ទស្សនៈមិត្តអ្នកអាន៖ «សេដ្ឋកិច្ចកម្ពុជានឹងនៅតែរឹងមាំ ទោះគ្មាន EBA ក៏ដោយ»
ទស្សនៈមិត្តអ្នកអាន៖ «សេដ្ឋកិច្ចកម្ពុជានឹងនៅតែរឹងមាំ ទោះគ្មាន EBA ក៏ដោយ»ជាការកត់សម្គាល់ជាងពីរទសវត្សរ៍ចុងក្រោយមកនេះ ប្រទេសកម្ពុជាក្រោមការដឹកនាំរបស់លោកនាយករដ្ឋមន្ត្រី ហ៊ុន សែន ដែលបានធ្វើឱ្យប្រទេសមានសុខសន្តិភាពពេញលេញលើផ្ទៃប្រទេស មានឱកាសគ្រប់គ្រាន់ក្នុងការរសាង និងអភិវឌ្ឍន៍ប្រទេសជាតិឱ្យងើបផុតពីភាពក្រីក្រក្លាយមកជាប្រទេសមានកំណើនសេដ្ឋកិច្ចរីកចំរើនស្មើមុខស្មើមាត់ទាំងក្នុងតំបន់ និងលើឆាកអន្តរជាតិនាបច្ចុប្បន្ន។
ទន្ទឹមនឹងកំណើនសេដ្ឋកិច្ចរីកចំរើនជាលំដាប់នេះ ប្រជាជនកម្ពុជាក៏កំពុងតែទទួលរងការគំរាមកំហែងទាំងអយុត្តិធម៌មួយពីសហភាពអឺរ៉ុប រឿងការសម្រេចចិត្តព្យួរទាំងស្រុង ឬព្យួរផ្នែកខ្លះនៃប្រព័ន្ធអនុគ្រោះពន្ធ EBA ពីកម្ពុជា ក្រោមលេសថា កម្ពុជាបានរំលោភសិទ្ធិមនុស្ស និងបំផ្លាញប្រជាធិបតេយ្យ។ ប៉ុន្តែអ្វីដែលសហភាពអឺរ៉ុបបានចោទកម្ពុជាពេលនេះ គឺជារឿងមិនត្រឹមត្រូវឡើយ ព្រោះថាស្ថានភាពសិទ្ធិមនុស្ស និងលទ្ធិប្រជាធិបតេយ្យនៅកម្ពុជាមានភាពកាន់តែល្អប្រសើរឡើងជាលំដាប់ បើប្រៀបធៀបទៅនឹងស្ថានភាពសិទ្ធិមនុស្សរបស់ប្រទេសជិតខាងកម្ពុជា។ ទោះជាយ៉ាងណាក៏ដោយចុះ ប្រសិនបើសហភាពអឺរ៉ុបសម្រេចព្យួរ EBA ពីកម្ពុជាក្នុងពេលខាងមុខដ៏ខ្លីនេះពិតមែន ក៏កម្ពុជានៅតែមានលទ្ធភាពរស់បានដោយខ្លួនឯង ដោយមិនចាំបាច់ពឹងតែលើជំនួយពីបរទេសនោះដែរ។ ការព្រួយបារម្ភរបស់បងប្អូនប្រជាពលរដ្ឋកម្មករ-កម្មការិនីពីបញ្ហា EBA នេះ វាគ្មានអ្វីចម្លែកទេ គឺ EBA របស់សហភាពអឺរ៉ុបបានផ្តល់ឲ្យកម្ពុជានេះ វាគង់តែនឹងបាត់ ឬគេដកទៅវិញទេ នាពីរឬបីឆ្នាំខាងមុខទៀតយ៉ាងពិតប្រាកដ នៅពេលដែលកំណើនសេដ្ឋកិច្ចរបស់កម្ពុជាកើនឡើងផុតពីភាពក្រីក្រ។ បងប្អូនប្រជាពលរដ្ឋកម្មករ-កម្មការិនីយើងបានដឹងស្ទើរតែទាំងអស់គ្នាស្រាប់ទៅហើយថា ប្រព័ន្ធអនុគ្រោះពន្ធ EBA របស់សហភាពអឺរ៉ុបនេះ គឺគេផ្តល់ឲ្យតែប្រទេសណាដែលនៅមានកំណើនសេដ្ឋកិច្ចទន់ខ្សោយ ឬមានការអភិវឌ្ឍតិចតូចនៅឡើយតែប៉ុណ្ណោះ។ ប៉ុន្តែបច្ចុប្បន្ននេះកម្ពុជាកំពុងឈរនៅលំដាប់ជាប្រទេសដែលមានកំណើនសេដ្ឋកិច្ចមធ្យមកំរិតទាបទៅហើយ ដែលស្ទើរតែងើបផុតទាំងស្រុងលែងចាំបាច់ត្រូវការប្រព័ន្ធអនុគ្រោះពន្ធ EBA នេះទៀតហើយ គឺអាចរស់ដោយសេដ្ឋកិច្ចខ្លួនឯងបានហើយ។
