ក្រសួងសុខាភិបាលរកឃើញករណីវិជ្ជមានកូវីដ-១៩ ២នាក់បន្ថែមទៀតគិតត្រឹមព្រឹកថ្ងៃអាទិត្យនេះ និងពុំមានអ្នកជាសះស្បើយនោះទេ
ក្រសួងសុខាភិបាលរកឃើញករណីវិជ្ជមានកូវីដ-១៩ ២នាក់បន្ថែមទៀតគិតត្រឹមព្រឹកថ្ងៃអាទិត្យនេះ និងពុំមានអ្នកជាសះស្បើយនោះទេក្រសួងសុខាភិបាល នៅព្រឹកថ្ងៃអាទិត្យទី១៣ ខែធ្នូ ឆ្នាំ២០២០នេះ បានចេញសេចក្តីប្រកាសព័ត៌មាន ថាខ្លួនបានរកឃើញអ្នកឆ្លងជំងឺកូវីដ-១៩ ថ្មី ចំនួន២នាក់បន្ថែមទៀត ដែលជាករណីនាំចូល ស្របពេលដែលមិនមានអ្នកជាសះស្បើយថ្មីនោះទេ។
បើតាមក្រសួងសុខាភិបាល អ្នកដែលរកឃើញមានវិជ្ជមានកូវីដ-១៩ ទាំង២នាក់នោះ រួមមាន៖
- បុរសជនជាតិហ្សកដានី អាយុ ៤៧ឆ្នាំ មានអាសយដ្ឋានស្នាក់នៅសណ្ឋាគារមួយកន្លែងក្នុងរាជធានីភ្នំពេញ ជាដំណើរមកពីប្រទេសហ្សកដានី បន្តជើងហោះហើរនៅប្រទេសកូរ៉េខាងត្បូង និងបានមកដល់កម្ពុជាកាលពីថ្ងៃទី ១០ ខែធ្នូ ឆ្នាំ២០២០ កន្លងទៅ។ រីឯអ្នកដំណើរផ្សេងទៀតចំនួន ៧៦នាក់ដែលបានរួមដំណើរជាមួយបុរសខាងលើ ត្រូវបានដាក់អោយធ្វើចត្តាឡីស័កនៅសណ្ឋាគារ ២កន្លែងក្នុងរាជធានីភ្នំពេញ។
- បុរសជនជាតិខ្មែរ អាយុ ៣២ឆ្នាំ មានអាសយដ្ឋានស្នាក់នៅសណ្ឋាគារមួយក្នុងរាជធានីភ្នំពេញ ជាអ្នកដែលបានធ្វើដំណើរមកពីប្រទេសម៉ាលី បន្តជើងហោះហើរនៅប្រទេសកូរ៉េខាងត្បូង និងបានមកដល់កម្ពុជាកាលពីថ្ងៃទី ១១ ខែធ្នូ ឆ្នាំ២០២០ កន្លងទៅ។ អ្នកដែលបានរួមដំណើរជាមួយនិងបុរសខាងលើមាន ៦២នាក់ ដោយពួកគេត្រូវបានដាក់អោយធ្វើចត្តាឡីស័កនៅសណ្ឋាគារ ៣កន្លែងក្នុងរាជធានីភ្នំពេញ។
សូមជម្រាបថា គិតត្រឹមម៉ោង ៧៖០០ព្រឹកថ្ងៃទី ១៣ ខែធ្នូ ឆ្នាំ២០២០ នៅកម្ពុជារកឃើញអ្នកឆ្លងកូវីដ-១៩ សរុប៣៥៩នាក់ (ស្ត្រី ៨៤នាក់ និងបុរស ២៧៥នាក់) ក្នុងនោះចំនួនអ្នកព្យាបាលជាសះស្បើយសរុបទូទាំងប្រទេស មានចំនួន ៣០៧នាក់ និងអ្នកសម្រាកព្យាបាលនៅមន្ទីរពេទ្យចំនួន ៥២នាក់ ៕
សូមអាននូវសេចក្ដីជូនព័ត៌មានរបស់ក្រសួងសុខាភិបាលដូចខាងក្រោម៖
