មន្រ្តីនគរបាលជាន់ខ្ពស់៖ ជនមុខសញ្ញាភ្នាក់ងារសម្ងាត់ CIA ទាំង ២ រូបពិតជាមានវត្តមាននៅរាជធានីភ្នំពេញមែន

មន្រ្តីនគរបាលជាន់ខ្ពស់៖ ជនមុខសញ្ញាភ្នាក់ងារសម្ងាត់ CIA ទាំង ២ រូបពិតជាមានវត្តមាននៅរាជធានីភ្នំពេញមែន

មន្រ្តីនគរបាលជាន់ខ្ពស់៖ ជនមុខសញ្ញាភ្នាក់ងារសម្ងាត់ CIA ទាំង ២ រូបពិតជាមានវត្តមាននៅរាជធានីភ្នំពេញមែន

Previous Next

ក្រោយពីទម្លាយព័ត៌មានថា មុខសញ្ញាភ្នាក់ងារសម្ងាត់ CIA ពីររូបគឺលោក មាជ សុវណ្ណារ៉ា និងលោក Mark Gibbel កំពុងមានវត្តមាននៅរាជធានីភ្នំពេញ ដើម្បីបង្កចលាចល នៅពេលប្រកាសសាលក្រម កឹម សុខា, ដើម្បីបញ្ជាក់ការពិតនៅព្រឹកថ្ងៃទី០២ ខែមីនា ឆ្នាំ២០២៣នេះ មន្រ្តីនគរបាលជាន់ខ្ពស់ នៃអគ្គស្នងការដ្ឋាននគរបាលជាតិ បានបញ្ជាក់ប្រាប់បណ្តាញព័ត៌មាន Fresh News បានឲ្យដឹងថា ជនមុខសញ្ញាភ្នាក់ងារសម្ងាត់ CIA ពីររូបពិតជាមានវត្តមាននៅរាជធានីភ្នំពេញ។

សូមអាន លោក មាជ សុវណ្ណារ៉ា និងភ្ញាក់ងារសម្ងាត់ CIA មួយរូបទៀត កំពុងមានវត្តមាននៅកម្ពុជា ដើម្បីបង្កចលាចលនៅពេលតុលាការប្រកាសសាលក្រមលោក កឹម សុខា

មន្រ្តីនគរបាលជាន់ខ្ពស់ បានថ្លែងសង្កាត់ថា «កម្លាំងសមត្ថកិច្ចនឹងបើកការស៊ើបអង្កេតលើករណីនេះ ដើម្បីទប់ស្កាត់ការបង្កចលាចលណាមួយ កើតឡើងដល់សង្គម ហើយទោះបីលោក មាជ សុវណ្ណារ៉ា ខំបកស្រាយយ៉ាងណាក៏ដោយ កម្លាំងសមត្ថកិច្ចមានភស្តុតាងជាច្រើនទៀត ដែលបង្ហាញថាលោកពាក់ព័ន្ធសកម្មភាពចារកម្ម និងវិទ្ធង្សនានយោបាយបំផ្លាញសន្តិសុខជាតិរបស់ប្រទេសកម្ពុជា» ។

មន្រ្តីជាន់ខ្ពស់នគរបាលជាតិបានបន្ថែមថា «ក្រោយពីទម្លាយព័ត៌មានលោក Mark Gibbel ដែលជាភ្នាក់ងារសម្ងាត់ CIA មួយរូប បានចាកចេញពីកម្ពុជាយប់មិញហើយ»។

សូមជម្រាបថា កាលពីយប់មិញថ្ងៃទី០១ ខែមីនា ឆ្នាំ២០២៣ ហ្វេសប៊ុកឈ្មោះ «ខ្ញុំជា សម រង្ស៉ី» បានទម្លាយឲ្យដឹងថា មុខសញ្ញាភ្នាក់ងារសម្ងាត់ CIA ពីររូបគឺលោក មាជ សុវណ្ណារ៉ា និងលោក Mark Gibbel ដែលជ្រកក្រោមផ្លាកវិទ្យាស្ថាន ស្រាវជ្រាវនយោបាយ (POLICY RESEARCH INSTITUTE) ស្ថិតនៅទីក្រុង ឡងបិច (Long Beach) កំពុងមានវត្តមាននៅរាជធានីភ្នំពេញ ដើម្បីបង្កចលាចល នៅពេលប្រកាសសាលក្រម កឹម សុខា នៅថ្ងៃទី០៣ ខែមីនា ឆ្នាំ២០២៣ខាងមុខ។

Facebook ដដែលនោះបានរៀបរាប់ទម្លាយព័ត៌មានយ៉ាងដូច្នេះថា៖ «ដំណឹងពីបរទេស ! ក្នុងពេលនេះជនមុខសញ្ញាភ្នាក់ងារសម្ងាត់ CIA ពីររូប គឺលោក មាជ សុវណ្ណារ៉ា និងលោក Mark Gibbel ដែលជ្រកក្រោមផ្លាកវិទ្យាស្ថាន ស្រាវជ្រាវនយោបាយ (POLICY RESEARCH INSTITUTE) ស្ថិតនៅទីក្រុង ឡងបិច (Long Beach) ដែលកន្លងមកបានធ្វើកិច្ចការសំងាត់ជាមួយគ្នាតាំងពីឆ្នាំ២០១៣ ដើម្បីជួយគណបក្សសង្គ្រោះជាតិ ក្នុងការផ្តួលរំលំរដ្ឋាភិបាល បានកំពុងមានវត្តមាននៅទីក្រុងភ្នំពេញ គ្រោងនឹងរៀបផែនការបង្កចលាចល នៅពេលប្រកាសសាលក្រមលោក កឹម សុខា នៅថ្ងៃទី០៣ ខែមីនា ឆ្នាំ២០២៣ខាងមុខនេះ។

Facebook «ខ្ញុំជា សម រង្ស៉ី» បានសរសេរបន្ថែមថា «មុនពេលចេញដំណើរទៅកម្ពុជា លោក សុវណ្ណារ៉ា មាជ បានអួតប្រាប់មិត្តភក្តិឲ្យដឹងថា គឺត្រូវតែមកដឹកនាំកម្លាំងប្រឆាំងសាលក្រមរបស់តុលាការភ្នំពេញ ដែលប្រកាសកាត់ទោសលោក កឹម សុខា ព្រោះគេមមានបណ្តាញច្រើននៅប្រទេសកម្ពុជា។ គួរតែអាជ្ញាធរក្រុងភ្នំពេញ មានការប្រុងប្រយ័ត្នឲ្យមែនទែន ព្រោះជនដែលជាភ្នាក់ងារសម្ងាត់ពីរនាក់ខាងលើនេះមានឧបាយកលពិសពុលខ្លាំងណាស់»៕

Fresh News