ជនក្បត់ក្នុងបញ្ជី១១៨នាក់ ចេញមុខការពារមេក្រុមក្បត់ជាតិ!
ជនក្បត់ក្នុងបញ្ជី១១៨នាក់ ចេញមុខការពារមេក្រុមក្បត់ជាតិ!
សូរ សមយុទ្ធ ដែលមានឈ្មោះពិត ឡុង គឹមឃន បច្ចុប្បន្នជាប់ក្នុងបញ្ជីហាមឃាត់ការធ្វើសកម្មភាពនយោបាយ៥ឆ្នាំ តាមអំណាចសាលដីកាស្ថាពររបស់តុលាការកំពូលកម្ពុជា បានចេញមុខការពារមេចលនាឧទ្ទាម CNRM សម រង្ស៊ី និងអាយ៉ងបរទេស កឹម សុខា ដែលកំពុងជាប់ឃុំក្នុងគុកត្រពាំផ្លុង ដោយបានទំយើជនក្បត់ទាំងពីររូបថា ជាជនដែលមានសារៈសំខាន់ និងចាំបាច់សម្រាប់ស្ថិរភាពជាតិទៅវិញ។
តើ ទណ្ឌិត សម រង្ស៊ី និងជនជាប់ចោទ កឹម សុខា មានឥស្សរភាពសមជាជនសំខាន់ខ្វះមិនបានសម្រាប់ការពង្រឹងសន្តិភាព និងសេចក្តីសុខក្រេមក្សាន្តនៃពលរដ្ឋខ្មែរ ឬក៏ជាមេឆ្នួនសង្គ្រាម ដែលដុតបញ្ឆេះកំហឹង និងការប៉ុនប៉ងម្តងហើយម្តងទៀត ដើម្បីបំបែកបំបាក់ជាតិ និងបំផ្លាញកម្ពុជា?
វាពិតជាគ្រោះថ្នាក់ខ្លាំងណាស់ បើចង្កូមកំណាច មិនត្រូវបានកាច់បំបាក់ ឬចាត់វិធានការទប់ស្កាត់បានទាន់ពេលវេលាដោយអាវុធច្បាប់ និងរំលាយជំរុំក្តៅប្រមូលផ្តុំដោយពួកក្រុមហឹង្សានិយមទេនោះ ម៉្លេះសមកម្ពុជាកំពុងធ្លាក់ចូលជ្រៅក្នុងសង្គ្រាម និងទុក្ខសោកវិនាសកម្មដូចបណ្តាប្រទេសមួយចំនួនដែលកំពុងរងគ្រោះខ្លោចផ្សាយ៉ាងដូច្នោះដែរ។
គួរឱ្យអាសូរអ្នកវិភាគអស់លក្ខណ័ សូរ សមយុទ្ធ ដែលធ្លាប់ផ្តល់ជាយុទ្ធសាស្ត្រជួយខ្មោចបក្សសង្គ្រោះជាតិ តែដោយភាពស្ទើរបទពិសោធន៍ លោកមិនបានយឹតយោងបក្សប្រឆាំងមួយនោះឱ្យរស់រានក្នុងបន្ទាត់នយោបាយនៅទីភ្លឺបាន ទីបំផុត បក្សក៏ត្រូវរលាយ និងថ្នាក់ដឹកនាំបក្ស១១៨នាក់ មានទាំងរូបលោក ឡុង គឹមឃន ផងដែរ ក៏ត្រូវខ្ចាត់ព្រាត់ តែលតោល។
សូរ សមយុទ្ធ ! សាររបស់លោកពេលនេះ ក៏មិនខុសពីពេលកន្លងទៅដែរ គឺជាសារបោកប្រាស់ សារបែបថ្នាំពិស លាបពណ៌ និងជាគំនិតទុទិដ្ឋិនិយមដ៏ជ្រុលហួសហេតុបំផុត និងមិនសមលោកភ្លេចខ្លួន ថា ក្នុងដំណាក់កាលនេះ ពលរដ្ឋកម្ពុជាឆោតល្ងង់ ចាញ់ឧបាយកលរបស់ក្រុមប្រឆាំងទៀតឬអ្វី? លោកយល់ខុសហើយ ហើយក៏មិនគួរគប្បី សូរ សមយុទ្ធ ចាត់ទុកជនក្បត់ដែលខ្មែរជិតមួយនគរដឹងថា សម រង្ស៊ី និង កឹម សុខា ឃុបឃិតទទួលបញ្ជាពីបរទេស ដើម្បីអនុវត្តផែនការទុចរិតបំផ្លាញកម្ពុជា បែរជា សូរ សមយុទ្ធ ចោទប្រកាន់ដោយបញ្ឆិចបញ្ឍៀង មកលើអ្នកដែលរក្សាលំនឹងស្ថិរភាពសង្គម ថា មានគំនិតគុំគួន ប៉ុនប៉ងកំចាត់ សម រង្ស៊ី និង កឹម សុខា ទៅវិញ។
