មន្ទីរពេទ្យចំនួន៦កន្លែង ចាប់ផ្ដើមចាក់វ៉ាក់សាំងការពារជំងឺកូវីដជូនមន្ត្រីសុខាភិបាល និងកម្លាំងនគរបាលដំណាក់កាលដំបូងនៅខេត្តស្វាយរៀង

មន្ទីរពេទ្យចំនួន៦កន្លែង ចាប់ផ្ដើមចាក់វ៉ាក់សាំងការពារជំងឺកូវីដជូនមន្ត្រីសុខាភិបាល និងកម្លាំងនគរបាលដំណាក់កាលដំបូងនៅខេត្តស្វាយរៀង

(ស្វាយរៀង)៖ វ៉ាក់សាំងកូវីដ-១៩ ចំនួន៣០០០ដូស ត្រូវបានក្រសួងសុខាភិបាលបញ្ជូនទៅកាន់ខេត្តស្វាយរៀង ដោយអនុញ្ញាតឲ្យចាក់ទៅលើមន្ត្រីសុខាភិបាល និងកម្លានគរបាលខេត្តដែលមានមន្ទីរពេទ្យចំនួន៦ សម្រាប់ពិគ្រោះ និងចាក់វ៉ាក់សាំងនេះ។

លោកបណ្ឌិត កែរ រដ្ឋា បានថ្លែងប្រាប់ភ្នាក់ងារ Fresh News ប្រចាំខេត្តស្វាយរៀង នៅព្រឹកថ្ងៃទី២៣ ខែកុម្ភៈ ឆ្នាំ២០២១នេះថា មន្ទីរសុខាភិបាលបានជូនដំណឹងដល់ប្រធានមន្ទីរពេទ្យខេត្ត ប្រធានការិយាល័យស្រុកប្រតិបត្តិទាំង៤ និងលោកប្រធានមន្ទីរពេទ្យបង្អែកទាំង៥ ដោយមានការអនុញ្ញាតពីក្រសួងសុខាភិបាល មន្ទីរពេទ្យខេត្តរៀបចំចាក់វ៉ាក់សាំងកូវីដ ដល់កម្លាំងនគរបាល និងមន្ត្រីសុខាភិបាលនៅដំណាក់កាលទីមួយ និងជួយផ្ដល់ដំណឹង ដល់មន្ត្រីសុខាភិបាល មន្ត្រីជាប់កិច្ចសន្យា បុគ្គលិកជួល កម្មករ និងអ្នកបើកបរទាំងអស់ដែលកំពុងបម្រើការងារនៅតាមគ្រឹះស្ថានសុខាភិបាលរដ្ឋទាំងអស់ទូទាំងខេត្ត ឲ្យទៅចាក់វ៉ាក់សាំង ដោយស្ម័គ្រចិត្តព្រមទាំងយក អត្តសញ្ញាណប័ណ្ណ និងប័ណ្ណសម្គាល់ខ្លួនមន្ត្រីរាជការទៅជាមួយផង។

លោកបានបន្តថា ទីតាំងដែលត្រូវចាក់វ៉ាក់សាំងការពារជំងឺកូវីដមានចំនួន៦កន្លែង រួមមាន៖

*ទី១៖ មន្ទីរពេទ្យខេត្តស្វាយរៀង
*ទី២៖ មន្ទីរពេទ្យបង្អែកស្វាយជ្រំ
*ទី៣៖ មន្ទីរពេទ្យបង្អែកស្វាយទាប
*ទី៤៖ មន្ទីរពេទ្យបង្អែកសាមគ្គីរំដួល
*ទី៥៖ មន្ទីរពេទ្យបង្អែកជីភូ
*ទី៦៖ មន្ទីរពេទ្យបង្អែករមាសហែក។

លោកបានបន្តថា «ការចាក់វ៉ាក់សាំងនេះ អាចមានលទ្ធភាពចាក់ជូនមន្ត្រីនគរបាលចំនួន៥០នាក់ និងមន្ត្រីសុខាភិបាលចំនួន៥០នាក់យ៉ាងច្រើនបំផុត ក្នុងមួយកន្លែងក្នុងមួយថ្ងៃ ដូច្នេះដើម្បីកុំឲ្យមានការរង់ចាំយូរ និងខាតពេលវេលាធ្វើការងារ គឺបានបែងចែកវេនទៅចាក់វ៉ាក់សាំងការពារកូវីដ តាមទីតាំង៦កន្លែង ដែលស្ថិតនៅជិតបំផុតក្នុងមួយថ្ងៃ ៥០នាក់ចាប់ពីថ្ងៃទី២២ ខែកុម្ភៈ ឆ្នាំ២០២១ នៅរៀងរាល់ម៉ោងធ្វើការ និងរហូតដល់អស់អ្នកស្ម័គ្រចិត្តចាក់តែម្តង»៕