កូវីដ-១៩៖ លោកដូណាល់ ត្រាំប្រាប់ប្រជាជនឲ្យត្រៀមចិត្ត ព្រោះចំនួនអ្នកស្លាប់នឹងកើនឡើងខ្លាំង
លោកដូណាល់ ត្រាំ ប្រកាសថា សប្តាហ៍ដែលនឹងមកដល់ នឹងធ្ងន់ធ្ងរបំផុត។ សេតវិមាន ថ្ងៃទី៤ មេសា ២០២០ REUTERS/Tom Brennerនៅសហរដ្ឋអាមេរិក ចំនួនអ្នកឆ្លងនិងអ្នកស្លាប់ បានកើនឡើង យ៉ាងលឿនបំផុតដែរ ក្នុងរយៈពេលមួយសប្តាហ៍ចុងក្រោយនេះ។ គិតត្រឹមថ្ងៃអាទិត្យទី៥មេសា សហរដ្ឋអាមេរិក មានអ្នកឆ្លងកូវីដ១៩ ចំនួនប្រមាណ៣សែននាក់ និងស្លាប់ចំនួនប្រមាណ៨០៩៨នាក់។ លោកប្រធានាធិបតីដូណាល់ ត្រាំ បានប្រកាស កាលពីថ្ងៃសៅរ៍ ឲ្យប្រជាជនត្រៀមចិត្ត ព្រោះក្នុងសប្តាហ៍ថ្មីដែលនឹងមកដល់នេះ តួលេខនៃចំនួនអ្នកឆ្លង និងអ្នកស្លាប់ដោយកូវីដ-១៩ អាចនឹងកើនឡើងខ្ពស់បំផុត។
ចំនួនអ្នកឆ្លង និងអ្នកស្លាប់ ដោយកូវីដ-១៩ នៅសហរដ្ឋអាមេរិក បានកើនឡើងយ៉ាងលឿនរហ័សបំផុត។ អ្វីដែលជាការព្រួយបារម្ភថែមទៀតនោះ គឺអ្នកជំនាញអះអាងថា សហរដ្ឋអាមេរិក នៅមិនទាន់ចូលដល់ដំណាក់កាលកំពូល នៃទំហំចំនួនអ្នកឆ្លងនៅឡើយទេ។ មានន័យថា ចំនួនអ្នកឆ្លងនឹងបន្តកើនឡើងថែមទៀត កាន់តែខ្ពស់។
នៅថ្ងៃសៅរ៍ទី៤មេសា ក្នុងសន្និសីទកាសែតប្រចាំថ្ងៃ លោក ប្រធានាធិបតីដូណាល់ ត្រាំ បានប្រកាសប្រាប់ទៅប្រជាជនអាមេរិកថា សប្តាហ៍ថ្មីដែលនឹងមកដល់នេះ នឹងគឺជាសប្តាហ៍ដ៏ធ្ងន់ធ្ងរបំផុត។ លោកបន្ថែមថា តួលេខចំនួនអ្នកឆ្លង នឹងកើនឡើង ហើយចំនួនអ្នកស្លាប់ ប្រាកដជាមានច្រើនខ្លាំងណាស់។
សូមរំលឹកថា កាលពីថ្ងៃសុក្រកន្លងទៅ លោកដូណាល់ ត្រាំ បានប្រកាសឲ្យប្រជាជនពាក់ម៉ាស់ តាមតែអាចធ្វើទៅបាន ដើម្បីបង្ការការឆ្លងរាលដាល។ អ្នកជំនាញរបស់អាមេរិក និងបរទេសមួយចំនួន បានផ្តោតការសង្ស័យទៅលើលទ្ធភាពនៃការចម្លងមេរោគកូវីដ-១៩ ដោយគ្រាន់តែតាមរយៈខ្យល់ដង្ហើម ដែលចេញតាមមាត់ ឬតាមច្រមុះ។
គួតត់សំគាល់ថា នៅសហរដ្ឋអាមេរិក រដ្ឋញូយ៉ក គឺជារដ្ឋដែលរងគ្រោះធ្ងន់ធ្ងរជាងគេ ដោយការឆ្លងរាលដាលមេរោគកូវីដ-១៩។ ក្នុងចំណោមអ្នកឆ្លងសរុបនៅសហរដ្ឋអាមេរិក គឺជាង១ភាគ៣ ស្ថិតនៅក្នុងរដ្ឋញូយ៉ក។ ចំណែកចំនួនអ្នកស្លាប់សរុបវិញ គឺសឹងតែពាក់កណ្តាល ស្ថិតនៅក្នុងរដ្ឋញូយ៉ក។ ចំនួនអ្នកឆ្លងនិងមានអាការៈធ្ងន់ធ្ងរ ឈានដល់ស្លាប់ច្រើន យ៉ាងលឿនរហ័សបែបនេះ ត្រូវបានអ្នកវិភាគ លើកឡើងថា មួយផ្នែកមកពីកត្តាសុខភាពរបស់ប្រជាជនអាេមរិក ដែលមានជំងឺប្រចាំកាយស្រាប់ ដូចសំបូរអ្នកមានជំងឺធាត់ចុកខ្លាញ់ និងជំងឺទឹកនោមផ្អែម។ មួយវិញទៀត ប្រជាជនអាេមរិកដែលក្រីក្រ ពុំមានលទ្ធភាពទិញបណ្ណធានារ៉ាប់រងសុខភាព បានសម្រេចចិត្តមិនទៅរកសេវ៉ាសុខភាព ព្រោះគ្មានប្រាក់បង់។
គួរកត់សំគាល់ដែរថា ក្នុងមួយសប្តាហ៍ចុងក្រោយនេះ លោកដូណាល់ ត្រាំ បានផ្លាស់ប្តូរគោលជំហរទាំងស្រុង ទាក់ទិននឹងការឆ្លងរាលដាល នូវមេរោគកូវីដ-១៩។ បន្ទាប់ពីបានអះអាងថាមិនធ្ងន់ធ្ងរ មិនគួរបារម្ភ លោកដូណាល់ ត្រាំ បានងាកមកទទួលស្គាល់ ពីភាពអាសន្ន និងផលវិបាកដ៏ធំមហិមា លើសេដ្ឋកិច្ចអាមេរិក។ គិតត្រឹមចុងខែមិនា ចំនួនអ្នកអត់ការងារធ្វើនៅសហរដ្ឋអាមេរិក មានជាង៧លាននាក់ ដែលចំនួននេះកើនឡើងយ៉ាងរហ័សបំផុត ដោយសារសកម្មភាពសេដ្ឋកិច្ចត្រូវរាំងស្ទះ។ ប្រជាជនក្រីក្រ ដែលគ្មានប្រាក់សន្សំ ដើម្បីបំរុងទុក គឺជាអ្នកដែលរងគ្រោះខ្លាំងជាងគេ៕ RFI
