ខ្មែរប៉ុស្ដិ៍ Close

លោកនាយករដ្ឋមន្ត្រី ហ៊ុន សែន បញ្ជឲ្យបញ្ឈប់ការសិក្សាលើគម្រោងបង្កើតខេត្តថ្មី

ដោយ៖ សន ប្រាថ្នា ​​ | ថ្ងៃសុក្រ ទី៥ ខែតុលា ឆ្នាំ២០១៨ ព័ត៌មានទូទៅ 684
លោកនាយករដ្ឋមន្ត្រី ហ៊ុន សែន បញ្ជឲ្យបញ្ឈប់ការសិក្សាលើគម្រោងបង្កើតខេត្តថ្មី លោកនាយករដ្ឋមន្ត្រី ហ៊ុន សែន បញ្ជឲ្យបញ្ឈប់ការសិក្សាលើគម្រោងបង្កើតខេត្តថ្មី

លោក ហ៊ុន សែន នាយករដ្ឋមន្ត្រីនៃកម្ពុជា បានបញ្ឈប់មិនឲ្យសិក្សាលើគម្រោងបង្កើតខេត្តថ្មី ដែលគ្រោងកាត់ចេញពីខេត្តកណ្តាល និងខេត្តមណ្ឌលគិរី-រតនគិរីបន្តទៀតនោះឡើយ។

ការសម្រេចរបស់លោក ហ៊ុន សែន បានធ្វើឡើងក្នុងកាសអញ្ជើញជាអធិបតីប្រារព្ធពិធីអបអរសាទរទិវា «គ្រូបង្រៀន ៥ តុលា» នៅព្រឹកថ្ងៃទី០៥ ខែតុលា ឆ្នាំ២០១៨នេះ នៅវិទ្យាស្ថានជាតិអប់រំ។ បើតាមប្រសាសន៍របស់លោក ហ៊ុន សែន ការសម្រេចលុបចោលគម្រោងសិក្សាបង្កើតខេត្តថ្មីនេះ ដោយសារតែព័ត៌មានស្តីពីគម្រោងនេះត្រូវបានបែកធ្លាយយ៉ាងខ្ចរខ្ចាយ ជាពិសេសមានអ្នកព្យាយាមរត់ការយកតំណែងគ្រប់គ្រងខេត្តថ្មីទាំងពីរនេះ។

ភ្លាមៗបន្ទាប់ពីលោកនាយករដ្ឋមន្ត្រី ប្រកាសលុបចោលការសិក្សាបង្កើតថ្មីនេះហើយ ទីស្តីការគណៈរដ្ឋមន្ត្រីក៏បានចេញសេចក្តីជូនដំណឹងមួយទៅលោកក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បញ្ជាក់ពីការបញ្ឈប់គម្រោងសិក្សាបង្កើតថ្មីនេះផងដែរ។

សូមបញ្ជាក់ថា លោក ស ខេង កាលពីខែសីហា ឆ្នាំ២០១៨កន្លងទៅថ្មីៗនេះ បានសរសេរសំណើមួយច្បាប់ជូនលោក ហ៊ុន សែន ស្នើសុំបង្កើតថ្មីចំនួនពីរទៀត ដោយខេត្តមួយបំបែកចេញពីខេត្តកណ្តាល និងខេត្តមួយទៀត បំបែកចេញពីខេត្តមណ្ឌលគិរី និងរតនគិរី។

បើតាមការបញ្ជាក់នៅក្នុងសំណើនោះការបង្កើតខេត្តថ្មីពីរនេះ ដើម្បីជួយលើកកម្ពស់ប្រសិទ្ធភាពនៃការគ្រប់គ្រងរដ្ឋបាល ការថែរក្សាសន្ដិសុខសណ្ដាប់ធ្នាប់សាធារណៈ ការជំរុញអភិវឌ្ឍន៍នៅមូលដ្ឋាន និងការផ្ដល់សេវាសាធារណៈជូនប្រជាពលរដ្ឋ។

ជាមួយនឹងការប្រកាសលុបចោលគម្រោងសិក្សាបង្កើតខេត្តនេះ លោក ហ៊ុន សែន ក៏បានហាមកុំឲ្យយកលេសបង្ខិតសេវាទៅកៀកប្រជាពលរដ្ឋ ដើម្បីសុំបង្កើតខេត្តនេះបន្តទៅទៀត។ លោកលើកឡើងថា បច្ចុប្បន្នមានបច្ចេកវិទ្យាទំនើប ឲ្យតែមានឆន្ទៈការផ្តល់សេវាជូនប្រជាពលរដ្ឋមិនចោទជាបញ្ហានោះឡើយ៕

អត្ថបទទាក់ទង