ប្រជាពលរដ្ឋដែលទទួលផលប៉ះពាល់ដោយសារជំនន់ទឹកភ្លៀង និងមានជីវភាពខ្វះខាត នៅស្រុកប្រាសាទសំបូរ ទទួលអំណោយពីថ្នាក់ដឹកនាំខេត្តកំពង់ធំ
ប្រជាពលរដ្ឋដែលទទួលផលប៉ះពាល់ដោយសារជំនន់ទឹកភ្លៀង និងមានជីវភាពខ្វះខាត នៅស្រុកប្រាសាទសំបូរ ទទួលអំណោយពីថ្នាក់ដឹកនាំខេត្តកំពង់ធំ
ប្រជាពលរដ្ឋដែលទទួលរងផលប៉ះពាល់ដោយ សារជំនន់ទឹកភ្លៀង និងមានជីវភាពខ្វះខាត ចំនួន ១៩៥គ្រួសារ បានទទួលអំណោយសប្បុរសជន តាមរយៈឯកឧត្តម ឈុន ឈន់ ប្រធានក្រុមប្រឹក្សាខេត្ត និងឯកឧត្តម សុខ លូ អភិបាលខេត្តកំពង់ធំ នារសៀលថ្ងៃ១១កើត ខែកត្តិក ឆ្នាំជូត ទោស័ក ព.ស. ២៥៦៤ ត្រូវនឹងថ្ងៃអង្គារ ទី២៧ ខែតុលា ឆ្នាំ២០២០ នៅវត្តសូជ័យឧត្តម ហៅវត្តទឹកអណ្ដូង ស្ថិតនៅក្នុងស្រុកប្រាសាទសំបូរ ខេត្តកំពង់ធំ។
ក្នុងពិធីចុះសាកសួរសុខទុក្ខនោះដែរ ឯកឧត្តម សុខ លូ បានពាំនាំនូវការផ្ដាំផ្ញើសាកសួរសុខទុក្ខពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជានាចក្រកម្ពុជា និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលសម្ដេចទាំងទ្វេតែងតែយកចិត្តទុកដាក់ចំពោះសុខទុក្ខបងប្អូនទាំងអស់នៅគ្រប់ទីកន្លែង ជាពិសេសនៅក្នុងរយៈពេលដែលបងប្អូនប្រជាពលរដ្ឋទូទាំងប្រទេស កំពុងតែជួបនូវគ្រោះជំនន់ទឹកភ្លៀងនៅពេលនេះ ។
លើសពីនេះទៀត ឯកឧត្តម ក៏មានការព្រួយបារម្ភទៅលើការខូចខាតនូវហេដ្ឋារចនាសម្ព័ន្ធ និងដំណាំស្រូវរបស់បងប្អូនប្រជាពលរដ្ឋ ដែលទទួលរងនូវការខូចខាត ព្រមទាំងជំរុញឱ្យមន្ទីរអង្គភាពជំនាញពាក់ព័ន្ធពិនិត្យផលប៉ះពាល់ ដើម្បីពិនិត្យលទ្ធភាពធ្វើការជួសជុល កែលម្អរចនាសម្ព័ន្ធឡើងវិញ និងប្រមូលទិន្នន័យជាក់ស្ដែងលើការខូចខាតដំណាំស្រូវរបស់បងប្អូន ដើម្បីស្នើសុំពូជស្រូវពីរាជរដ្ឋាភិបាល យកមកចែកជូនបងប្អូនប្រជាពលរដ្ឋ ធ្វើការបង្កបង្កើនផល បន្ទាប់ពីទឹកបានស្រកទៅវិញ ។
ជាមួយគ្នានោះដែរឯកឧត្តមអភិបាលខេត្ត ក៏បានស្នើសុំឱ្យប្រជាពលរដ្ឋទាំងអស់ ត្រូវខំថែរក្សានូវកត្តាសុខសន្តិភាពដែលរកបានដោយកម្រនេះ មានសុខសន្តិភាពប្រទេសជាតិទើបមានការអភិវឌ្ឍ ព្រមទាំងអំពាវនាវដល់ប្រជាពលរដ្ឋទាំងអស់ ខិតខំថែរក្សាសុខភាព ហូបស្អាត រស់នៅស្អាត ដេកក្នុងមុងជានិច្ច ដើម្បីការពារមូសខាំ ចៀសវាងកើតនូវជំងឺផ្សេងៗ ធ្វើការរក្សាអនាម័យ សម្អាតបរិស្ថានជុំវិញផ្ទះ ដាំដំណាំរួមផ្សំផ្សេងៗ ក៏ដូចជាការចិញ្ចឹមសត្វជាដើម ដើម្បីជួយលើកស្ទួយក្នុងជីវភាពក្នុងគ្រួសារ។ អំណោយចែកជូនប្រជាពលរដ្ឋដែលទទួលរងផលប៉ះពាល់ដោយសារជំនន់ទឹកភ្លៀង និងមានជីវភាពខ្វះខាតទាំង១៩៥គ្រួសារ ដោយក្នុងមួយគ្រួសារៗទទួលបាន អង្ករ៣០គីឡូ ក្រាម មី១កេស ទឹកបរិសុទ្ធ១កេស ត្រីខ១យួរ ទឹកស៊ីអ៊ីវ១យួរ និងទឹកត្រី១យួរ ៕
