លោកនាយករដ្ឋមន្រ្ដី ហ៊ុន សែន ជួបពិភាក្សាការងារជាមួយ អនុប្រធានទី១រដ្ឋសភានៃប្រទេសវៀតណាម

លោកស្រីបានសំដែងការអបអរសាទរជូនចំពោះលោកនាយករដ្ឋមន្រ្ដី រាល់សកម្មភាពទាំងឡាយ ដែលកម្ពុជាទទួលបានជាប្រទេសរីកចម្រើនលើវិស័យ សេដ្ឋកិច្ច លើវិស័យនយោបាយនៅកម្ពុជា ដែលទទួលនូវការអភិវឌ្ឍយ៉ាងខ្លាំង ហើយទទួលបាននូវស្ថេរភាព នយោបាយល្អជាពិសេសនៅក្នុងឆាកអន្តរជាតិតែម្តង។

ជាមួយគ្នានេះដែរ​ លោកស្រីបានជម្រាបជូនសម្ដេចអំពីដំណើរទស្សនកិច្ចរបស់លោកជំទាវនៅកម្ពុជា កន្លងមកបានជួបពិភាក្សាជាមួយអនុប្រធានសភាកម្ពុជា ក៏ដូចជាសម្ដេចប្រធានរដ្ឋសភា​ និងបានជម្រាបជូនថា ដំណើរទស្សនកិច្ចនេះគឺទី១ដើម្បីពង្រឹង​ និងពង្រីកកិច្ចសហប្រតិបត្តិការរវាងរសភា និងសភា និងទី២គឺដើម្បីផ្ទេរតំណែងជាម្ចាស់ផ្ទះ ប្រធានកិច្ចប្រជុំសភាអាស៊ីប៉ាស៊ីហ្វិច ជូនដល់កម្ពុជា ត្រូវធ្វើជាម្ចាស់ផ្ទះបន្តពីប្រទេសវៀតណាម សម្រាប់កិច្ចប្រជុំលើកទី២៧។ លោកស្រី បានមានប្រសាសន៍ថា ភាគីវៀតណាមប្ដេជ្ញាចិត្តនឹងជួយ ចែករំលែកនូវរាល់បទពិសោធន៍ទាំងឡាយដែល មានកន្លងមកអំពីការរៀបចំ ធ្វើជាម្ចាស់ផ្ទះប្រជុំសភាអាស៊ីប៉ាស៊ីហ្វិក នៅវៀតណាមជូនដល់កម្ពុជា សំដៅធ្វើយ៉ាងណាឲ្យកម្ពុជារៀបចំកិច្ចប្រជុំបន្តពីវៀតណាមនេះ នៅឆ្នាំក្រោយក្នុងប្រទេសកម្ពុជាឲ្យទទួលបានជោគជ័យ។

ជាការឆ្លើយតប លោកនាយករដ្ឋមន្រ្ដី ហ៊ុន សែន បានអរគុណចំពោះការផ្ដាំផ្ញើសាកសួរសុខទុក្ខពីសំណាក់ប្រមុខដឹកនាំរបស់វៀតណាម និងថ្លែងអំណរគុណផងដែរចំពោះលើកឡើងនូវសមិទ្ធិផលរបស់កម្ពុជាកន្លងមក ដោយសម្ដេចបញ្ជាក់ថារាល់សមិទ្ធិផលទាំងនេះមិនអាចកាត់ផ្ដាច់បាន អំពីជំនួយរបស់វៀតណាមជួយដល់កម្ពុជាជាពិសេស ជំនួយក្នុងការផ្ដួលរំលំរបបប្រល័យពូជសាសន៍ប៉ុលពតឆ្នាំ ១៩៧៩ កន្លងមក។

ជាមួយនេះលោកនាយករដ្ឋមន្រ្ដីក៏បានអរគុណផងដែរចំពោះការប្ដេជ្ញាចិត្តរបស់លោកស្រី Tong Thi Phong ក្នុងការផ្ដល់ និងជួយចែករំលែកបទពិសោធន៍ សម្រាប់កិច្ចប្រជុំសភាអាស៊ីប៉ាស៊ីហ្វិកដែលកម្ពុជាធ្វើជាម្ចាស់ផ្ទះនាឆ្នាំក្រោយនេះ ។

ជាចុងក្រោយសម្តេចតេជោ​ សុំឲ្យសភាវៀតណាម និងសភាកម្ពុជា បន្តសហការគ្នាធ្វើយ៉ាងណា អោយកិច្ចប្រជុំនាឆ្នាំក្រោយដែលកម្ពុជាធ្វើជាម្ចាស់ផ្ទះនេះទទួលបានជោគជ័យ៕