តុលាការចេញដីកាបង្គាប់ឱ្យលោក គឹម សុខ ចូលខ្លួននៅថ្ងៃទី១៤ ខែកញ្ញា, លោក គឹម សុខ បានរត់គេចខ្លួនទៅដល់ប្រទេសថៃ
តុលាការចេញដីកាបង្គាប់ឱ្យលោក គឹម សុខ ចូលខ្លួននៅថ្ងៃទី១៤ ខែកញ្ញា, លោក គឹម សុខ បានរត់គេចខ្លួនទៅដល់ប្រទេសថៃចៅក្រមស៊ើបសួរសាលាដំបូងរាជធានីភ្នំពេញ លោក លាង សំណាត់ បានចេញដីកាបង្គាប់ឱ្យលោក គឹម សុខ ចូលខ្លួនទៅតុលាការនៅថ្ងៃទី១៤ ខែកញ្ញា ឆ្នាំ២០១៨នេះ ពីបទ «បរិហាកេរ្តិ៍ជាសាធារណៈ និងញុងញង់ឲ្យប្រព្រឹត្តបទឧក្រិដ្ឋជាអាទិ៍»។
ដីកាបង្គាប់ឱ្យចូលខ្លួនរបស់តុលាការ បានបញ្ជាក់យ៉ាងដូច្នេះថា «បង្គាប់មកឈ្មោះ គឹម សុខ ភេទប្រុស អាយុ៣៨ឆ្នាំ កើតថ្ងៃទី១៣ ខែតុលា ឆ្នាំ១៩៨០ ជនជាតិខ្មែរ មានអាសយដ្ឋានបច្ចុប្បន្នស្នាក់នៅផ្ទះជួល សង្កាត់វត្តភ្នំពេញ ខណ្ឌដូនពេញ រាជធានីភ្នំពេញ (អាសយដ្ឋានចុងក្រោយ) ឲ្យចូលខ្លួនមកកាន់សាលាដំបូងរាជធានីភ្នំពេញ បន្ទប់ «ឈ» ជាន់ទី៤ ថ្ងៃទី១៤ ខែកញ្ញា ឆ្នាំ២០១៨ វេលាម៉ោង០៨៖៣០នាទីព្រឹក ដើម្បី៖ មកសាកសួរយកចម្លើយពីដំណើររឿង៖ បរិហាកេរ្ដិ៍ជាសាធារណៈ, ញុះញង់ឲ្យប្រព្រឹត្តបទឧក្រិដ្ឋជាអាទិ៍»។
ជាមួយគ្នានេះ លោក គឹម សុខ អ្នកវិភាគនយោបាយ និងសង្គមនៅកម្ពុជា ដែលទើបត្រូវដោះលែងចេញពីពន្ធនាគារ បានរត់គេចខ្លួនទៅដល់ប្រទេសថៃបាត់ហើយ។ នេះជាការបញ្ជាក់ពី លោកឧត្តមសេនីយ៍ឯក អ៊ី សុខឃី ប្រធាននាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន នៃអគ្គស្នងការដ្ឋាននគរបាលជាតិ។ លោកឧត្តមសេនីយ៍ឯក អ៊ី សុខឃី បានអោយដឹងថាលោក គឹម សុខ ពិតជាបានរត់គេចខ្លួនទៅដល់ប្រទេសថៃហើយ តាមច្រករបៀង ហើយនៅពេលនេះ សមត្ថកិច្ចកម្ពុជារបស់យើងកំពុងសហការជាមួយជាមួយសមត្ថកិច្ចរបស់ថៃដើម្បីតាមស្វែងរកលោក គឹម សុខ។
សូមបញ្ជាក់ថា លោក គឹម សុខ ត្រូវបានតុលាការដោះលែងឱ្យមានសេរីភាពឡើងវិញនៅព្រឹកថ្ងៃទី១៧ ខែសីហា ឆ្នាំ២០១៨ បន្ទាប់ពីអនុវត្តទោសចប់សព្វគ្រប់ពោលបានជាប់ពន្ធនាគារ អស់រយៈពេលប្រមាណ ១៨ខែ។ លោក គឹម សុខ កាលពីថ្ងៃទី១០ ខែសីហា ឆ្នាំ២០១៧កន្លងទៅ ត្រូវបានចៅក្រមជំនុំជម្រះសាលាដំបូងរាជធានីភ្នំពេញ លោក គី ប្ញទ្ធី សម្រេចផ្ដន្ទាទោសដាក់ពន្ធនាគារចំនួន ១៨ខែ និងពិន័យប្រាក់ចំនួន ៨លានរៀល រួមនឹងប្រាក់សងជំងឺចិត្តដល់ដើមបណ្តឹង ៨០០លានរៀល ក្រោមការចោទប្រកាន់ពីបទញុះញង់ឱ្យមានបទឧក្រិដ្ឋជាអាទិ៍។
ការផ្តន្ទាទោសនេះ ធ្វើឡើងតាមបណ្តឹងរបស់គណបក្សប្រជាជនកម្ពុជា បន្ទាប់ពីលោក គឹម សុខ បានញុះញង់ និងបរិហារកេរ្តិ៍គណបក្សប្រជាជនកម្ពុជាថា នៅពីក្រោយឃាតកម្មលោក កែម ឡី។ កាលពីថ្ងៃទី២៩ ខែសីហា ឆ្នាំ២០១៨កន្លងទៅថ្មីៗនេះ ប្រមុខនៃរាជរដ្ឋាភិបាលកម្ពុជា បានព្រមានខ្លាំងៗថា នឹងប្ដឹងអ្នកវិភាគសង្គម លោក គឹម សុខ ដាក់ពន្ធនាគារវិញ ប្រសិនបើមិនសងប្រាក់សំណង ៨០០លានរៀល ស្មើនឹងប្រមាណ២០ម៉ឺនដុល្លារមកឱ្យគណបក្សប្រជាជនកម្ពុជាទេនោះ៕
