តើលោក ប្រាជ្ញ ចន្ទ ដែលរដ្ឋសភាទើបបោះឆ្នោតផ្ដល់សេចក្ដីទុកចិត្តឱ្យធ្វើជាប្រធាន គ.ជ.ប ថ្មីជានរណា?
លោក ប្រាជ្ញ ចន្ទ ប្រធានថ្មីរបស់ គ.ជ.ប
ដ្ឋសភាកម្ពុជានៅព្រឹកព្រហស្បតិ៍នេះ បានបោះឆ្នោតគាំទ្រ និងផ្តល់ទំនុកចិត្តឱ្យលោកប្រាជ្ញ ចន្ទ ដែលជាសមាជិកគណបក្សប្រជាជនកម្ពុជាធ្វើជាប្រធានគណៈកម្មធិការជាតិរៀបចំការបោះឆ្នោត(គ.ជ.ប)ថ្មីជាផ្លូវការហើយ។ បន្ទាប់ទៅទៀត លោកប្រាជ្ញ ចន្ទ នឹងត្រូវចូលស្បថក្នុងព្រះបរមរាជវាំង ដើម្បីឡើងកាន់ការងារជាប្រធានគ.ជ.បថ្មីនាពេលខាងមុខនេះ។ លោកប្រាជ្ញ ចន្ទ ត្រូវបានជ្រើសរើសជាប្រធានថ្មីគ.ជ.ប នេះ គឺជំនួសលោកស៊ិក ប៊ុនហុក ដែលបានលាលែងកាលពីដើមខែមិថុនានេះក្រោមហេតុផលសុខភាព។
មានវ័យ៦៤ឆ្នាំ លោកប្រាជ្ញ ចន្ទ បានក្លាយជាប្រធានថ្មីនៃគណៈកម្មធិការជាតិរៀបចំការបោះឆ្នោត(គ.ជ.ប)។ កើតនៅភូមិត្រពាំងព្រីង ឃុំទូកមាស ស្រុកបន្ទាយមាស ខេត្តកំពត លោកប្រាជ្ញ ចន្ទ បានបញ្ចប់មធ្យមសិក្សាកម្រិត១នៅក្នុងខេត្តកំពត ហើយបានមកបន្តបញ្ចប់មធ្យមសិក្សាកម្រិត២នៅក្នុងរាជធានីភ្នំពេញនៅក្នុងសម័យសាធារណរដ្ឋខ្មែររបស់លោកសេនាប្រមុខលន់ នល់ មុនការមកដល់នៃរបបខ្មែរក្រហម។ បើតាមប្រភពខ្លះ លោកប្រាជ្ញ ចន្ទ ក៏ជាវីរជនតស៊ូរំដោះជាតិមាតុភូមិកម្ពុជាមួយរូបពីកណ្តាប់ដៃក្រុមប៉ុល ពតផងដែរ។
បន្ទាប់ពីបញ្ចប់មធ្យមសិក្សាទាំង២កម្រិតនេះ លោកប្រាជ្ញ ចន្ទ ក៏បានបញ្ចប់ការសិក្សាផ្នែកវិទ្យាសាស្ត្រនយោបាយថ្នាក់បរិញ្ញាបត្រ ប៉ុន្តែគេមិនដឹងថា លោកបញ្ចប់ជំនាញនេះនៅឆ្នាំណា និងពីសាលាណា ឬក៏នៅក្នុងស្រុក ឬមកពីក្រៅស្រុកឡើយ។ និយាយពីជីវិតការងារវិញ លោកប្រាជ្ញ ចន្ទ មានបទពិសោធន៍ជោគជាំនៅក្នុងក្រសួងមហាផ្ទៃ។ ពីឆ្នាំ១៩៩១ដល់ឆ្នាំ២០០១ លោកបានកាន់ដំណែងជាប្រធាននាយកដ្ឋានគ្រប់គ្រងខេត្តនៃក្រសួងមហាផ្ទៃ ហើយក្រោយមកជាប្រធាននាយកដ្ឋានរដ្ឋបាលទូទៅ បន្ទាប់មកទៀតជាអគ្គនាយករងនៃអគ្គនាយកដ្ឋានរដ្ឋបាល និងចុងក្រោយជាអគ្គនាយកនៃអគ្គនាយកដ្ឋានរដ្ឋបាលនៃក្រសួងមហាផ្ទៃ។
ចេញពីក្រសួងមហាផ្ទៃ លោកប្រាជ្ញ ចន្ទ បានទៅធ្វើជាអភិបាលខេត្តបាត់ដំបងចន្លោះឆ្នាំ២០០១ដល់ឆ្នាំ២០១៣ ហើយផ្លាស់ទៅធ្វើជាអភិបាលខេត្តត្បូងឃ្មុំពីឆ្នាំ២០១៤ដល់ឆ្នាំ២០១៧។ ក្រោយមក លោកបានធ្វើជាតំណាងរាស្រ្តខេត្តត្បូងឃ្មុំ និង ត្រូវបានតែងតាំងជាប្រធានគណៈកម្មការទី១ នៃរដ្ឋសភា គឺគណៈកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភា មុនត្រូវបានជ្រើសរើសជាប្រធានគ.ជ.បថ្មីនាពេលនេះ។
ការជ្រើសរើសរូបលោកធ្វើជាប្រធានស្ថាប័នរៀបចំការបោះឆ្នោតនេះ បង្កឱ្យមានការព្រួយបារម្ភផង និងរិះគន់ផងពីសំណាក់មន្រ្តីគណបក្សនយោបាយ និងអង្គការសង្គមស៊ីវិលនៅកម្ពុជា ជាពិសេស អង្កការធ្វើការងារខាងបោះឆ្នោត។ ពួកគេបានបង្ហាញពីការព្រួយបារម្ភពីការដឹកនាំគ.ជ.ប ដោយសារតែរូបលោកមិនមានបទពិសោធន៍ក្រាស់ក្រែលលើការងារបោះឆ្នោត។ រីឯ ការរិះគន់វិញ គឺលើភាពឯករាជ្យរបស់គ.ជ.ប ព្រោះថា ប្រធានថ្មីនេះ គឺជាសមាជិកគណៈកម្មាធិការកណ្តាលរបស់គណបក្សប្រជាជនកម្ពុជា។
ប៉ុន្តែចំពោះបញ្ហានេះ អ្នកនាំពាក្យគណបក្សប្រជាជនកម្ពុជា និងអ្នកនាំពាក្យគណៈកម្មធិការជាតិរៀបចំការបោះឆ្នោត(គ.ជ.ប) ធ្លាប់បានគូសបញ្ជាក់ដូចគ្នាថា ភាពឯករាជ្យ និងអព្យាក្រឹត្យរបស់គ.ជ.ប គឺឆ្លុះបញ្ចាំងតាមរយៈការប្រតិបត្តិត្រឹមត្រូវតាមតួនាទីដែលកំណត់ដោយច្បាប់ ហើយភាពត្រឹមត្រូវ និងតម្លាភាពនៃការបោះឆ្នោតវិញ គឺអាស្រ័យទៅលើការអនុវត្តតាមច្បាប់ស្តីពីការបោះឆ្នោត ពោល គឺមិនអាស្រ័យលើនរណាម្នាក់ឡើយ៕ RFI
