លោក ទៀ បាញ់ ចូលជួបសំដែងការគួរសម ជាមួយលោកប្រធានាធិបតីនៃសាធារណរដ្ឋប្រជាមានិតចិន
លោក ទៀ បាញ់ ចូលជួបសំដែងការគួរសម ជាមួយលោកប្រធានាធិបតីនៃសាធារណរដ្ឋប្រជាមានិតចិនក្នុងឱកាសអញ្ជើញដឹកនាំគណៈប្រតិភូក្រសួងការពារជាតិកម្ពុជា ចូលរួមក្នុងពិធីបើកការប្រកួតកីឡា យោធាពិភព លោកលើកទី ៧ ថ្ងៃទី១៨ ខែតុលា ឆ្នាំ២០១៩ នៅទីក្រុងអ៊ូហាន ខេត្តហ៊ូបេ សាធារណរដ្ឋប្រជាមានិតចិន លោកឧបនាយករដ្ឋមន្ត្រី ទៀ បាញ់ រដ្ឋមន្ត្រីក្រសួងការពារជាតិ អមតំណើរ ដោយនាយឧត្តមសេនីយ៍ ណឹម សុវត្ថិ ទីប្រឹក្សាពិសេស និងជាអគ្គនាយក នៃអគ្គនាយកដ្ឋាននយោបាយ និងកិច្ចការបរទេស ក្រសួងការពារជាតិ រួមជាមួយថ្នាក់ដឹកនាំស្ថាប័នការពារជាតិ មកពីបណ្តាប្រទេសនានាដ៏ទៃទៀត បានចូលជួបសំដែងការគួរសម ជាមួយលោក ស៊ី ជីនពីង អគ្គលេខាគណបក្សកុម្មុយនីស្តចិន ប្រធានាធិបតីនៃសាធារណរដ្ឋប្រជាមានិតចិន និង ជាប្រធានគណៈកម្មាធិការយោធាមជ្ឈឹម។
នៅក្នុងជំនួបនោះ លោក ទៀ បាញ់ តាងនាមកងយោធពលខេមរភូមិន្ទ និង ថ្នាក់ដឹកនាំនៅក្នុងវិស័យការពារជាតិ ស្ថាប័ន កងទ័ពនៃបណ្តាប្រទេសទាំងអស់ បានសម្តែងការអបអរសារទ ចំពោះការប្រព្រឹត្តទៅយ៉ាងជោគជ័យ ក្នុងព្រឹត្តិការណ៍ កីឡាយោធាពិភពលោក លើក ទី៧ នៅ ក្នុងទីក្រុង អ៊ូហ៊ាន នៃសាធារណរដ្ឋប្រជាមានិតចិន ប្រកបដោយអត្ថន័យ យ៉ាងវិសេសវិសាលសម្រាប់ប្រវត្តិសាស្រ្តមនុស្សជាតិ និង កងទ័ពទាំងអស់នៅលើសកលលោក។ លោក ទៀ បាញ់ បានបញ្ជាក់ថា៖ ព្រឹត្តិការណ៍កីឡាយោធាពិភព លោកនេះពិតជាបានដើរតួយ៉ាងសំខាន់នៅក្នុងបុព្វហេតុស្វែងរក និងធានាសន្តិភាព ស្ថិរភាព ទាំងក្នុងតំបន់ និង លើ ពិភពលោក ក្រោមខ្លឹមសារកីឡានាំមកនូវសន្តិភាព កីឡានាំ មកនូវមិត្តភាព និងជាធាតុមួយយ៉ាងសំខាន់ក្នុងការបណ្តុះ ឆន្ទៈស្មារតី ស្រឡាញ់នូវសន្តិភាពសម្រាប់វិស័យអប់រំក្នុង កងទ័ព និងជាវេទិកាបើកចំហឲ្យកងទ័ពទាំងអស់នៅលើ ពិភពលោក មានឱកាសបានប្រាស្រ័យទាក់ទង ឈ្វេងយល់ពីគ្នាទៅវិញទៅមក រួមចំណែកពង្រឹង និងពង្រីកមិត្តភាព កិច្ចសហប្រតិបត្តិការ ក្រោមឆ័ត្រនៃបេសកកម្មរក្សាសន្តិភាព ដែលមានតម្លៃយ៉ាងធំធេងក្នុងប្រវត្តិសាស្រ្តមនុស្សជាតិ។
