IMF៖ «សេដ្ឋកិច្ចកម្ពុជាកើនឡើងខ្ពស់ជាងគេ នៅក្នុងតំបន់អាស៊ាន»
IMF៖ «សេដ្ឋកិច្ចកម្ពុជាកើនឡើងខ្ពស់ជាងគេ នៅក្នុងតំបន់អាស៊ាន»
IMF៖ «សេដ្ឋកិច្ចកម្ពុជាកើនឡើងខ្ពស់ជាងគេ នៅក្នុងតំបន់អាស៊ាន»
សេដ្ឋកិច្ចកម្ពុជា ត្រូវបានព្យាករថានឹងមានកំណើនខ្ពស់បំផុតនៅក្នុងតំបន់អាស៊ាន ទោះបីជាប្រទេសនេះកំពុងប្រឈមនឹងបញ្ហាមួយចំនួនក៏ដោយ។ នេះបើយោងតាមរបាយការណ៍ស្តីពីចក្ខុវិស័យសេដ្ឋកិច្ចប្រចាំតំបន់ឆ្នាំ ២០១៩ របស់មូលនិធិរូបិយវត្ថុអន្តរជាតិ (IMF)។ របាយការណ៍ចេញផ្សាយកាលពីថ្ងៃទី ២២ ខែតុលាបានព្យាករថា កំណើនសេដ្ឋកិច្ចកម្ពុជារក្សាបានភាពខ្លាំងក្នុងអត្រា ៧ ភាគរយក្នុងឆ្នាំ ២០១៩ មុនពេលការធ្លាក់ចុះបន្តិចវិញមកនៅត្រឹម ៦,៨ ភាគរយក្នុងឆ្នាំ ២០២០។
កំណើននេះខ្លាំងជាងប្រទេសទាំងអស់របស់សមាជិកអាស៊ានដោយសេដ្ឋកិច្ចរបស់វៀតណាមត្រូវបានព្យាករថានឹងកើនឡើង ៦,៥ ភាគរយក្នុងឆ្នាំ ២០១៩ និងឆ្នាំ ២០២០ ធ្លាក់ចុះពី ៧,១ ភាគរយពីឆ្នាំ ២០១៨។
លោក Hiroshi SUZUKI អគ្គនាយក និងជាប្រធានសេដ្ឋវិទូនៅវិទ្យាសា្ថនស្រាវជ្រាវពាណិជ្ជកម្មសម្រាប់កម្ពុជាប្រាប់ភ្នំពេញប៉ុស្ដិ៍តាមអ៊ីមែលកាលពីថ្ងៃពុធថា បញ្ហាប្រឈមខាងក្រៅផ្ដល់ឲ្យកម្ពុជាទាំងគុណសម្បត្តិ និងគុណវិបត្តិ។
លោកថ្លែងថា៖ «សង្គ្រាមពាណិជ្ជកម្មរវាងអាមេរិក និងចិននឹងផ្ដល់ផលប៉ះពាល់អវិជ្ជមានតិចតួចដល់សេដ្ឋកិច្ចកម្ពុជា»។ លោកបន្តថា៖ «លើសពីនេះទៀតដោយសារសង្គ្រាមពាណិជ្ជកម្មនេះកម្ពុជានៅពេលនេះគឺជាបេក្ខជនមួយក្នុងចំណោមបេក្ខជនដ៏សំខាន់បំផុតសម្រាប់ក្រុមហ៊ុនរបស់ប្រទេសចិនជាច្រើនក្នុងការផ្លាស់ប្តូររោងចក្ររបស់ពួកគេពីប្រទេសចិន»។
របាយការណ៍នេះបង្ហាញថា ប្រទេសឥណ្ឌូណេស៊ីដែលមានទំហំសេដ្ឋកិច្ចធំជាងគេក្នុងតំបន់អាស៊ានត្រូវបានព្យាករថានឹងកើនឡើង ៥ ភាគរយក្នុងឆ្នាំ ២០១៩ និង ៥,១ ភាគរយក្នុងឆ្នាំ ២០២០ ខណៈកំណើនសេដ្ឋកិច្ចរបស់ប្រទេសថៃត្រូវបានរំពឹងថានឹងកើនឡើង ២,៩ និង ៣ ភាគរយ។