បើយោងទៅលើបទពិសោធន៍ពីផលប៉ះពាល់នៃសេដ្ឋកិច្ចសកលកន្លងមក សេដ្ឋកិច្ចរបស់កម្ពុជាក៏ធ្លាប់បានទទួលរងនូវផលប៉ះពាល់ខ្លះផងដែរ ដែលធ្វើឲ្យកំណើនសេដ្ឋកិច្ចជាតិមានការថយចុះ ប៉ុន្តែក្នុងកាលៈទេសៈនោះកម្ពុជានៅតែអាចទប់ទល់បានដោយគ្មានការដួលរលំនៃសេដ្ឋកិច្ចជាតិ ដូចការឃោសនាបំភិតបំភ័យរបស់ក្រុមប្រឆាំងជ្រុលនិយមមួយចំនួនឃោសនាបំភ្លើសនោះទេ។ ជាការវាយតម្លៃរបស់អ្នកជំនាញផ្នែកសេដ្ឋកិច្ចថា ក្នុងកាលៈទេសៈបច្ចុប្បន្ននេះ បើទោះបីជាកម្ពុជាទទួលរងនូវឥទ្ធិពលនៃការធ្លាក់ចុះនៃសេដ្ឋកិច្ចសកលផងក៏ដោយ និងការព្យួរតែផ្នែកខ្លះនៃ EBA ពីសហភាពអឺរ៉ុបផងក៏ដោយ ក៏សេដ្ឋកិច្ចកម្ពុជាអាចគ្រាន់តែថយកំណើនតិចតូចបំផុត មកនៅត្រឹមរង្វង់ប្រមាណ ៦,១% នៃ GDP ប៉ុណ្ណោះ ហើយវានឹងមិនធ្វើឲ្យសេដ្ឋកិច្ចជាតិមានបញ្ហានោះឡើយ។ ដូច្នេះបើសហភាពអឺរ៉ុបគ្រាន់តែព្យួរតែផ្នែកខ្លះនៃ EBA ប៉ុន្តែមិនមែនបានន័យថា សហភាពអឺរ៉ុបគេបិទទីផ្សារទាំងស្រុងមិនឲ្យកម្ពុជានាំទំនិញទៅលក់នៅទីផ្សារអឺរ៉ុបនោះទេ សូមបងប្អូនប្រជាពលរដ្ឋកម្មករ-កម្មការិនីកុំមានការយល់ច្រឡំ ឬជឿតាមការបំភិតបំភ័យ និងបំផ្លើសរបស់ក្រុមពួកប្រឆាំងជ្រុលនិយមឃោសនាឲ្យសោះ។
លើសពីនេះទៀត ដោយផ្អែកតាមប្រសាសន៍របស់មន្ត្រីជាន់ខ្ពស់នៃក្រសួងសេដ្ឋកិច្ចកម្ពុជាបានបញ្ជាក់ថា រាជរដ្ឋាភិបាលកម្ពុជាដែលដឹកនាំដោយលោកនាយករដ្ឋមន្ត្រី ហ៊ុន សែន គឺរដ្ឋាភិបាលបានត្រៀមទុនបំរ៉ុងទុករួចជាស្រេចតាំងពី ៤-៥ឆ្នាំជាមុនរួចទៅហើយ ក្នុងការពង្រឹងសេដ្ឋកិច្ចកម្ពុជាដើម្បីទប់ទល់ផលប៉ះពាល់នេះ គឺ«ការធ្វើកំណែទម្រង់សេដ្ឋកិច្ចផ្ទៃក្នុង និងបង្កើនការវិនិយោគពីខាងក្រៅដើម្បីធ្វើឲ្យសេដ្ឋកិច្ចកម្ពុជាកាន់តែរឹងមាំ»។ ដែលស្របទៅនឹងប្រសាសន៍របស់លោកនាយករដ្ឋមន្ត្រី ហ៊ុន សែន បានដាក់ចេញនូវវិធានការជាក់ស្តែងដោយបានកំណត់ច្បាស់ថា៖ «យើងត្រូវខិតខំធ្វើយ៉ាងណាឲ្យថ្លៃដើមផលិតផលរបស់កម្ពុជាចុះថោកដើម្បីធ្វើឲ្យធុរៈជន(អ្នកវិនិយោគ)ទាំងឡាយដែលរកស៊ីនៅកម្ពុជានេះ ទទួលបានផលចំណេញ និងមានលទ្ធភាពបង់ពន្ធចូលទៅកាន់ទីផ្សាររបស់គេ»។
សរុបមកក្រុមពួកប្រឆាំងជ្រុលនិយមដែលតែងតែព្យាយាមបំភិតបំភ័យនិងឃោសនាបំភ្លើសពីការពិត ដល់ប្រជាពលរដ្ឋកម្ពុជាជាពិសេសបងប្អូនកម្មករ-កម្មការិនីលើបញ្ហាដែលថា សហភាពអឺរ៉ុបដកប្រព័ន្ធអនុគ្រោះពន្ធ EBA ពីកម្ពុជានេះ គឺគ្រាន់តែជាការឃោសនាបំផ្លើសពីការពិតប៉ុណ្ណោះ ឡើងស៊ាំលែងមានន័យតទៅទៀតហើយ ព្រោះថាប្រសិនបើ EBA ត្រូវបានព្យួរតែផ្នែកខ្លះ ឬទាំងស្រុងក៏ដោយ ក៏មិនមែនបានន័យថា កម្ពុជាបាត់បង់ទីផ្សារមិនអាចនាំទំនិញទៅលក់នៅអឺរ៉ុបនោះដែរ។ ដូច្នេះសូមបងប្អូនប្រជាពលរដ្ឋកម្មករ-កម្មការិនី មិនត្រូវជឿដោយខ្វះការពិចារណាតាមការបំភិតបំភ័យនិងបំភ្លើសពីការពិតរបស់ក្រុមពួកប្រឆាំងជ្រុលនិយមមួយចំនួននោះទេ៕
ដោយ៖ គង់ សំរេច
