ខ្មែរប៉ុស្ដិ៍ Close

សហរដ្ឋអាមេរិកនឹងបើកការស៊ើបអង្កេតលើករណីលោក អ៊ុក ទូច ដែលគប់ស្បែកជើងតម្រង់មកនាយករដ្ឋមន្ត្រីកម្ពុជា

ដោយ៖ លី វិទ្យា ​​ | ថ្ងៃព្រហស្បតិ៍ ទី១៩ ខែឧសភា ឆ្នាំ២០២២ ព័ត៌មានទូទៅ 281
សហរដ្ឋអាមេរិកនឹងបើកការស៊ើបអង្កេតលើករណីលោក អ៊ុក ទូច ដែលគប់ស្បែកជើងតម្រង់មកនាយករដ្ឋមន្ត្រីកម្ពុជា សហរដ្ឋអាមេរិកនឹងបើកការស៊ើបអង្កេតលើករណីលោក អ៊ុក ទូច ដែលគប់ស្បែកជើងតម្រង់មកនាយករដ្ឋមន្ត្រីកម្ពុជា

អ្នកនាំពាក្យស្ថានទូតអាមេរិកបានអោយដឹងនៅថ្ងៃព្រហស្បតិ៍ទី១៩ ខែឧសភានេះថា សហរដ្ឋអាមេរិកកំពុងធ្វើការស៊ើបអង្កេតទៅលើករណីហេតុការណ៍គប់ស្បែកជើងដែលប្រព្រឹត្តដោយលោក អ៊ុក ទូច តម្រង់មកលើនាយករដ្ឋមន្ត្រី ហ៊ុន សែន កាលពីថ្ងៃទី១១ ខែឧសភា ឆ្នាំ២០២២ នៅរដ្ឋធានីវ៉ាស៊ីនតោន។

តាមរយៈសារអេឡិចត្រូនិក អ្នកនាំពាក្យស្ថានទូតអាមេរិកប្រចាំកម្ពុជា លោក Chad Roedemeier បានឱ្យដឹងថា ទាក់ទងនិងឧប្បត្តិហេតុនៅថ្ងៃទី១១ ខែឧសភា សហរដ្ឋអាមេរិកនឹងបើកការស៊ើបអង្កេតដោយហ្មត់ចត់តាមច្បាប់របស់ខ្លួន។

លោក Chad ឆ្លើយថា៖ «ទាក់ទងទៅនឹងហេតុការណ៍ដែលបានកើតឡើងកាលពីថ្ងៃទី១១ ខែឧសភា កន្លងទៅ ក្រុមការងារអនុវត្តច្បាប់របស់សហរដ្ឋអាមេរិកកំពុងស៊ើបអង្កេតលើរឿងនេះ។ វានឹងត្រូវតាមដានដោយហ្មត់ចត់ស្របតាមផ្លូវច្បាប់របស់សហរដ្ឋអាមេរិក»។

លោក Chad ក៏បានបន្ថែមថា សហរដ្ឋអាមេរិកយកចិត្តទុកដាក់លើសុវត្ថិភាព និងសន្តិសុខរបស់អ្នកការទូត និងឥស្សរជនដែលមកទស្សនកិច្ចនៅអាមេរិកយ៉ាងយកចិត្តទុកដាក់បំផុត។

ការបញ្ជាក់របស់ស្ថានតំណាងអាមេរិកប្រចាំកម្ពុជានៅពេលនេះ គឺតែប៉ុន្មានថ្ងៃប៉ុណ្ណោះបន្ទាប់ពីនាយករដ្ឋមន្ត្រីកម្ពុជា សម្ដេចតេជោ ហ៊ុន សែន បានស្នើដល់សហអាមេរិកបកស្រាយចំពោះករណីគប់ស្បែកជើងមកលើថ្នាក់ដឹកនាំមួយ ថាតើវាជាសិទ្ធិបញ្ចេញមតិ ឬជាអំពើហិង្សា។

ថ្លែងនៅក្នុងពិធីជួបសំណេះសំណាលជាមួយក្រុមគ្រូពេទ្យ សម្តេចតេជោប្រឆាំងកូវីដ-១៩ ធ្វើឡើងនៅសាលពិព័ណ៍ជ្រោយចង្វារ រាជធានីភ្នំពេញ សម្តេចតេជោ ហ៊ុន សែន បានថ្លែងថា៖ «បើសិនជាអាមេរិកចាត់ទុកថារឿងនេះជាសិទ្ធិបញ្ចេញមតិ អ៊ីចឹងរឿងនេះនឹងកើតនៅគ្រប់ប្រទេសទាំងអស់ រាប់ទាំងកម្ពុជាផងដែរ អ៊ីចឹងក្រុមប្រឆាំងទាំងអស់ នឹងត្រូវក្បាលនឹងស្បែកជើង។ នៅលើពិភពលោកនេះគ្មានច្បាប់ទម្លាប់ទៀតទេ»។

ក្រមសហរដ្ឋអាមេរិក ក្នុងគន្ថី១៨ ផ្នែកទី១១២ មានចែងអំពីការការពារជាពិសេសចំពោះ «មន្ត្រីបរទេស ភ្ញៀវផ្លូវការ និងជនការពារដោយអន្តរជាតិ»។ សាស្រ្តាចារ្យផ្នែកច្បាប់នៅសាកលវិទ្យាល័យ Columbia Law School លោក Daniel C. Richman បានលើកឡើងថា បុគ្គលណាដែលប្រព្រឹត្តអំពើ “ហិង្សា (Assault), វាយ (Strike), បង្ករបួសស្នាម (Wound), ឃុំឃាំង (Imprisoned) ឬបង្កហិង្សា (Offer Violence)” ចំពោះមន្រ្តីបរទេស, ភ្ញៀវផ្លូវការ និងបុគ្គលដែលត្រូវបានការពារជាអន្តរជាតិ អាចត្រូវបានផ្តន្ទាទោសដាក់ពន្ធនាគាររហូតដល់ ៣ឆ្នាំ ឬពិន័យជាប្រាក់ ឬត្រូវទទួលទោសទាំងពីរនេះរួមគ្នា ទាំងទោសពិន័យ ទាំងទោសដាក់ពន្ធនាគារ។ ប្រសិនបើទង្វើនៃការគប់ស្បែកជើង (ប៉ុន្តែគប់មិនត្រូវ) មិនទាន់គ្រប់គ្រាន់សម្រាប់ការផ្តន្ទាទោសពីបទអំពើហិង្សាក៏ដោយចុះ, ក៏តុលាការនៅតែសម្រេចថា ជននោះអាចនឹងមានទោសពីបទបំពានចំពោះមន្រ្តីបរទេស ឬរំខានមិនឱ្យមន្រ្តីនោះបំពេញការងាររបស់ខ្លួនបានដែរ ដែលបទល្មើសនេះអាចត្រូវបានផ្តន្ទាទោសដាក់ពន្ធនាគារមិនលើសពី ៦ខែឬពិន័យជាប្រាក់៕

EAC News

អត្ថបទទាក់ទង