ប្រទេស ម៉ាឡេស៊ី ត្រូវបានព្យាករថា នឹងកើនឡើង ៤,៥ ភាគរយ និង ៤,៤ ភាគរយ ប្រទេស មីយ៉ាន់ម៉ា នឹងកើនឡើង ៦,២ ភាគរយ និង ៦,៣ ភាគរយ ខណៈសេដ្ឋកិច្ចប្រទេស ឡាវ ត្រូវបានប៉ាន់ប្រមាណថា នឹងកើនឡើង ៦,៤ ភាគរយ និង ៦,៥ ភាគរយ ហើយប្រទេស ហ្វីលីពីន នឹងកើនឡើង ៥,៧ ភាគរយ និង ៦,២ ភាគរយ។ សេដ្ឋកិច្ចរបស់ប្រទេស ប្រុយណេ ត្រូវបានប៉ាន់ប្រមាណថានឹងកើនឡើង ១,៨ ភាគរយក្នុងឆ្នាំ ២០១៩ និង ៤,៧ ភាគរយ ក្នុងឆ្នាំ ២០២០។
ប្រទេស សិង្ហបុរី គឺជាប្រទេសអាស៊ានតែមួយគត់ដែល IMF បានដាក់បញ្ចូលថាជាប្រទេសអភិវឌ្ឍន៍ ហើយកំណើនសេដ្ឋកិច្ចរបស់ប្រទេសត្រូវបានព្យាករថា នឹងថមថយមកនៅត្រឹម ០,៥ ក្នុងឆ្នាំ ២០១៩ ហើយកើនឡើងដល់ ១ ភាគរយវិញ ក្នុងឆ្នាំ ២០២០ ធៀបនឹង ៣,១ ភាគរយ ដែលសម្រេចបាននៅឆ្នាំ ២០១៨។
លោក Suzuki បានឲ្យដឹងថា បញ្ហា EBA មានសារៈសំខាន់ខ្លាំងសម្រាប់សេដ្ឋកិច្ចកម្ពុជា ហើយបើគ្មានវាកម្ពុជានឹងពិបាកក្នុងការប្រកួតប្រជែងផ្នែកពាណិជ្ជកម្ម។ លោកថ្លែងថា៖ «ឧស្សាហកម្មកាត់ដេររបស់កម្ពុជាមិនអាចឈ្នះការប្រកួតប្រជែងផ្នែកពាណិជ្ជកម្មនៅសហភាពអឺរ៉ុប (EU) បានទេ។ វាគឺដោយសារតែមានដៃគូប្រកួតប្រជែងខ្លាំងៗជាច្រើនដូចជា វៀតណាម និងមីយ៉ាន់ម៉ាជាដើម»។
លោក Jarkko Turunen សេដ្ឋវិទូជាន់ខ្ពស់របស់ IMF បានថ្លែងកាលពីសប្តាហ៍មុនថា រដ្ឋាភិបាលកម្ពុជាកំពុងសកម្មក្នុងការដោះស្រាយបញ្ហាប្រឈមផ្នែកសេដ្ឋកិច្ច និងភាពមិនច្បាស់លាស់តាមរយៈផែនការកែទម្រង់រចនាសម្ព័ន្ធក្នុងគោលបំណងកែលម្អសមត្ថភាពប្រកួតប្រជែង និងការធ្វើពិពិធកម្ម។
របាយការណ៍បច្ចុប្បន្នភាពសេដ្ឋកិច្ចអាស៊ីខាងកើត និងប៉ាស៊ីហ្វិករបស់ធនាគារពិភពលោកដែលបានចេញផ្សាយកាលពីដើមខែនេះបានឲ្យដឹងថា ចក្ខុវិស័យសេដ្ឋកិច្ចរបស់កម្ពុជាកំពុងប្រឈមនឹងបញ្ហាមួយចំនួនរួមទាំងកំណើនឥណទានដល់វិស័យសំណង់ និងវិស័យអចលនទ្រព្យផងដែរ។
លោក Suzuki បានឲ្យដឹងថា នៅពេលនេះអចលនទ្រព្យ និងសំណង់គឺជាក្បាលម៉ាស៊ីនមួយនៃសេដ្ឋកិច្ចកម្ពុជា។
លោកបានថ្លែងថា៖ «ទោះបីជាយ៉ាងណាបើការវិនិយោគពីប្រទេសចិនអាចត្រូវរងផលប៉ះពាល់ដោយការធ្លាក់ចុះសេដ្ឋកិច្ចនៅក្នុងប្រទេសចិននោះ ការកើនឡើងនេះអាចនឹងត្រូវបញ្ចប់»៕
អត្ថបទ៖ ភ្នំពេញប៉ុស្តិ៍
