ក្នុងរយៈពេល១១ខែ កម្ពុជាទទួលបានប្រាក់ចំណូលជាង៤០០លានដុល្លារ ពីការនាំចេញអង្ករ
ក្នុងរយៈពេល១១ខែ កម្ពុជាទទួលបានប្រាក់ចំណូលជាង៤០០លានដុល្លារ ពីការនាំចេញអង្ករ
កម្ពុជាទទួលបានប្រាក់ចំណូលជាង៤១៥លានដុល្លារអាមេរិក ពីការនាំចេញអង្ករ ក្នុងរយៈពេល១១ខែ ឆ្នាំ២០២០នេះ កើនឡើងជិត៤៣លានដុល្លារ ធៀបនឹងរយៈពេលដូចគ្នា ក្នុងឆ្នាំ២០១៩។
លោកឧកញ៉ា សុង សារ៉ន ប្រធានសហព័ន្ធស្រូវអង្ករកម្ពុជា មានប្រសាសន៍ប្រាប់វិទ្យុជាតិកម្ពុជាឱ្យដឹងថា ក្នុងរយៈពេល១១ខែ នេះ ការនាំចេញអង្កររបស់កម្ពុជាមានការកើនឡើងជិត១៧ភាគរយ ដែលគិតជាបរិមាណសរុប មានចំនួន ៦០១,០៤៥ តោន គិតជាទឹកប្រាក់ចំនួន ៤១៥លានដុល្លារអាមេរិក ដែលទឹកប្រាក់នេះមានការកើនឡើងចំនួន៤៣លានដុល្លារអាមេរិក ឬ ជិត ១២ភាគរយ បើធៀបទៅនឹងរយៈពេលដូចគ្នាក្នុងឆ្នាំ ២០១៩ ដែលបាននាំចេញគិតជាទឹកប្រាក់ត្រឹម ៣៧២លានដុល្លារតែ ប៉ុណ្ណោះ។
លោកបានឱ្យដឹងទៀតថា ការកើនឡើងនេះដោយសារតែសហព័ន្ធស្រូវអង្ករកម្ពុជា បានកំណត់មូលដ្ឋានជាយុទ្ធសាស្រ្ត ក្នុងការកសាងកេរ្តិ៍ឈ្មោះអង្ករកម្ពុជា។ នេះជាមោទនភាពមួយ ដែលសហព័ន្ធស្រូវអង្ករកម្ពុជា អាចនឹងសម្រេចបាន នូវការនាំអង្ករចេញឱ្យបាន១លានតោន នៅឆ្នាំ២០២១- ២០២២។
« សហគមន៍អឺរ៉ុបនិងប្រទេសចិន គឺសមតុល្យនូវការបញ្ជាទិញ ដោយយើងបានចាក់ចំណុចនៅទីផ្សារ ដែលគេចង់បាន ដូច្នេះយើងថ្លឹងថ្លែង ហើយយើងបានជាង៦០ភាគរយដែលអាចទ្រទ្រង់អង្កររបស់យើងឱ្យមានកំណើនខ្លាំង។បើសិនជាយើងមើលតាមផែនការយុទ្ធសាស្ត្ររបស់សហព័ន្ធស្រូវអង្ករនៅក្នុងអាណត្តិទី៣នេះ គឺយើងចង់នាំចេញឱ្យបាន ១លានតោន ត្រឹមឆ្នាំ ២០២១-២០២២។ ហើយដូច្នេះ បើយើងមើលតាមតួលេខដែលយើងបានឃើញ យើងពិតជាមាន មោទនភាពមែនទែន បើដ្បិតដែលយើងមានផលប៉ះពាល់ដោយទឹកជំនន់ ផលប៉ះពាល់រាំងស្ងួត កូវីដ-១៩ និងថែរក្សា ស្បៀងអាហារនៅក្នុងស្រុក ក៏យើងនៅតែឃើញថាមានកំណើនមួយគួរឱ្យកត់សម្គាល់នាពេលនេះ»។
ប្រធានសហព័ន្ធស្រូវអង្ករកម្ពុជា បានបញ្ជាក់ថា សម្រាប់ខែវិច្ឆិកាកន្លងទៅនេះដែរ អង្កររបស់កម្ពុជា បាននាំចេញចំនួន ៦១% ទៅកាន់ប្រទេសចិន និង ២%ទៅកាន់ទីផ្សារក្រុងហុងកុង ដែលមានបរិមាណសរុបចំនួន ៤០,៤៨៩តោន គិតជាទឹកប្រាក់ចំនួន ២៩លានដុល្លារអាមេរិក។ លោកបានឱ្យដឹងទៀតថា ក្នុងរយៈពេល១១ខែនេះដែរ កម្ពុជាបាននាំចេញ អង្ករក្រអូប ចំនួន ៤៨១,២០០តោន ឬស្មើនឹង៨០%នៃបរិមាណនាំចេញសរុប ដែលក្នុងនោះ អង្ករក្រអូបប្រណិត ប្រភេទម្លិះអង្គរ ត្រូវបាននាំចេញចំនួន ៥៥% អង្ករសែនក្រអូបចំនួន ២៥%៕
