ស៊ន សៀវម៉ី នឹងប្រកួតនៅព្រឹកស្អែកជាមួយកីឡាការិនីស្រីលង្កា ក្នុងព្រឹត្តិការណ៍កីឡាទ្វីបអាស៊ី
ស៊ន សៀវម៉ី នឹងប្រកួតនៅព្រឹកស្អែកជាមួយកីឡាការិនីស្រីលង្កា ក្នុងព្រឹត្តិការណ៍កីឡាទ្វីបអាស៊ីកីឡាការិនីតេក្វាន់ដូក្តីសង្ឃឹមកម្ពុជា ស៊ន សៀវម៉ី នឹងប្រកួតវេលាម៉ោង៩ព្រឹក ថ្ងៃទី២១ សីហាស្អែកនេះជាមួយនឹងកីឡាការិនីស្រីលង្កា Ranuri ក្នុងព្រឹត្តិការណ៍កីឡាទ្វីបអាស៊ីនៅឥណ្ឌូណេស៊ី។
ប្រវត្តិសង្ខេបកីឡាការិនីស្រីលង្កា Ranuri
- កីឡាការិនីស្រីលង្កា Ranuri Wickramasinghe អាយុ២៣ឆ្នាំដែលមានកម្ពស់១.៧៤ម៉ែត្រ និងទម្ងន់៧២គីឡូក្រាម។ នេះបើតាមទិន្នន័យដែលគណៈកម្មការរៀបចំការប្រកួតកីឡាទ្វីបអាស៊ីឆ្នាំ២០១៨បានបង្ហាញ។
- Ranuri មិនសូវមានបទពិសោធច្រើនឡើយក្នុងការប្រកួតកម្រិតអន្តរជាតិ។ ក្នុងការប្រកួតជើងឯកតេក្វាន់ដូអាស៊ីនៅប្រទេសវៀតណាម ឆ្នាំ២០១៨ កីឡាការិនីរូបនេះបានចាញ់ក្នុងជុំដំបូងពោលគឺវគ្គ៣២នាក់តែម្តង។
- ដោយឡែកនិយាយពីចំណាត់ថ្នាក់ពិភពលោកវិញ គិតត្រឹមថ្ងៃទី១ ខែកក្កដា ឆ្នាំ២០១៨កន្លងទៅ កីឡាការិនីស្រីលង្កានេះស្ថិតនៅចំណាត់ថ្នាក់លេខ១២០ក្នុងវិញ្ញាសាទម្ងន់ +៧៣គីឡូក្រាម។ Ranuri មានចំណាត់ថ្នាក់ពិភពលោកតែ១វិញ្ញាសានេះទេ។
ប្រវត្តិសង្ខេប ស៊ន សៀវម៉ី
- ចំណែកកីឡាការិនីកម្ពុជា ស៊ន សៀវម៉ី អាយុ២១ឆ្នាំដែលមានកម្ពស់១.៨៣ម៉ែត្រ និងទម្ងន់៧៣គីឡូក្រាម។ ប្រការនេះបង្ហាញឲ្យឃើញថា ស៊ន សៀវម៉ី ហាក់មានប្រៀបខាងកម្ពស់ ខណៈវីរនារីកម្ពុជានេះមានលក្ខណៈពិសេសទាត់ខ្ពស់បានច្រើនតង់។
- សៀវម៉ី ចាប់លេងតេក្វាន់ដូឆ្នាំ២០១៤ និងក្លាយជាកីឡាការិនីកម្ពុជាតែម្នាក់គត់ឈ្នះមេដាយមាសអាស៊ីកាលពីឆ្នាំ២០១៤។ កីឡាការិនីកម្ពុជាក៏ជាក៏ជាកីឡាការិនីទី១ដែលឈ្នះសិទ្ធិពេញលេញទៅកីឡាអូឡាំពិកនៅប្រេស៊ីល និងធ្លាប់ប្រកួតលើកអូឡាំពិកលើកដំបូងឆ្នាំ២០១២នៅអង់គ្លេស ព្រមទាំងឈ្នះមេដាយមាស២លើកកីឡាស៊ីហ្គេម។
- គិតត្រឹមថ្ងៃទី១ ខែកក្កដា ២០១៨ ស៊ន សៀវម៉ី មានចំណាត់ថ្នាក់ពិភពលោករហូតដល់៣វិញ្ញាសាផ្សេងគ្នាគឺចំណាត់ថ្នាក់ទី២៦ក្នុងវិញ្ញាសាទម្ងន់ -៧៣គីឡូក្រាម លេខរៀងទី៩៦ក្នុងវិញ្ញាសាទម្ងន់ +៧៣គីឡូក្រាម និងលេខរៀងទី២៩៣ក្នុងវិញ្ញាសាទម្ងន់ -៦៧គីឡូក្រាម។
ស៊ន សៀវម៉ី និង Ranuri ត្រូវប្រកួតក្នុុងវិញ្ញាសាទម្ងន់ -៦៧គីឡូក្រាម។ សម្រាប់វិញ្ញាសានេះមានកីឡាការិនី១៦នាក់ ដូច្នេះកីឡាការិនីដែលឈ្នះនឹងបន្តឡើងវគ្គ៨នាក់ចុងក្រោយ។
ការប្រកួតវគ្គ១៦នាក់
- ស៊ន សៀវម៉ី (កម្ពុជា) vs Ranuri (ស្រីលង្កា)
- Tshering Lham (ប៊ូតាន់) vs Khalim Mokhru (តាហ្ស៊ីគីស្ថាន)
- Ma Tinghsia (ឆាយនីសតៃបិ) vs Barua Rodoli (ឥណ្ឌា)
- Rawal Nisha (នេប៉ាល់) vs Gao Pan (ចិន)
- Zahra (អ៊ីរ៉ង់) vs Osipova Svetlana (អ៊ូបេគីស្ថាន)
- Rizki Delva (ឥណ្ឌូណេស៊ី) vs Lam Thi Ha Thanh (វៀតណាម)
- Alora Kirstie Elaine (ហ្វីលីពីន) vs Deniz Cansel (កាហ្សាក់ស្ថាន)
នៅព្រឹកស្អែកនេះដែរកីឡាការិនីខ្មែរ-អាមេរិក Casandre Nico Tubbs ប៉ះកីឡាការិនីវៀតណាម Pham Thi Thu Hien ក្នុងប្រភេទវិញ្ញាសា៥៧គីឡូក្រាម៕