ប្រធានក្រុមប្រឹក្សាភិបាលវេទិកាសម្ព័ន្ធសង្គមស៊ីវិលអញ្ជើញជាគណៈអធិបតីក្នុងពិធីបើកសិក្ខាសាលាស្តីពីសុខភាពផ្លូវភេទ និងសុខភាពបន្តពូជរបស់យុវវ័យ សហការរៀបចំដោយអង្គការខេមរា និងអង្គការផែនការគ្រួសាររបស់ប្រទេសចិន
ប្រធានក្រុមប្រឹក្សាភិបាលវេទិកាសម្ព័ន្ធសង្គមស៊ីវិលអញ្ជើញជាគណៈអធិបតីក្នុងពិធីបើកសិក្ខាសាលាស្តីពីសុខភាពផ្លូវភេទ និងសុខភាពបន្តពូជរបស់យុវវ័យ សហការរៀបចំដោយអង្គការខេមរា និងអង្គការផែនការគ្រួសាររបស់ប្រទេសចិននៅព្រឹកថ្ងៃសុក្រ ទី២៩ ខែមិថុនា ឆ្នាំ២០១៨នេះ លោក កឹមរ័ត្ន វិសិដ្ឋ ប្រធានក្រុមប្រឹក្សាភិបាលនៃវេទិកាសម្ព័ន្ធសង្គមស៊ីវិល (វ.ស.ស.) លោក ហ៊ុយ សារុណ អភិបាលរងខណ្ឌជ្រោយចង្វារ និងលោកស្រី ហុង ភីង ប្រធានអង្គការផែនការគ្រួសាររបស់ប្រទេសចិន បានអញ្ជើញជាគណៈអធិបតីក្នុងពិធីបើកសិក្ខាសាលាស្តីពីសុខភាពផ្លូវភេទ និងសុខភាពបន្តពូជរបស់យុវវ័យ នៅសណ្ឋាគារហ៊ីម៉ាវ៉ារី រាជធានីភ្នំពេញ ដែលត្រូវបានសហការរៀបចំឡើងដោយអង្គការខេមរា និងអង្គការផែនការគ្រួសាររបស់ប្រទេសចិន ដើម្បីផ្តល់ការបណ្តុះបណ្តាលយុវជនបង្គោលចំនួន ៥០រូប មកពីសង្កាត់ទាំង៥ នៃខណ្ឌជ្រោយចង្វារ ឱ្យបានយល់ដឹងចំណេះដឹងមូលដ្ឋានអំពីសុខភាពផ្លូវភេទ និងសុខភាពបន្តពូជរបស់យុវវ័យ។
លោក កឹមរ័ត្ន វិសិដ្ឋ ក៏បានបញ្ជាក់ជូនអង្គសិក្ខាទាំងមូលអំពីតួនាទីរបស់ វ.ស.ស. ដែលជាអ្នកសម្របសម្រួលរវាងអង្គការសង្គមស៊ីវិលកម្ពុជា និងអង្គការសង្គមស៊ីវិលចិន ក្នុងការពង្រឹង និងពង្រីកកិច្ចសហប្រតិបត្តិការ និងភាពជាដៃគូជាមួយគ្រប់ភាគីពាក់ព័ន្ធ ដើម្បីចូលរួមចំណែកដល់ការអភិវឌ្ឍសង្គម សេដ្ឋកិច្ច ឲ្យកាន់តែមានការរីកចម្រើនថែមទៀត។ ជាក់ស្តែង សិក្ខាសាលាដែលបានរៀបចំឡើងនាពេលនេះ គឺជាផ្នែកមួយនៃការអនុវត្តគម្រោងរវាងអង្គការដែលជាដៃគូសហការរបស់ វ.ស.ស. និងអង្គការសង្គមស៊ីវិលចិន ក្រោមកិច្ចសម្របសម្រួលរបស់ វ.ស.ស.៕
