គម្រោងជួសជុលខ្លោងទ្វារខាងកើតប្រាសាទតាព្រហ្មសម្រេចបាន ៣៥% ហើយ

គម្រោងជួសជុលខ្លោងទ្វារខាងកើតប្រាសាទតាព្រហ្មសម្រេចបាន ៣៥% ហើយ

គិតត្រឹមពាក់កណ្ដាលខែតុលានេះ គម្រោងជួសជុលខ្លោងទ្វារខាងកើតប្រាសាទតាព្រហ្ម សម្រេចបាន ៣៥% ហើយ ដោយបច្ចុប្បន្នក្រុមការងារកំពុងជួសជុលថ្ម និងដំឡើងកាំថ្មនៅផ្នែកខាងជើង ក្រោយផ្នែកខាងត្បូង និងដំបូល ជួសជុលបានប្រមាណ ៥០%។

លោកស្រី នេត ស៊ីម៉ន មន្រ្តីបុរាណវិទ្យា នៃនាយកដ្ឋានអភិរក្សប្រាសាទ និងបុរាណវិទ្យាបង្ការ លើកឡើងថា ការងារជួសជុលខ្លោងទ្វារខាងកើតប្រាសាទតាព្រហ្មមានការវិវត្តន៍ច្រើន ទោះមានការរាំងស្ទះខ្លះៗដោយសារភ្លៀងក្ដី។ បច្ចុប្បន្នការងារសម្រេចបាន៣៥ភាគរយហើយ ដែលគ្រោងនឹងបញ្ចប់នៅឆ្នាំ២០២៣។

រំឮកទៅពេលមុន ស្ថានភាពខ្លោងទ្វារខាងកើតនេះមានសភាពទ្រុឌទ្រោមខ្លាំង ដែលតួខ្លោងទ្វារនេះបានទ្រេត និងមានហានិភ័យខ្ពស់ដល់ភ្ញៀវទេសចរ។ ដោយមើលឃើញដូច្នេះហើយ ទើបអាជ្ញាធរជាតិអប្សរា ដោយមានកិច្ចសហប្រតិបត្តិការជាមួយស្ថាប័នឥណ្ឌា និងមានការយល់ព្រមពីគណៈកម្មាធិការអាយស៊ីស៊ី-អង្គរ បានចាប់ផ្តើមជួសជុលខ្លោងទ្វារនេះវិញនៅដើមឆ្នាំ២០២២។

ចំពោះដំណើរការជួសជុល លោកស្រី នេត ស៊ីម៉ន ពន្យល់ថា គឺត្រូវរើថ្មទាំងអស់ ដើម្បីជួសជុលពង្រឹងគ្រឹះ និងរៀបថ្មឡើងវិញ។ ស្ថានភាពថ្មមួយចំនួនតូចមានភាពពុកផុយ និងខ្លះបានបាត់ ដែលតម្រូវឱ្យប្រើប្រាស់ថ្មថ្មី តែក្នុងកម្រិតតិចតូចប៉ុណ្ណោះ៕

អត្ថបទ៖ នាង សំណាង
រូបភាព៖ ហាប់ គឹមអាន