ខ្មែរប៉ុស្ដិ៍ Close

តំណាងក្រុមហ៊ុនធំៗរបស់ជប៉ុន ប្រកាសបន្តជួយវិស័យសេដ្ឋកិច្ចដល់ប្រទេសកម្ពុជា

ដោយ៖ សន ប្រាថ្នា ​​ | ថ្ងៃព្រហស្បតិ៍ ទី៣០ ខែឧសភា ឆ្នាំ២០១៩ ព័ត៌មានទូទៅ 785
តំណាងក្រុមហ៊ុនធំៗរបស់ជប៉ុន ប្រកាសបន្តជួយវិស័យសេដ្ឋកិច្ចដល់ប្រទេសកម្ពុជា តំណាងក្រុមហ៊ុនធំៗរបស់ជប៉ុន ប្រកាសបន្តជួយវិស័យសេដ្ឋកិច្ចដល់ប្រទេសកម្ពុជា

(តូក្យូ, ជប៉ុន)៖ លោកនាយករដ្ឋមន្ត្រី ហ៊ុន សែន នៅរសៀលថ្ងៃទី២៩ ខែឧសភា ឆ្នាំ២០១៩ បានអនុញ្ញាតឱ្យលោក កេន ម៉ាតស៊ុហ្សាវ៉ា (Ken Matsuzawa) ប្រធានក្រុមប្រឹក្សាផ្លាស់ប្តូរមិត្តភាពអន្តរជាតិជប៉ុន (FEC) និងថ្នាក់ដឹកនាំក្រុមហ៊ុនរបស់ជប៉ុន៦រូបផ្សេងទៀត ចូលជួបសម្តែងការគួរសម និងពិភាក្សាលើការងារវិនិយោគនៅក្នុងប្រទេសកម្ពុជា។

ជាកិច្ចចាប់ផ្តើមនៃជំនួបលោកនាយករដ្ឋមន្ត្រី បានសម្តែងការស្វាគមន៍យ៉ាងកក់ក្តៅ និងបញ្ជាក់ថា លោកពិតជារីករាយដែលជាបានជួបជាថ្មីម្តងទៀតជាមួយលោក កេន ម៉ាតស៊ុហ្សាវ៉ា។ ក្នុងជំនួបនោះលោកនាយករដ្ឋមន្ត្រី ហ៊ុន សែន បានបង្ហាញពីការសម្រេចក្នុងការលុបចោលពន្ធកាន់ទុក ១% ហើយឱ្យចាប់ផ្តើមអនុវត្តន៍ភ្លាមៗដោយមិនទុករហូតដល់ចុងឆ្នាំនោះឡើយ។

លោកនាយករដ្ឋមន្ត្រី ប្រមុខរាជរដ្ឋាភិបាលកម្ពុជា បានក៏បានមានប្រសាសន៍ទៅកាន់លោក កេន ម៉ាតស៊ុហ្សាវ៉ា ដែរថា កម្ពុជាមិនមែនត្រូវការត្រឹមតែហិរញ្ញប្បទាន ឬជំនួយនោះទេ ប៉ុន្តែកម្ពុជា ក៏ស្វាគមន៍នូវអនុសាសន៍ និងគំនិតផ្សេងៗទៀតពាក់ព័ន្ធលើការវិនិយោគផងដែរ។

លោក កេន ម៉ាតស៊ុហ្សាវ៉ា បានមានប្រសាសន៍ជម្រាបជូនសម្តេចតេជោនាយករដ្ឋមន្ត្រីថា នឹងជួយជំរុញនូវលំហូរអ្នកវិនិយោគពីជប៉ុន ទៅកម្ពុជា ហើយក្រុមហ៊ុនរបស់លោកនេះ នឹងបន្តជួយដល់ប្រទេសកម្ពុជា និងជួយដល់សម្តេចតេជោផងដែរ។

លោកនាយករដ្ឋមន្ត្រី បានថ្លែងអំណរគុណដល់ការបញ្ចេញនូវឆន្ទៈរបស់ប្រធាន FEC និងក្រុមហ៊ុនរបស់លោកចំពោះឆន្ទៈដ៏មុះមុតក្នុងការជួយដល់ប្រទេសកម្ពុជា។ ជាពិសេសការងារដែលបានជួយដល់ប្រទេសកម្ពុជានាពេលកន្លងទៅ។

