ឥណ្ឌូណេស៊ីមកស្វែងយល់ និងដកស្រង់ បទពិសោធន៍ ពីប្រព័ន្ធកាមេរ៉ាសុវត្ថិភាពក្នុងរាជធានីភ្នំពេញ

ឥណ្ឌូណេស៊ីមកស្វែងយល់ និងដកស្រង់ បទពិសោធន៍ ពីប្រព័ន្ធកាមេរ៉ាសុវត្ថិភាពក្នុងរាជធានីភ្នំពេញ

ប៉ូលីសប្រទេសឥណ្ឌូណេស៊ីដឹកនាំដោយ ឧត្តមសេនីយ Chry shranda Dwilaksana​ ប្រធាននាយកដ្ឋាននរគបាលចរាចរឥណ្ឌូណេស៊ី ថ្ងៃទី១៤សីហានេះ បានដឹកនាំមន្ត្រីរបស់ខ្លួនមក រាជធានីភ្នំពេញ ដើម្បីស្វែងយល់និងដកបទពិសោធពីប្រព័ន្ធកាំមេរ៉ាសុវត្ថិភាពរបស់រាជធានីភ្នំពេញ។

លោកមាន ចាន់យ៉ាដា អភិបាលរងរាជធានីភ្នំពេញបានអោយដឹងថា ប៉ូលីសប្រទេសឥណ្ឌូណេស៊ី ដែលបានមកបំពេញទស្សនៈកិច្ច នៅរាជធានីភ្នំពេញនេះ គឺមានគោលបំណងស្វែងយល់និងដកបទពិសោធពីប្រព័ន្ធកាំមេរ៉ាសុវត្ថិភាពរបស់រាជធានីភ្នំពេញ ដោយសាររាជធានីភ្នំពេញ ការគ្រប់គ្រងចរាចរណ៍មានលក្ខណៈល្អប្រសើរដែលអាចទទួលយក បាន។ បើទោះបីហេតុការណ៍ គ្រោះថ្នាក់ចារចរនៅតែបន្តកើតមានក៏ដោយ ដោយសារតែកម្ពុជាជាប្រទេសកំពុងតែធ្វើការអភិវឌ្ឍ តែការអនុវត្តលើការងារគ្រប់គ្រងចរាចរនេះបានល្អ ជាពិសេសការគ្រប់គ្រងប្រព័ន្ធកាំមេរ៉ាសុវត្ថិភាពរបស់រាជធានីភ្នំពេញ។

លោកមាន ចាន់យ៉ាដា បានបញ្ជាក់ថា ប្រព័ន្ធកាំមេរ៉ាសុវត្ថិភាពរបស់រាជធានីភ្នំពេញមានចំនួនជាង៦០០គ្រឿង ដោយទើបតែដំណើរការបានជាងមួយឆ្នាំប៉ុណ្ណោះ ប៉ុន្តែការងារនេះយើងធ្វើបានល្អដែលអាចទទូលយកបាន។

ចំណែកឧត្តមសេនីយត្រី ចេវ ហាក់ ស្នងការរងរាជធានីភ្នំពេញ បានអោយដឹងថា នៅក្នុងរាជធានីភ្នំពេញមានផ្លូវប្រវែង១៨៨៣គីឡូម៉ែត្រ មានប្រជាពលរដ្ឋរស់នៅចំនួន១លាន៦សែននាក់ តែបើគិតពីប្រជាពលរដ្ឋដែលមកស្នាក់នៅនិងរៀនសូត្រថែមទៀតនោះចំនួនប្រជាពលេដ្ឋដែលរស់នៅភ្នំពេញបានកើនឡើងរហូតដល់ជាង២លាននាក់ ។សម្រាប់ស្ថិតិមធ្យោបាយយាន្តយន្តវិញ នៅឆ្នាំ២០១៧ មានរថយន្តចំនួន៤៦ម៉ឺនគ្រឿង ម៉ូតូ១លាន៦សែនគ្រឿង។

សម្រាប់៨ខែឆ្នាំ២០១៨នេះ គ្រោះថ្នាក់ចរាចរបានកើតមានឡើងចំនួន៤១៤ករណីបណ្តាលអោយមានមនុស្ស១៦៦នាក់បានស្លាប់ របួសធ្ងន់ចំនួន៤២១នាក់ របួសស្រាលចំនួន១១៩នាក់ ។ចំនួននេះបើគិតជាធម្យមភាគគឺក្នុងរយៈពេល៣ថ្ងៃមានមនុស្សស្លាប់២នាក់។

ឧត្តមសេនីយត្រី ចេវ ហាក់ បានបញ្ជាក់ថា ដោយសារមានបញ្ហាប្រឈមគ្រោះថ្នាក់ចរាចរណ៏នេះហើយទើបរដ្ឋបាលរាជធានីភ្នំពេញបង្កើតអោយមានប្រព័ន្ធកាំមេរ៉ាសុវត្ថិភាពចរាចរណ៏ ដើម្បីគ្រប់គ្រងបញ្ហាចរាចរនិងទប់ស្កាត់បទល្មើសផ្សេងផងដែរ ។

ពាក់ព័ន្ធនឹងបញ្ហានេះ លោកចេវ ហាក់ក៏បានស្នើសុំអោយប៉ូលីសឥណ្ឌូណេស៊ីជួយបណ្តុះបណ្តាលធនធានមនុស្សផងដែរ ដោយសារតែប្រព័ន្ធកាំមេរ៉ាសុវត្ថិភាពនេះវាអាចជួយការងារច្រើនលើបញ្ហាសន្តិសុខ៕