ចិនប្រកាសថាចិនជួយកម្ពុជាគ្រប់បញ្ហា រួមទាំងបញ្ហា EBA ផងដែរ!
ចិនប្រកាសថាចិនជួយកម្ពុជាគ្រប់បញ្ហា រួមទាំងបញ្ហា EBA ផងដែរ!
លោក វ៉ាន់ ហូនីង សមាជិកគណៈអចិន្ត្រៃយ៍ នៃការរិយាល័យនយោបាយ និងជាលេខាធិការនៃលេខាធិការដ្ឋានបក្សកុម្មុយនីស្តចិន បានបង្ហាញជំហរយ៉ាងមុតមាំរបស់រដ្ឋាភិបាលចិនក្នុងការជួយដោះស្រាយគ្រប់បញ្ហារបស់កម្ពុជាដែលជួយប្រទះដែលក្នុងនោះរួមមានទាំងបញ្ហាប្រព័ន្ធអនុគ្រោះពន្ធ (EBA) ដែលសហភាពអឺរ៉ុបគ្រោងនឹងព្យួរផងដែរ។
ការអះអាងរបស់លោក វ៉ាន់ ហូនីង បានធ្វើឡើងពេលអញ្ជើញចូលជួបសម្តែងការគួរសម និងពិភាក្សាការងារមួយចំនួនជាមួយលោកនាយករដ្ឋមន្រ្តី ហ៊ុន សែន នៅទីក្រុងប៉េកាំង ប្រទេសចិន នាថ្ងៃទី២៧ ខែមេសា ឆ្នាំ២០១៩ម្សិលមិញនេះ។
ក្នុងជំនួបនោះលោកនាយករដ្ឋមន្ត្រី ហ៊ុន សែន និងលោក វ៉ាន់ ហូនីង បានពិភាក្សាគ្នាច្រើនទៅលើការពង្រឹងទំនាក់ទំនង កិច្ចសហប្រតិបត្តិការ និងការវិនិយោគនៃប្រទេសទាំងពីរ។ នេះបើយោងតាមការបញ្ជាក់របស់លោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី។
លោក កៅ គឹមហួន បានគូសបញ្ជាក់ថា ក្នុងជំនួបនេះ លោកនាយករដ្ឋមន្ត្រី បានលើកឡើងពីស្ថានភាពវិវឌ្ឍន៍ផ្នែកនយោបាយ សេដ្ឋកិច្ច សង្គម និងការវិនិយោគនៅកម្ពុជា ដោយលោកនាយករដ្ឋមន្ត្រី ចង់ឃើញក្រុមហ៊ុនចិនដែលកំពុងរកស៊ីនៅកម្ពុជានៅតែបន្តមានវត្តមាននៅកម្ពុជា ហើយក៏បានស្នើឱ្យរដ្ឋាភិបាលចិនលើកទឹកចិត្តឱ្យអ្នកវិនិយោគ និងក្រុមហ៊ុនចិនថ្មីផ្សេងទៀតទៅបណ្តាក់ទុន និងធ្វើពាណិជ្ជកម្មនៅកម្ពុជា។
លោកនាយករដ្ឋមន្ត្រី ហ៊ុន សែន ក៏បានឆ្លៀតបង្ហាញពីធ្វើកំណែទម្រង់មួយចំនួនរបស់រាជរដ្ឋាភិបាលកម្ពុជា តាមរយៈនយោបាយអនុគ្រោះពន្ធ ការបន្ថយតម្លៃដើមសេវា ការសម្រួលមិនឱ្យភាពសាំញាំលើការផ្តល់សេវា សម្រួលការដឹកជញ្ជូន បញ្ចុះតម្លៃផ្ទុក លើកដាក់កុងតឺន័រ និងការបញ្ចុះតម្លៃអគ្គិសនីជាដើម។ លោកនាយករដ្ឋមន្ត្រីគូសបញ្ជាក់ថា ការធ្វើកំណែទម្រង់ទាំងនេះ ដើម្បីជួយសម្រួលដល់ក្រុមហ៊ុនបរទេស រួមទាំងក្រុមហ៊ុនចិនដែលកំពុងរកស៊ីនៅក្នុងប្រទេសកម្ពុជា។ ជាពិសេសកាត់បន្ថយតម្លៃផ្សេងៗធ្វើយ៉ាងណាឱ្យក្រុមហ៊ុនទាំងនោះមានលទ្ធភាពប្រកួតប្រជែង ហើយអាចបន្តធ្វើពាណិជ្ជកម្មនៅកម្ពុជា។