លោកនាយករដ្ឋមន្ត្រី បានរំលឹកប្រាប់លោក កេន ម៉ាតស៊ុហ្សាវ៉ា ថា កម្ពុជាបានឆ្លងកាត់ដំណាក់កាលលំបាកជាច្រើន ជាពិសេសការអភិវឌ្ឍធនធានមនុស្ស។ លោកនាយករដ្ឋមន្ត្រី មានប្រសាសន៍ថា កម្ពុជាខ្វះធនធានមនុស្ស ដោយសារក្នុងរបបខ្មែរក្រហមបានកាប់សម្លាប់ធ្វើឱ្យកម្ពុជាបាត់បង់ធនធានមនុស្សជាច្រើន។

លោកនាយករដ្ឋមន្ត្រី ហ៊ុន សែន បានលើកឡើងពីស្ថានភាពដ៏លំបាកក្នុងការកសាងប្រទេសឡើងវិញ។ លោកនាយករដ្ឋមន្ត្រី បានបញ្ជាក់ថា ក្រសួងការបរទេសកម្ពុជា ដែលចាប់ផ្តើមជាថ្មីនៅក្នុងឆ្នាំ១៩៧៩ ជាមួយធនធានមនុស្សតិចតួចបំផុត ហើយមិនមែនតែក្រសួងការបរទេសនោះទេ ស្ថាប័នរដ្ឋមួយចំនួន ក៏ខ្វះធនធានមនុស្សផងដែរ។

ក្នុងន័យនេះ លោកនាយករដ្ឋមន្ត្រី ហ៊ុន សែន ស្នើដល់ក្រុមហ៊ុនរបស់លោក កេន ម៉ាតស៊ុហ្សាវ៉ា និងក្រុមហ៊ុនជប៉ុនដទៃទៀត ជួយបណ្តុះបណ្តាលធនធានមនុស្សនៅកម្ពុជា។ លោកនាយករដ្ឋមន្ត្រី បានថ្លែងកោតសរសើរក្រុមហ៊ុនជប៉ុន ពេលវិនិយោគនៅកម្ពុជា តែងតែបង្ហាញការបារម្ភពីធនធានមនុស្ស ហើយតែងតែជួយបណ្តុះបណ្តាលធនធានមនុស្សនៅកម្ពុជាផងដែរ។ ដូចជាក្រុមហ៊ុនមីនីបៀ បានចូលមកវិនិយោគ និងបង្កើតរោងចក្រជាបន្តបន្ទាប់ ហើយក្រុមហ៊ុននេះ បានវិនិយោគក្នុងការបណ្តុះបណ្តាលធនធានមនុស្សរបស់កម្ពុជា ដើម្បីឱ្យមានសមត្ថភាពគ្រប់គ្រាន់ក្នុងការធ្វើកិច្ចការបម្រើក្នុងក្រុមហ៊ុនរបស់ខ្លួន។ កន្លងទៅក្រុមហ៊ុននេះ បានបញ្ជូនពលរដ្ឋកម្ពុជា ទៅបណ្តុះបណ្តាលនៅប្រទេសថៃ និងម៉ាឡេស៊ីជាដើម។ មិនតែប៉ុណ្ណោះ ក្រុមហ៊ុនជប៉ុនតែងតែបង្កើតនូវកម្មវិធីបណ្តុះបណ្តាលនៅក្នុងក្រុមហ៊ុនខ្លួនផងដែរ។

លោក កេន ម៉ាតស៊ុហ្សាវ៉ា មានប្រសាសន៍តបថា ទាំងរូបលោក និងថ្នាក់ដឹកនាំក្រុមហ៊ុន ៦រូបផ្សេងទៀត គឺពិតជាយល់អំពីអ្វីដែលលោក បានលើកឡើង ហើយនឹងប្រឹងជំរុញលើការងារបណ្តុះបណ្តាល ធនធានមនុស្សនេះ។

ពាក់ព័ន្ធបញ្ហាធនធានមនុស្សនេះលោកនាយករដ្ឋមន្ត្រី បានលើកឡើងថា រដ្ឋមិនអាចដើរតួនាទីបណ្តុះបណ្តាលតែម្នាក់ឯងទេ គឺត្រូវការចូលរួមពីវិស័យឯកជន ហើយពេលកម្ពុជាមានធនធានគ្រប់គ្រាន់ ក្រុមហ៊ុនពីជប៉ុនទៅអាចប្រើធនធាននៅក្នុងស្រុក ដោយមិនបានចំណាយ ច្រើនក្នុងការនាំអ្នកជំនាញពីក្រៅប្រទេសទៅ ៕

អត្ថបទទាក់ទង