្អែកតាមសសរស្ដម្ភចំនួន៦។
លោក ផៃ ស៊ីផាន បានឱ្យដឹងដែរថា ផែនការជាតិនេះ មានយុទ្ធសាស្ត្រអនុវត្តលើរាជធានី ខេត្តគោលដៅដែលមានអត្រាអ្នកស្លាប់ និងរបួសដោយសារគ្រោះថ្នាក់ចរាចរណ៍ខ្ពស់ចំនួន១៦រួមមាន៖ រាជធានីភ្នំពេញ ខេត្តកណ្តាល ខេត្តព្រះសីហនុ ខេត្តកំពង់ចាម ខេត្តសៀមរាប ខេត្តបន្ទាយមានជ័យ ខេត្តក្រចេះ ខេត្តកំពង់ធំ ខេត្តបាត់ដំបង ខេត្តពោធិ៍សាត់ ខេត្តស្វាយរៀង ខេត្តព្រៃវែង ខេត្តកំពង់ស្ពឺ ខេត្តតាកែវ និងខេត្តកំពត។
យុទ្ធសាស្ត្រនេះមានសសរស្តម្ភចំនួន៦។ ក្នុងនោះ សសរស្ដម្ភចំនួន៥ ស្របតាមផែនការសកម្មភាពសុវត្ថិភាពចរាចរណ៍ផ្លូវគោកសកល និងសសរស្តម្ភចំនួន១ (សសរស្ដម្ភទី២) ផ្អែកតាមស្ថានភាពជាក់ស្ដែងរបស់ប្រទេសកម្ពុជា។
សសរស្តម្ភទាំង៦នេះ រួមមាន៖
- ពង្រឹងយន្តការគ្រប់គ្រង និងដឹកនាំការងារសុវត្ថិភាពចរាចរណ៍ផ្លូវគោក
- ពង្រឹងការអនុវត្តច្បាប់ និងលិខិតបទដ្ឋានគតិយុត្តពាក់ព័ន្ធ
- ពង្រឹងការអប់រំ ផ្សព្វផ្សាយអំពីសុវត្ថិភាពចរាចរណ៍ផ្លូវគោក
- ពង្រឹងការគ្រប់គ្រងវិស្វកម្មសុវត្ថិភាពផ្លូវថ្នល់
- ពង្រឹងប្រសិទ្ធភាពនៃសេវាសង្រ្កោះបឋម និងសង្រ្គោះបន្ទាន់
- ពង្រឹងការគ្រប់គ្រងសុវត្ថិភាពយានយន្ត៕
