សេចក្តីថ្លែងការណ៍អំពីគំនិតផ្តួចផ្តើម «ខ្សែក្រវាត់ និងផ្លូវ» មិនផ្តល់ផលប៉ះពាល់អវិជ្ជមានដល់ប្រទេសណាមួយឡើយ

ដោយ៖ លី វិទ្យា​​ | ថ្ងៃសុក្រ ទី៣ ខែឧសភា ឆ្នាំ២០១៩​ | ឯកសារ | 0 |
សេចក្តីថ្លែងការណ៍អំពីគំនិតផ្តួចផ្តើម «ខ្សែក្រវាត់ និងផ្លូវ» មិនផ្តល់ផលប៉ះពាល់អវិជ្ជមានដល់ប្រទេសណាមួយឡើយ សេចក្តីថ្លែងការណ៍អំពីគំនិតផ្តួចផ្តើម «ខ្សែក្រវាត់ និងផ្លូវ» មិនផ្តល់ផលប៉ះពាល់អវិជ្ជមានដល់ប្រទេសណាមួយឡើយ

អង្គភាពអ្នកនាំពាក្យរាជរដ្ឋាភិបាលកម្ពុជា ដែលដឹកនាំដោយលោក ផៃ ស៊ីផាន នៅថ្ងៃទី២ ខែឧសភា ឆ្នាំ២០១៩ បានចេញសេចក្តីថ្លែងការណ៍អះអាងថា គំនិតផ្តួចផ្តើម «ខ្សែក្រវាត់ និងផ្លូវ» របស់មហាយក្សចិន នឹងមិនផ្តល់នូវផលប៉ះពាល់ជាអវិជ្ជមាន ដល់ប្រទេសណាមួយឡើយ។ នេះបើយោងតាមសេចក្តីថ្លែងការណ៍ដែលទទួលបាន។

យោងតាមសេចក្តីថ្លែងការណ៍នេះ អង្គភាពអ្នកនាំពាក្យរាជរដ្ឋាភិបាល បានជម្រាបថា ព័ត៌មានប្រឌិតបំពុលសាធារណៈពាក់ព័ន្ធនឹងភាពជាដៃគូរបស់កម្ពុជា ចូលរួមជាមួយគំនិតផ្តួចផ្តើម «ខ្សែក្រវាត់ និងផ្លូវ» របស់ប្រធានាធិបតីចិន លោក Xi Jinping គឺបានលើកឡើងនៅក្នុងទិសដៅ និងបំណងនៃការវាយតម្លៃបំភ្លៃ ធ្វើឱ្យសាធារណជនមានការយល់ច្រឡំ និងវិនិច្ឆ័យខុស។

អង្គភាពអ្នកនាំពាក្យ បានជម្រាបជូនផងដែរ លោកនាយករដ្ឋមន្រ្ដី ហ៊ុន សែន បានបញ្ជាក់យ៉ាងច្បាស់លាស់ជាផ្លូវការថា ជំនួយនៅក្នុងបរិបទនេះ រាជរដ្ឋាភិបាលកម្ពុជាក្រោមការដឹកនាំដ៏វាងវៃ និងប្រសិទ្ធភាពរបស់លោកនាយករដ្ឋមន្រ្ដី ក៏បានយល់ឃើញយ៉ាងច្បាស់ទាក់ទងទៅនឹងគោលនយោបាយ «ខ្សែក្រវាត់ និងផ្លូវ» តាមរយៈការតភ្ជាប់លើគ្រប់វិស័យ។ យុទ្ធសាស្ត្រ «ខ្សែក្រវាត់ និងផ្លូវ» នេះ ស្របគ្នានឹងយុទ្ធសាស្ត្រចតុកោណរបស់រាជរដ្ឋាភិបាលកម្ពុជា ដែលមានទិសដៅនៅក្នុងការតភ្ជាប់លើគ្រប់ផ្នែក និងគ្រប់វិស័យទាំងអស់ ទាំងក្នុងប្រទេស ក្នុងតំបន់ ក៏ដូចជាអន្តរជាតិក្នុងគោលការណ៍សមាហរណកម្ម។

លោកនាយករដ្ឋមន្រ្ដី ហ៊ុន សែន បានលើកឡើងយ៉ាងច្បាស់ថា សម្រាប់កម្ពុជា គំនិតផ្តួចផ្តើម «ខ្សែក្រវាត់ និងផ្លូវ» បានផ្តល់ផលប្រយោជន៍យ៉ាងច្រើនដល់ការអភិវឌ្ឍសង្គម វប្បធម៌ ខុសប្លែកពីទស្សនៈមួយចំនួន ដែលយល់ថា គំនិតផ្តួចផ្តើមនេះ នឹងបណ្តាលឱ្យប្រទេសមួយចំនួនជាប់អន្ទាក់បំណុល។

