រយៈពេល ៥ឆ្នាំចុងក្រោយ ភ្ញៀវទេសចរជាតិធ្វើដំណើរកម្សាន្ដតាមតំបន់ទេសចរណ៍នៅទូទាំងប្រទេសកើន ៦ភាគរយក្នុងមួយឆ្នាំ
រយៈពេល ៥ឆ្នាំចុងក្រោយ ភ្ញៀវទេសចរជាតិធ្វើដំណើរកម្សាន្ដតាមតំបន់ទេសចរណ៍នៅទូទាំងប្រទេសកើន ៦ភាគរយក្នុងមួយឆ្នាំក្រសួងទេសចរណ៏ បានអះអាងថា ក្នុងរយៈពេល៥ឆ្នាំចុងក្រោយនេះភ្ញៀវទេសចរណ៏ជាតិបានធ្វើដំណើរកម្សាន្ដតាមតំបន់គោលដៅទេសចរណ៍នានានៅទូទាំងប្រទេសកើនឡើងជាបន្ដបន្ទាប់ គិតជាមធ្យម៦%ក្នុង១ឆ្នាំ ដោយបានបង្កើតការងារ និងផ្ដល់ចំណូលដល់ប្រជាពលរដ្ឋក្នុងមូលដ្ឋាន ក្នុងការរួមចំណែកលើកស្ទួយសេដ្ឋកិច្ចសង្គម ។
ថ្លែងនៅក្នុងពិធីបើកពិព័រណ៍ទេសចរណ៍ក្នុងស្រុក លើកទី១ ឆ្នាំ២០១៨ នៅកោះពេជ្រ កាលពីពេលថ្មីៗកន្លងមកនេះ លោក ថោង ខុន រដ្ឋមន្ត្រីក្រសួងទេសចរណ៍ បានលើកឡើងថា ទេសចរណ៍ក្នុងស្រុកជាចលករយ៉ាងសំខាន់ ដើម្បីជំរុញប្រជាពលរដ្ឋឱ្យដឹងពីសក្តានុពល និងចេះស្រឡាញ់ទឹកដី ។ ទន្ទឹមនឹងនេះ ទេសចរណ៍ក្នុងស្រុកជាឧបករណ៍ធ្វើឱ្យតំបន់ទេសចរណ៍ថ្មីៗដែលមិនសូវមានភាពល្បីល្បាញ ទទួលបានការចាប់អារម្មណ៍ និងដំណើរការទៅមុខសម្រាប់បម្រើឱ្យវិស័យទេសចរណ៍។
លោក បន្ដថា ដើម្បីសម្រេចបានចក្ខុវិស័យជំរុញទេសចរក្នុងស្រុកឱ្យកើនឡើងដល់១៩លាននាក់ក្នុងឆ្នាំ២០២៥ ក្រសួងទេសចរណ៍ បានសហការជាមួយក្រសួង-ស្ថាប័នពាក់ព័ន្ធ និងផ្នែកឯកជនក្នុងវិស័យទេសចរណ៍ កំពុងសិក្សារៀបចំដាក់ចេញនូវគោលនយោបាយកម្មវិធី «កម្ពុជាមាតុភូមិខ្ញុំ» ក្រោមពាក្យស្លោក «ទាំងអស់គ្នាអាចធ្វើដំណើរកម្សាន្តបាន» និងបង្កើតកម្មវិធីបណ្ណដំណើរកម្សាន្ត ដែលមានកញ្ចប់ទស្សនកិច្ចក្នុងស្រុកមានតម្លៃសមរម្យ ដើម្បីលើកទឹកចិត្តដល់សិស្ស-និស្សិត សាស្ត្រាចារ្យ មន្ត្រីរាជការ កម្មករ-កម្មការិនី និងកីឡាករ-កីឡាការិនី អាចធ្វើដំណើរកម្សាន្តឱ្យបានយ៉ាងហោចណាស់១ដងក្នុង១ឆ្នាំ ។
យោងតាមរបាយការណ៏របស់ក្រសួងទេសចរណ៍ បានឲ្យដឹងថា កំណើនភ្ញៀវទេសចរជាតិមានការកើនឡើងជាលំដាប់ពីមួយឆ្នាំទៅមួយឆ្នាំជាមធ្យម៦%។ជាក់ស្តែងនៅឆ្នាំ២០១៥ ទេសចរក្នុងស្រុកមានជាង៩,៦លាននាក់ កើនដល់ជាង១០លាននាក់នៅឆ្នាំ២០១៦ និងជិត១១លាននាក់នៅឆ្នាំ២០១៧ ហើយជាចក្ខុវិស័យក្រសួងទេសចរណ៍រំពឹងថា នឹងមានទេសចរប្រមាណ១៩លាននាក់នៅឆ្នាំ២០២៥ ៕
