ប្រសាសន៍សំខាន់ៗសម្តេចតេជោ ហ៊ុន សែន ក្នុងឱកាសអញ្ជើញសម្ពោធដាក់ឱ្យប្រើប្រាស់ «វិមានកីឡដ្ឋាន»

ដោយ៖ លី វិទ្យា | ថ្ងៃសៅរ៍ ទី១៨ ខែធ្នូ ឆ្នាំ២០២១ ទស្សនៈ - នយោបាយ 26

សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងលោក វ៉ាង វិនធាន ឯកអគ្គរដ្ឋទូតចិនប្រចាំនៅកម្ពុជា នៅព្រឹកថ្ងៃសៅរ៍ ទី១៨ ខែធ្នូ ឆ្នាំ២០២១នេះ បានអញ្ជើញធ្វើជាអធិបតីភាពរួមគ្នាសម្ពោធដាក់ឱ្យប្រើប្រាស់ «វិមានកីឡដ្ឋាន» ដែលជាសំណង់ធំជាងគេនៃពហុកីឡដ្ឋានជាតិមរតកតេជោ។ វិមានកីឡដ្ឋាន គឺជាសំណង់ប្រវត្តិសាស្ត្រមួយទៀតសម្រាប់កម្ពុជា និងជាប្រវត្តិសាស្ត្រសម្រាប់ទំនាក់ទំនងកម្ពុជា-ចិន។

វិមានកីឡដ្ឋាន គឺជាសំណង់ធំជាងគេក្នុងចំណោមសំណង់នានា នៅក្នុងពហុកីឡដ្ឋានជាតិមរតកតេជោ ស្ថិតក្នុងសង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ។ វិមានកីឡដ្ឋានត្រូវបានបើកការដ្ឋានសាងសង់ក្រោមអធិបតីភាព សម្តេចតេជោ ហ៊ុន សែន នៅថ្ងៃទី០៤ ខែមេសា ឆ្នាំ២០១៧។ វិមានកីឡដ្ឋាន ទទួលបានថវិកាជាជំនួយឥតសំណង់សម្រាប់ការសាងសង់ពីរដ្ឋាភិបាលចិន ក្នុងទំហំទឹកប្រាក់ប្រមាណ១៦០លានដុល្លា។

វិមានកីឡដ្ឋាន បានសាងសង់លើទំហំផ្ទៃដីប្រមាណ ១៦.២២ហិកតា ទំហំសំណង់ប្រហែល ៨.២៤ម៉ឺនម៉ែត្រការ៉េ គឺជាកីឡដ្ឋានខ្នាតធំដែលអាចផ្ទុកអ្នកទស្សនាបាន រហូតដល់ ៦ម៉ឺននាក់ ហើយមានសមត្ថភាពទទួលរៀបចំព្រឹត្តិការណ៍ប្រកួតកីឡាថ្នាក់ជាតិ និងអន្តរជាតិធំៗកម្រិតពិភពលោក។ ពិសេសនឹងក្លាយជាកីឡដ្ឋានដ៏សំខាន់ សម្រាប់ត្រៀមស្វាគមន៍ការប្រកួតកីឡាស៊ីហ្គេម និងអាស៊ានប៉ារ៉ាហ្គេម នៅកម្ពុជា នាឆ្នាំ២០២៣ខាងមុខ។

ខាងក្រោមជាប្រសាសន៍សំខាន់ៗរបស់សម្តេចតេជោ ហ៊ុន សែន ក្នុងឱកាសអញ្ជើញសម្ពោធដាក់ឱ្យប្រើប្រាស់ «វិមានកីឡដ្ឋាន»៖