ប្រទេសកម្ពុជាមិនត្រឹមតែអាចចរចា និងរៀបចំគម្រោងនេះ ដោយឈរលើស្មារតីនៃការការពារផលប្រយោជន៍ជូនជាតិ និងប្រជាជនរបស់ខ្លួនដោយស្មើភាព និងស្មើសិទ្ធិប៉ុណ្ណោះទេ ប៉ុន្តែថែមទាំងសម្រេចបាននូវការធ្វើវិស្វកម្មហិរញ្ញវត្ថុមួយ ដែលមិនបង្កើតបន្ទុកហិរញ្ញវត្ថុ និងបំណុលសាធារណៈដល់រដ្ឋថែមទៀតផង។

លោក ផៃ ស៊ីផាន បានថ្លែងបញ្ជាក់ក្នុងសេចក្តីថ្លែងការណ៍ថា៖ «ដោយឈរលើស្មារតីខិតខំរួមគ្នា ចែករំលែកផលប្រយោជន៍ជាមួយគ្នា និងទទួលបានឱកាសដូចគ្នា ខ្ញុំយល់ថា គំនិតផ្តួចផ្តើម «ខ្សែក្រវាត់ និងផ្លូវ» នឹងមិនផ្តល់នូវផលប៉ះពាល់ជាអវិជ្ជមានដល់ប្រទេសណាមួយឡើយ ក្នុងនាមជាប្រទេសមានអធិបតេយ្យ យើងមានសិទ្ធិ និងជម្រើសក្នុងការសម្រេចយកតែអ្វីដែលយើងចង់បាន និងប្រភេទហិរញ្ញប្បទានណាដែលយើងត្រូវការ ហើយអនុវត្តគម្រោងទាំងនោះ ដោយឈរលើគោលការណ៍នៃការពង្រឹងភាពជាម្ចាស់ និងភាពជាអ្នកដឹកនាំលើការអភិវឌ្ឍជាតិរបស់ខ្លួន»

អង្គភាពអ្នកនាំពាក្យ ក៏បានឆ្លៀតឱកាសជម្រាបជូន និងបញ្ជាក់បន្ថែមទៀតថា ឥរិយាបថ និងគោលការណ៍ រក្សា ការពារ ឯករាជ្យ និងអធិបតេយ្យភាព ជាមួយនឹងការអភិវឌ្ឍប្រកបដោយចីរភាព និងកិត្តិយសនោះ គឺរាល់កម្ចីទាំងអស់ គឺស្ថិតនៅក្នុងកិច្ចរក្សាដាច់ខាតនូវការអភិវឌ្ឍប្រកបដោយ «ចីរភាព និងហានិភ័យកម្រិតទាប» ដែលជាគោលមូលដ្ឋានគ្រឹះរបស់រាជរដ្ឋាភិបាល។ កម្ចីទាំងអស់នោះ គឺស្ថិតនៅក្នុងអនុបាតតម្លៃបច្ចុប្បន្ននៃបំណុលសាធារណៈក្រៅប្រទេស ធៀបនឹងផលិតផលក្នុងស្រុកសរុបមានត្រឹមកម្រិត ២១,៤% ធៀបនឹងអនុបាតគោល ៤០% (មានបង្ហាញក្នុងតារាងទី២.ក. នៃព្រឹត្តិបត្រស្ថិតិបំណុលសាធារណៈកម្ពុជាលេខ៧ ទំព័រទី១២)។

អង្គភាពអ្នកនាំពាក្យ សាជាថ្មីម្តងទៀត បានវាយតម្លៃខ្ពស់ គោរព និងថ្លែងអំណរគុណយ៉ាងអនេក ក្នុងការសម្រេចចិត្តបោះឆ្នោតជ្រើសរើស លោកនាយករដ្ឋមន្រ្ដី ហ៊ុន សែន ជានាយករដ្ឋមន្ត្រីអាណត្តិទី៦ និងបន្តបន្ទាប់ទៀត ជូនដល់គណបក្សប្រជាជនកម្ពុជា។

ជាមួយជម្រើសរបស់ប្រជាពលរដ្ឋក្នុងការបោះឆ្នោតជូនលោកនាយករដ្ឋមន្រ្ដី ហ៊ុន សែន មិនត្រឹមតែការសម្រេចចិត្តដ៏ត្រឹមត្រូវបំផុត ក្នុងកិច្ចថែរក្សាសន្តិភាពប៉ុណ្ណោះទេ ក៏ជាជម្រើសដើម្បីកិត្តិយស និងមុខមាត់កម្ពុជា ប្រកបដោយវិបុលភាព ស្មើមុខស្មើមាត់ ដូចជាប្រជាជាតិនានានៅក្នុងពិភពលោក ៕

បញ្ចេញមតិ
អត្ថបទទាក់ទង