ក្រសួងសុខាភិបាល បន្តរកឃើញអ្នកឆ្លងកូវីដ-១៩ ថ្មីចំនួន ៦១៨នាក់ទៀតនៅថ្ងៃនេះ ខណៈអ្នកជំងឺជាសះស្បើយចំនួន ៦០នាក់
ក្រសួងសុខាភិបាល បន្តរកឃើញអ្នកឆ្លងកូវីដ-១៩ ថ្មីចំនួន ៦១៨នាក់ទៀតនៅថ្ងៃនេះ ខណៈអ្នកជំងឺជាសះស្បើយចំនួន ៦០នាក់ក្រសួងសុខាភិបាល នៅព្រឹកថ្ងៃទី១៨ ខែមេសា ឆ្នាំ២០២១នេះ បានចេញសេចក្តីប្រកាសព័ត៌មាន បញ្ជាក់ពីការបន្តរកឃើញអ្នកឆ្លងកូវីដ-១៩ ថ្មីចំនួន ៦១៨នាក់ ខណៈអ្នកជំងឺចំនួន ៦០នាក់បានជាសះស្បើយ។
សេចក្តីប្រកាសព័ត៌មានបានបញ្ជាក់ថា អ្នកឆ្លងថ្មីទាំង ៦១៨នាក់ សុទ្ធសឹងជាករណីឆ្លងក្នុងសហគមន៍ នៃព្រឹត្តិការណ៍២០កុម្ភៈ ដែលត្រូវបានរកឃើញនៅ៖
- រាជធានីភ្នំពេញចំនួន ៤៩៣នាក់
- ខេត្តព្រះសីហនុចំនួន ៧៥នាក់
- ខេត្តកណ្ដាលចំនួន ៣១នាក់
- ខេត្តតាកែវចំនួន ០២នាក់
- ខេត្តស្វាយរៀងចំនួន ០៨នាក់
- ខេត្តព្រៃវែងចំនួន ០៥នាក់
- ខេត្តកំពង់ស្ពឺចំនួន ០៣នាក់
- ខេត្តកំពង់ចាមចំនួន ០១នាក់
សម្រាប់អ្នកជាសះស្បើយទាំង៦០នាក់វិញ គឺ ៥៩នាក់ ជាអ្នកដែលបានឆ្លងក្នុងសហគមន៍ នៃព្រឹត្តិការណ៍២០កុម្ភៈ និង ១នាក់ទៀតជាអ្នកដំណើរមកពីក្រៅប្រទេស (ពុំមែនជាពលករមកពីប្រទេសថៃ) ដោយទទួលទ្ធផលធ្វើតេស្តអវិជ្ជមាន២លើក ត្រូវបានអនុញ្ញាតឲ្យចេញពីមន្ទីរពេទ្យ ប៉ុន្តែត្រូវបន្តធ្វើចត្តាឡីស័ក១៤ថ្ងៃ ដើម្បីតាមដានសុខភាព។
សូមជម្រាបថា គិតត្រឹមម៉ោង៧ព្រឹក ថ្ងៃទី១៨ ខែមេសា ឆ្នាំ២០២១នេះ កម្ពុជាបានរកឃើញអ្នកឆ្លងសរុបចំនួន ៦៣៨៩នាក់ ក្នុងនោះករណីសហគមន៍២០កុម្ភៈ ចំនួន ៥៨៤៦នាក់, អ្នកជាសះស្បើយចំនួន ២៤៧៦នាក់, អ្នកកំពុងសម្រាកព្យាបាលចំនួន ៣៨៦៥នាក់ និងអ្នកស្លាប់ចំនួន ៤៣នាក់៕
