អ.វ.ត.ក បើកសវនាការលើបណ្តឹងសាទុក្ខរបស់ ខៀវ សំផន
អ.វ.ត.ក បើកសវនាការលើបណ្តឹងសាទុក្ខរបស់ ខៀវ សំផន
អង្គជំនុំជម្រះវិសាមញ្ញក្នុងតុលាការកម្ពុជា ហៅកាត់ អ.វ.ត.ក បានបើកសវនាការលើបណ្តឹងសាទុក្ខរបស់ ខៀវ សំផន ដើម្បីពិចារណាលើអង្គហេតុ និងទឡ្ហីករណ៍ ក្រោយពីមេដឹកនាំរបបខ្មែរក្រហមរូបនេះ បដិសេធចំពោះការសម្រេចនូវសាលក្រមកាលពីឆ្នាំ២០១៨ ដែលផ្តន្ទាទោសដាក់ពន្ធនាគារអស់មួយជីវិត។
សវនាការនៅព្រឹកថ្ងៃទី១៦ ខែសីហា នេះ មានវត្តមានរបស់ ខៀវ សំផន អតីតប្រធានគណៈប្រធានរដ្ឋនៃរបបកម្ពុជាប្រជាធិបតេយ្យ ដោយផ្តោតឡើងលើប្រធានបទសំខាន់ៗរួមមាន៖ ១- ភាពត្រឹមត្រូវនៃកិច្ចដំណើរការនីតិវិធី, ២- ភាពត្រឹមត្រូវនៃយុត្តាធិការ, ៣- បទឧក្រិដ្ឋដែល ខៀវ សំផន ត្រូវសម្រេចដាក់ពិរុទ្ធភាព, និង៤-វគ្គបិទសវនាការរួមបញ្ចូលបទបង្ហាញសង្ខេបបដិសេធរបស់មេធាវីការពារក្តី ព្រមទាំងឱកាសសម្រាប់ខៀវ សំផន ថ្លែងទៅកាន់អង្គជំនុំជម្រះដោយ ផ្ទាល់នៅក្នុងអំឡុងពេលសវនាការលើបណ្តឹងសាទុក្ខ។
លោក នេត្រ ភក្ត្រា ប្រធានផ្នែកកិច្ចការសាធារណៈនៃសាលាក្តីខ្មែរ ក្រហម បានថ្លែងថា ថ្ងៃនេះជាថ្ងៃដ៏មានសារសំខាន់បំផុតសម្រាប់យុត្តិធម៌អន្តរជាតិ សម្រាប់មនុស្សជាតិ ជាពិសេសសម្រាប់ជនរងគ្រោះនៃរបបខ្មែរក្រហម អ.វ.ត.ក បានបើកសវនាការលើបណ្តឹងសាទុក្ខក្នុងសំណុំ រឿង ០០២/០២ ប្រឆាំងនឹងខៀវ សំផន អតីតប្រធានគណៈប្រធានរដ្ឋនៃរបបកម្ពុជាប្រជាធិបតេយ្យតែម្នាក់គត់ ដែលនៅរស់រានមានជីវិត ដើម្បីឈានទៅការបញ្ជាក់ចុងក្រោយថា ខៀវ សំផន នឹងមានពិរុទ្ធភាពដូចអ្វីដែលអង្គជំនុំជម្រះសាលាដំបូងនៃអ.វ.ត.ក រកឃើញ និងសម្រេចផ្តន្ទាទោសដាក់ពន្ធនាគារអស់មួយជីវិតពីឧក្រិដ្ឋកម្មប្រល័យពូជសាសន៍ ឧក្រិដ្ឋកម្មប្រឆាំងនឹងមនុស្សជាតិ និងឧក្រិដ្ឋកម្មសង្គ្រាមដែរឬទេ។
គួររំឭកថា សាលក្រមក្នុងសំណុំរឿង០០២/០២ ត្រូវបានអង្គជំនុំជម្រះសាលាដំបូងនៃ អ.វ.ត.ក ប្រកាសនៅថ្ងៃទី១៦ ខែវិច្ឆិកា ឆ្នាំ២០១៨ ដោយបានសម្រេចផ្តន្ទាទោសដាក់ពន្ធនាគារអស់មួយជីវិតប្រឆាំងនឹងជនជាប់ចោទ នួន ជា និង ខៀវ សំផន ពីបទឧក្រិដ្ឋកម្មប្រល័យពូជសាសន៍ ឧក្រិដ្ឋកម្មប្រឆាំងនឹងមនុស្សជាតិ និងឧក្រិដ្ឋកម្មសង្គ្រាម ដែលបានប្រព្រឹត្តឡើងនៅតាមទីកន្លែងនានានៅក្នុងប្រទេសកម្ពុជា អំឡុងពេលនៃរបបកម្ពុជាប្រជាធិបតេយ្យគ្រប់គ្រងប្រទេសពីថ្ងៃទី១៧ ខែមេសា ឆ្នាំ១៩៧៥ ដល់ថ្ងៃទី៦ ខែមករា ឆ្នាំ ១៩៧៩។
សវនាការលើបណ្តឹងសាទុក្ខសំណុំរឿង ០០២/០២ ជាផ្នែកចុងក្រោយនៃសំណុំរឿង ០០២ ប្រឆាំងនឹងអតីតមេដឹកនាំខ្មែរក្រហម ៤ រូប។ ជនជាប់ចោទ ខៀវ សំផន អតីតប្រធានគណៈប្រធានរដ្ឋនៃរបបកម្ពុជាប្រជាធិបតេយ្យ បច្ចុប្បន្នមានអាយុ ៩១ ឆ្នាំ។ ជនជាប់ចោទជាអតីតមេដឹកនាំខ្មែរក្រហម ៣ រូបទៀតបានស្លាប់បាត់បង់ជីវិត ក្នុងនោះ ទី១-នួន ជា អតីតអនុលេខាបក្សកុម្មុយនិស្តកម្ពុជា និងជាប្រធានសភាតំណាងប្រជាជន ស្លាប់នៅថ្ងៃទី៤ ខែសីហា ឆ្នាំ២០១៩ ក្នុងអំឡុងពេលនៃដំណើរការបណ្តឹងសាទុក្ខក្នុងសំណុំ រឿង ០០២/០២ ដែលគាត់ត្រូវបានអង្គជំនុំជម្រះសាលាដំបូងសម្រេចផ្តន្ទាទោសដាក់ពន្ធនាគារអស់មួយជីវិត។ ទី២-អតីតឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេសស្លាប់នៅខែមីនា ឆ្នាំ២០១៣ និង អៀង ធីរិទ្ធ អតីតរដ្ឋមន្ត្រីក្រសួងសង្គមកិច្ច ស្លាប់នៅឆ្នាំ២០១៥។
អង្គជំនុំជម្រះតុលាការកំពូល នៃ អ.វ.ត.ក រំពឹងថា នឹងប្រកាសសាលដីកាស្ថាពររបស់ខ្លួនលើសំណុំរឿង ០០២/០២ ឆ្នាំ២០២២ខាងមុខ ក្រោយបើកសវនាការលើបណ្តឹងសាទុក្ខ៕ AKP