លោកនាយករដ្ឋមន្ត្រីប្រមុខរាជរដ្ឋាភិបាលកម្ពុជា បានថ្លែងថា ដោយសារបច្ចុប្បន្នក្រុមហ៊ុនចិន ដែលកំពុងមានវត្តមាននៅកម្ពុជា មានរោងចក្រជាង៧០០ ក្នុងចំណោមជាង ១ពាន់រោងចក្រ ដែលជាក្រុមហ៊ុនរបស់ចិន ហើយការដែលក្រុមហ៊ុនចិនបន្តធ្វើពាណិជ្ជកម្មនៅកម្ពុជានេះមានសារៈសំខាន់ណាស់សម្រាប់ជាប្រយោជន៍ដល់ប្រទេស និងប្រជាជនទាំងពីរ ហើយការដែលធ្វើឱ្យក្រុមហ៊ុនចិននៅកម្ពុជា និងក្រុមហ៊ុនថ្មីទៅរកស៊ីនៅកម្ពុជា គឺស្របទៅតាមទំនាក់ទំនងជាយុទ្ធសាស្ត្ររវាងកម្ពុជា និងចិន។
លោកនាយករដ្ឋមន្ត្រី ក៏បានស្នើចិនបើកទីផ្សារថែមទៀត ដើម្បីឱ្យផលិតផល និងកសិផលមកកម្ពុជាកាន់តែច្រើន ដែលជាការជួយជំរុញដល់ការនាំចេញរបស់កម្ពុជាមកប្រទេសចិន។
ជាការឆ្លើយតបទៅនឹងអ្វីដែលលោកនាយករដ្ឋមន្ត្រីប្រមុខរាជរដ្ឋាភិបាលកម្ពុជា បានស្នើឡើងនេះ លោក វ៉ាន់ ហូនីង បានគូសបញ្ជាក់តបដោយបង្ហាញពីគោលជំហរយ៉ាងមុតមាំ និងច្បាស់លាស់របស់រដ្ឋាភិបាលចិនថា លោកនាយករដ្ឋមន្ត្រី ហ៊ុន សែន និងប្រទេសកម្ពុជា គឺជាមិត្តពិត ជាមិត្តដែកថែបរបស់ប្រទេសចិន និងប្រជាជនចិន ដូច្នេះបើកម្ពុជាជួបបញ្ហាអ្វីចិននឹងជួយដល់ប្រទេសកម្ពុជា។
លោក កៅ គឹមហួន បានដក់ស្រង់សម្តីលេខាបក្សកុម្មុយនីស្តមកបញ្ជាក់យ៉ាងដូច្នេះ «លោកលេខាបក្សកុម្មុយនីស្តចិន បានបញ្ជាក់ថា ភាគីចិនបានសិក្សាពីផលប៉ះពាល់នៃការដក EBA របស់សហភាពអឺរ៉ុបពីប្រទេសកម្ពុជា តែមិនមានការប៉ះពាល់ធ្ងន់ធ្ងរទេ ហើយចិននឹងរិះរកវិធីផ្សេងៗជួយដល់កម្ពុជា»។
លោក វ៉ាន់ ហូនីង ក៏បានបានកត់សម្គាល់ពីភាពល្អប្រសើរនៃការវិនិយោគនៅតំបន់សេដ្ឋកិច្ចខេត្តព្រះសីហនុ ហើយសន្យាជំរុញឱ្យមានការវិនិយោគបន្ថែមនៅតំបន់នោះ។
លេខាបក្សកុម្មុយនីស្តចិន ក៏បានកោតសរសើរលោកនាយករដ្ឋមន្ត្រី ហ៊ុន សែន ដែលបានធ្វើឱ្យកម្ពុជាមានសន្តិភាព និងស្ថេរភាព ជាពិសេសការធ្វើឱ្យកម្ពុជាមានការអភិវឌ្ឍ និងមានកំណើនសេដ្ឋកិច្ចលឿន។
នៅក្នុងជំនួបខាងលើនេះ លោកនាយករដ្ឋមន្ត្រី ហ៊ុន សែន ក៏បានថ្លែងកោតសរសើរផងដែរពីគំនិតផ្តួចផ្តើម «ខ្សែក្រវាត់ និងផ្លូវ» របស់ប្រធានាធិបតីចិនលោក ស៊ី ជីនពីង។ លោកនាយករដ្ឋមន្ត្រី បានគូសបញ្ជាក់ថា វេទិកា «ខ្សែក្រវាត់ និងផ្លូវ» លើកទី២នេះ ទទួលបានជោគជ័យ ហើយតាមការសង្កេតរបស់លោកការផ្តួចផ្តើមនេះ បានក្លាយទៅជាគោលដៅរួមរបស់ប្រទេសទាំងឡាយដែលបានចូលរួមក្នុងវេទិកា «ខ្សែក្រវាត់ និងផ្លូវ» នេះ។
លោកនាយករដ្ឋមន្ត្រី ហ៊ុន សែន បានបញ្ជាក់ថា ប្រទេសកម្ពុជាចាប់តាំងពីដើមទីមកបានផ្តល់ការគាំទ្រយ៉ាងខ្លាំងក្លា និងពេញទំហឹង ចំពោះគំនិតផ្តួចផ្តើម «ខ្សែក្រវាត់ និងផ្លូវ»នេះ ហើយកម្ពុជាបានទទួលនូវអត្ថប្រយោជន៍ជាច្រើនសម្រាប់ការកសាង និងអភិវឌ្ឍន៍ប្រទេសពីគំនិតផ្តួចផ្តើម «ខ្សែក្រវាត់ និងផ្លូវ»៕