លោក ទៀ បាញ់ បានបញ្ជាក់បន្ថែមថា៖ ព្រឹត្តិការណ៍កីឡាយោធាពិភពលោក លើកទី៧ បានបង្ហាញឲ្យឃើញអំពីតួនាទីដ៏ស័ក្តិសិទ្ធ របស់កងទ័ពរំដោះប្រជាជនចិន ក្នុងនាមជា ម្ចាស់ផ្ទះរៀបចំព្រឹត្តិការណ៍លើកនេះកាន់តែបង្ហាញឲ្យឃើញច្បាស់នូវសក្ខីកម្ម នៃតួនាទីដ៏ចម្បង និងធំធេងយ៉ាងសំខាន់ បំផុត មិនអាចខ្វះបានរបស់សាធារណរដ្ឋប្រជាមានិតចិន ក្នុង បុព្វហេតុកសាង និងថែរក្សាសន្តិភាព ស្ថិរភាព និងការរីក ចម្រើនរបស់ ពិភពលោក និងមនុស្សជាតិ។ លោក ទៀ បាញ់ បានសំដែងសេចក្តីសង្ឃឹម និងជឿជាក់យ៉ាងមុតមាំថា ៖ តាមរយៈការចូលរួមព្រឹត្តិការណ៍ កីឡាយោធាពិភពលោក លើក ទី៧ នាពេលនេះនឹងក្លាយទៅជាឱកាស ដ៏ប្រសើរមួយ សម្រាប់ប្រតិភូចូលរួម ប្រតិភូអង្កេតការណ៍ មកពីបណ្តា ប្រទេសទាំងអស់បានរៀនសូត្រឈ្វេងយល់ឲ្យកាន់តែស៊ីជម្រៅបន្ថែមទៀត អំពីបទពិសោធន៍ ក៏ដូចជាចំណេះដឹងថ្មីៗ ក្នុងការរៀបចំព្រឹត្តិការណ៍កីឡាធំៗលំដាប់ពិភពលោក ដូចជាព្រឹត្តិការណ៍ដែលកំពុងដំណើរការនាពេលនេះ។
លោកប្រធានាធិបតី ស៊ី ជីងពីន បានមានប្រសាសន៍ថា៖ ថ្ងៃនេះយើងជួបជុំរៀបចំព្រឹត្តិការណ៍យោធាពិភពលោក លើក ទី៧ នៅក្នុងទីក្រុងអ៊ូហ៊ាន មានកងទ័ពប្រមាណជាងមួយម៉ឺន នាក់ មកពីបណ្តាប្រទេសជាង ១០០ប្រទេសចូលរួម។
លោកបានបញ្ជាក់ថា៖ កីឡា គឺជាអត្តសញ្ញាណដ៏សំខាន់ មួយសម្រាប់ការអភិវឌ្ឍ និងការរីកចម្រើន នៃសង្គមមនុស្សជាតិ ហើយក៏ជាផ្នែកមួយយ៉ាងសំខាន់ នៃទំនាក់ទំនងរវាងមនុស្ស និងមនុស្ស។ កងទ័ព និងកីឡា គឺមានទំនាក់ទំនងជាធម្មជាតិ ដូចជាកីឡាបាញ់កាំភ្លើង កីឡារត់ម៉ារ៉ាតុង និងវិញ្ញាសារកីឡាផ្សេងៗទៀត គឺសុទ្ធតែមានប្រភពពីយោធា។ កីឡាយោធាមានតួនាទីយ៉ាងសំខាន់ក្នុងការពង្រឹងកាយសម្បទាកងទ័ព ពង្រឹងឆន្ទៈ និងសាមគ្គីភាព បង្ហាញពីមុខមាត់របស់កងទ័ព ក៏ដូចជាជម្រុញទំនាក់ទំនងរវាងកងទ័ព និង កងទ័ពដែលមានការទទួលស្គាល់ទូទាំងប្រទេស នៅលើពិភពលោក។
សូមបញ្ជាក់ថា៖ ព្រឹត្តិការណ៍កីឡាយោធាពិភពលោកលើកទី៧ បានប្រព្រឹត្តទៅក្រោមប្រធានបទ “រួមគ្នាចែករំលែកនូវមិត្តភាព រួមគ្នាកសាងនូវសន្តិភាព” ៕
