រដ្ឋសភាប្រកាសទទួលស្គាល់សុពលនៃអាណត្តិតំណាងរាស្ត្រពីររូប ជាផ្លូវការនៅព្រឹកនេះ
រដ្ឋសភាប្រកាសទទួលស្គាល់សុពលនៃអាណត្តិតំណាងរាស្ត្រពីររូប ជាផ្លូវការនៅព្រឹកនេះ
រដ្ឋសភាបានប្រកាសទទួលស្គាល់សុពលនៃអាណត្តិតំណាងរាស្ត្រពីររូបផ្លូវការ នៅព្រឹកថ្ងៃ១៥កើត ខែបុស្ស ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃទី២៩ ខែធ្នូ ឆ្នាំ២០២០នេះ ក្នុងសម័យប្រជុំរដ្ឋសភាលើកទី៥ នីតិកាលទី៦ ក្រោមអធិបតីភាពដ៏ខ្ពង់ខ្ពស់សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាចក្រកម្ពុជា។
តំណាងរាស្ត្រថ្មីទាំងពីររូបនេះ មានឯកឧត្តម លី ស៊ុគ្រី ជាតំណាងរាស្ត្រថ្មីមណ្ឌលខេត្តតាកែវ ជំនួសឯកឧត្តម សុខ សូកាន ដែលបានសុំលាលែង និងឯកឧត្តម សៅ សារ៉ាត់ ជាតំណាងរាស្ត្រថ្មីមណ្ឌលខេត្តប៉ៃលិន ជំនួសលោកជំទាវ បាន ស្រីមុំ ដែលបានលាលែង។ បន្ទាប់មកសម័យប្រជុំពេញអង្គរដ្ឋសភា ក៏បានបោះឆ្នោតជ្រើសតាំង ឯកឧត្តម ខៀវ ភារិទ្ធ ជាសមាជិកគណៈកម្មការអបរំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍ ដោយទទួលបានសំឡេងឆ្នោតយល់ព្រមចំនួន ១១០សំឡេង សំឡេងឆ្នោតមិនព្រម០សំឡេងសំឡេងឆ្នោតអនុប្បវាទ ០សំឡេង និងសំឡេងឆ្នោតមោឃ: ០សំឡេង និងជ្រើសតាំងលោកជំទាវ នូ សុវណ្ណនី ជាសមាជិកគណៈកម្មការសាធារណការ ដឹកជញ្ជូន ទូរគមនាគមន៍ ប្រៃស ណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដីនគរូបនីយកម្ម និងសំណង់ដោយទទួលបានសំឡេងឆ្នោតយល់ព្រមចំនួន ១១០សំឡេង មិនព្រម ០សំឡេង អនុប្បវាទ ០ សំឡេង និងសំឡេងឆ្នោតមោឃ: ០សំឡេង។
សម្តេចអគ្គមហាពញាចក្រី ហេង សំរិន ប្រធានរដ្ឋសភា បានប្រកាសថា យោងតាមលទ្ធផលបោះឆ្នោតនេះ ឯកឧត្តម ខៀវ ភារិទ្ធ ទទួលបានសំឡេងជាប់ឆ្នោតជាសមាជិកគណៈកម្មការអបរំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍ និងលោកជំទាវ នូ សុវណ្ណនី ទទួលបានសំឡេងជាប់ឆ្នោតជាសមាជិកគណៈកម្មការសាធារណការ ដឹកជញ្ជូន ទូរគមនាគមន៍ ប្រៃសណីយ៍ ឧស្សាហកម្ម រ៉ែ ថាមពល ពាណិជ្ជកម្ម រៀបចំដែនដីនគរូបនីយ កម្ម និងសំណង់ នៅថ្ងៃទី២៩ ខែធ្នូ ឆ្នាំ២០២០នេះ ក្នុងសម័យប្រជុំរដ្ឋសភាលើកទី៥ នីតិកាលទី៦ ៕