សម្ដេចតេជោ ហ៊ុន សែន បានសម្ដែងនូវអំណរគុណយ៉ាងជ្រាលជ្រៅចំពោះរដ្ឋាភិបាល និងប្រជាជនចិន ដែលបានផ្ដល់ជំនួយឥតសំណងដល់ច្រើន សន្ធឹកសន្ធាប់មកដល់កម្ពុជា
សម្ដេចតេជោហ៊ុន សែន បានថ្លែងអំណរព្រះគុណដល់ព្រះបរមរតនកោដ្ឋ ដែលបានផ្ដើមកសាងទំនាក់ទំនងជាមួយចិន ហើយបន្សល់ទុកនូវកេរមរតកទំនាក់ទំនង រវាងប្រទេសទាំងពីរ ដល់កូនចៅជំនាន់ក្រោយ
សម្ដេចតេជោ ហ៊ុន សែន បានថ្លែងថា សមិទ្ធផលពហុកីឡាកជាតិមរតកតេជោ ដែលកម្ពុជាទទួលបាន មិនធំធេងដល់ជម្រៅចិត្តរដ្ឋាភិបាល និងប្រជាជនចិនផ្ដល់ជូនកម្ពុជាទេ
សម្ដេចតេជោ ហ៊ុន សែន សង្ឃឹមថានឹងមិនមានសម្ពាធណាមួយថែមទៀត ដោយសារតែទំនាក់ទំនងស្អិតរមួតរវាងកម្ពុជា-ចិននោះទេ
សម្ដេចតេជោ ហ៊ុន សែន សម្ដែងនូវការកោតសរសើរ និងអរគុណសម្ដេចពិជ័យសេនា ទៀ បាញ់ និងលោករដ្ឋមន្ត្រី ថោង ខុន ដែលបានខិតខំក្នុងការសាងសង់ពហុកីឡាដ្ឋានមរតកតេជោ
សម្ដេចតេជោ ហ៊ុន សែន បានផ្ដាំផ្ញើតាមរយៈលោកអគ្គរដ្ឋទូតចិន ដើម្បីថ្លែងអំណរគុណដល់រដ្ឋាភិបាល និងប្រជាជនចិន សម្រាប់ទឹកចិត្តដ៏ធំធេងក្នុងការផ្ដល់ជំនួយដល់កម្ពុជា
ទាក់ទងជាមួយនឹងការកសាងពហុកីឡដ្ឋានជាតិមរតកតេជោ សម្ដេចតេជោ ហ៊ុន សែន បានកោតសរសើរមិត្តចិន ដែលតែងគោរពដល់កម្ពុជា ទោះបីខ្លួនជាអ្នកផ្ដល់ជំនួយ និងផ្ដល់លទ្ធភាពកម្ពុជាជាអ្នកជ្រើសរើសម៉ូតពហុកីឡដ្ឋាន
សម្ដេចតេជោ ហ៊ុន សែន ផ្ដល់អនុសាសន៍៥ចណុច ដើម្បីបើកយុទ្ធនាការជាតិផ្សព្វផ្សាយ អំពីព្រឹត្តិការណ៍ប្រកួត SEA Game & Asean PARA Game ដែលកម្ពុជាធ្វើជាម្ចាស់ផ្ទះក្នុងឆ្នាំ២០២៣
សម្ដេចតេជោ ហ៊ុន សែន ជំរុញឲ្យបន្តចាក់វ៉ាក់សាំងដល់ការជាពលរដ្ឋកម្ពុជា ជាពិសេសមនុស្សចាស់ និងកុមារ
សម្ដេចតេជោ ហ៊ុន សែន បានថ្លែងថា ជំងឺកូវីដ-១៩ មិនទាន់ចប់ទេប៉ុន្តែយើងមិនអាចបិទដំណើរការរហូតទេ
សម្ដេចតេជោ ហ៊ុន សែន បានថ្លែងថា ពេលនេះស្ថានភាពរីករាលដាលជំងឺកូវីដ-១៩ នៅក្នុងតំបន់អាស៊ានមានការធ្លាក់ចុះគួរឲ្យកត់សម្គាល់
សម្ដេចតេជោ ហ៊ុន សែន បន្តអំពាវនាវឲ្យប្រជាពលរដ្ឋខ្មែរកុំមានការភ័យស្លន់ស្លោជាមួយនឹងមេរោគកូវីដ-១៩ បំប្លែងខ្លួនថ្មី អូមីក្រុង
សម្ដេចតេជោ ហ៊ុន សែន បានថ្លែងថា ការធ្វើឲ្យចេញជារូបរាងជារឿងលំបាកទៅហើយ ប៉ុន្តែអ្វីដែលលំបាកថែមទៀតទៀត គឺត្រូវធ្វើឱ្យពហុកីឡដ្ឋានជាតិមរតកតេជោ ដំណើរការប្រកបដោយនិរន្តរភាព
សម្ដេចតេជោ ហ៊ុន សែន បានបញ្ចប់ការថ្លែងសន្ទរកថា នៅវេលាម៉ោង១០៖០០នាទីព្រឹកនេះ បន្ទាប់ពីប្រកាសដាក់ឲ្យប្រើប្រាស់ វិមានកីឡាដ្ឋាន នៃពហុកីឡដ្ឋានជាតិមរតកតេជោ៕