ក្រសួងសាធារណៈការ ប្រកាសបើកឲ្យដំណើរការចុះបញ្ជីស្លាកលេខពិសេសផ្ទាល់ខ្លួនសម្រាប់រថយន្តចាប់ពីថ្ងៃទី៧ខែមករានេះតទៅ
ក្រសួងសាធារណៈការ ប្រកាសបើកឲ្យដំណើរការចុះបញ្ជីស្លាកលេខពិសេសផ្ទាល់ខ្លួនសម្រាប់រថយន្តចាប់ពីថ្ងៃទី៧ខែមករានេះតទៅក្រសួងសាធារណៈការ និងដឹកជញ្ជូន នៅថ្ងៃនេះ បានប្រកាសបើកឲ្យដំណើរការចុះបញ្ជីស្លាកលេខពិសេសផ្ទាល់ខ្លួនសម្រាប់រថយន្ត ដោយមានតម្លៃចាប់ពី២លានរៀលឬស្មើនឹង៥០០ដុល្លារអាមេរិកឡើងទៅ។ មន្ត្រីជំនាញបានធ្វើការពន្យល់ថា ការធ្វើស្លាកធ្វើលេខពិសេសនេះ គឺម្ចាស់យានយន្តអាចកំណត់អក្សរ ឬលេខទៅតាមអ្វីដែលពួកគេចង់បាន ហើយក៏អាចរក្សាទុកស្លាកលេខពិសេសនេះប្រើប្រាស់ពេញមួយជីវិត បើទោះបីជារថយន្តត្រូវបានលក់បន្តក៏ដោយ។
អ្នកនាំពាក្យក្រសួងសាធារណៈការ និងដឹកជញ្ជួន លោក ហ៊ាង សុទ្ធាយុត្តិ ដែលជាអ្នកជំនាញក្នុងរៀបចំដាក់ឲ្យដំណើរការចុះបញ្ជីស្លាកលេខពិសេសផ្ទាល់ខ្លួននេះ បានប្រាប់វិទ្យុបារាំងអន្តរជាតិ RFI ថា ការដាក់ឲ្យដំណើរស្លាកលេខពិសេសនេះដើម្បីធ្វើទំនើបកម្មឲ្យមានភាពងាយស្រួលក្នុងការគ្រប់គ្រងនិងជាការបង្កើនការប្រមូលថវិកាជាតិផងដែរ។ សម្រាប់តម្លៃនៃស្លាកលេខពិសេសគឺមានចាប់ពី២លានរៀលឬស្មើនឹង៥០០ដុល្លារអាមេរិកឡើងទៅ។ ស្លាកលេខពិសេសនេះ គឺម្ចាស់រថយន្តអាចបញ្ជាទិញដោយដាក់ឈ្មោះផ្ទាល់ខ្លួន ឬឈ្មោះពិសេសណាមួយសម្រាប់សំគាល់អត្តសញ្ញាណខ្លួនឯង ហើយនៅពេលលក់រថយន្តឬប្តូរម្ចាស់កម្មសិទ្ធិ គឺអាចដកហូតស្លាកលេខនោះចេញដោយរក្សាទុកប្រើផ្ទាល់ខ្លួនអស់មួយជីវិត។ នេះគឺជាការពន្យល់របស់លោក ហ៊ាង សុទ្ធាយុត្តិ ។
ប្រធាននាយកដ្ឋានព័ត៌មានវិទ្យា និងទំនាក់ទំនងសាធារណៈរូបនេះ បានពន្យល់ទៀតថា មូលហេតុដែលក្រសួងនឹកឃើញវិធីសាស្ត្រចេញស្លាកលេខពិសេសនេះ គឺដោយយោងលើការស្ទង់មតិដែលបង្ហាញថា ពលរដ្ឋដែលមានជីវភាពធូធារ ឬអ្នកស៊ីវិល័យ ជាច្រើនចង់បានស្លាកលេខពិសេសនេះ។ ហើយម្យ៉ាងទៀតរដ្ឋក៏អាចលក់ស្លាកលេខនេះបានថ្លៃដើម្បីប្រមូលចំណូលចូលរដ្ឋផងដែរ។
យ៉ាងណាក៏ដោយ នៅពេលសួរថា ប្រសិនបើមានឥស្សរជនជាន់ខ្ពស់ ឬអ្នកមានឥទ្ធិពលណាមួយប្រើប្រាស់ស្លាកលេខពិសេសនេះសម្រាប់រថយន្តរបស់ខ្លួន ហើយនៅពេលបង្កគ្រោះថ្នាក់ជាយថាហេតុ តើវាអាចធ្វើឲ្យប៉ូលីសចរាចរណ៍ខ្លាចមិនហ៊ានចាប់ដែរឬទេ? លោក ហ៊ាង សុទ្ធាយុត្តិ យល់ថា សម័យនេះហើយគេមិនអាចបិទបាំងកំហុសរបស់នណាម្នាក់បានឡើយ ព្រោះមានសារព័ត៌មានសម្បូរបែប។
ទាក់ទងនឹងបញ្ហាសិទ្ធិឯកជនវិញ អ្នកជំនាញដដែលបញ្ជាក់ថា វាជាការឯកភាពគ្នារវាងអ្នកប្រើប្រាស់និងរដ្ឋ ដោយម្ចាស់រថយន្តអាចប្រើឈ្មោះពិត ឬក៏ចង់ប្រើឈ្មោះពិសេសណាមួយដែលខ្លួនពេញចិត្ត។ ប៉ុន្តែតម្លៃស្លាកលេខពិសេសនេះក៏កើនឡើងទៅតាមនោះដែរ៕
RFI