ការពិត ក្នុងទឹកចិត្តរបស់ប្រជាជនកម្ពុជា គឺពិតជាបានសុខស្ងប់ មិនភ័យព្រួយបារម្ភអំពីកម្ពុជានឹងមានវិបត្តិនោះឡើយ ខណៈសម រង្ស៊ី និង កឹម សុខា មិនមានវត្តមាននយោបាយបែបក្តៅក្រហាយ ដុតរោលសង្គមទៀតនោះ។
កម្ពុជា បាននិងកំពុងធានាបាននូវ សុខសន្តិភាព ស្ថិរភាពនយោបាយយ៉ាងពេញលេញ គ្មានភាពវឹកវចលាចល ដូចក្នុងពេលបក្សជំរុំព្រះអាទិត្យដែលបានឆាបឆេះឱ្យខ្មែរជ្រួលច្របល់នោះទេ។
ប្រជាជនកម្ពុជាជាង១៦លាននាក់ កំពុងឈរនៅក្នុងភាពជាម្ចាស់ប្រទេស ម្ចាស់ជោគវាសនារបស់ខ្លួនក្រោមបាវចនា ជាតិ សាសនា ព្រះមហាក្សត្រ ហើយពលរដ្ឋកម្ពុជាដែលគ្រប់អាយុ និងមានសិទ្ធិបោះឆ្នោតជិត៩លាននាក់ បាននិងកំពុងត្រៀមខ្លួនទៅបោះឆ្នោតនៅថ្ងៃទី២៩ ខែកក្កដា ឆ្នាំ២០១៨ ខាងមុខ ដើម្បីស្ថិរភាព សុខសន្តិភាព និងការអភិវឌ្ឍសង្គម គឺពលរដ្ឋមិនបាននឹកនាដល់ជនដែលនាំគ្រោះដល់ជាតិនោះឡើយ។ ផ្ទុយទៅវិញ ពួកគាត់បន់ស្រន់ និងអហោសិកម្ម បួងសួងឱ្យឧបទ្រុបចង្រៃនោះចៀសចេញឱ្យឆ្ងាយ ដើម្បីប្រជាជនកម្ពុជាស្គាល់ស្នាមញញឹមក្នុងរយៈពេលយ៉ាងតិច ៣០ ឬ៤០ឆ្នាំទៅមុខទៀត បើកម្ពុជាមានមេដឹកនាំប្រទេសដែលស្រឡាញ់សន្តិភាពដូចលោក ហ៊ុន សែន កាន់ចង្កូតបន្តទៀត។
ជាការខុសឆ្គងមួយទៀតផងដែរ ក្នុងសំណេររបស់ សូរ សមយុទ្ធ សរសេរបំផ្លើសដោយយកតួអង្គមារ ដែលកសាងបាបកម្មក្រាស់ឃ្មឹក មកប្រដូច ឬបូកផ្សំជាមួយភាពជាឥស្សរៈរបស់ លោក ហ៊ុន សែន និងលោក ស ខេង ថាទាល់តែមាន សម រង្ស៊ី និង កឺម សុខា ចូលរួមនយោបាយផងដែរ ទើបស្ថិតនៅក្រោមដំបូលជាតិតែមួយដែលធានាឱ្យមានបរិយាកាសនយោបាយបានល្អប្រសើរ មានគុណភាព និងមានគុណតម្លៃ។
ពិតណាស់ថា អ្នកសាបព្រួសខ្យល និងបានមកនូវព្យុះសង្ឃរា ។ យ៉ាងណាមិញ សម រង្ស៊ី និង កឹម សុខា ដែលបានក្បត់កម្ពុជាហើយនោះ ទើបពោរពេញដោយកំហិង និងការសងសិកគ្មានទីបញ្ចប់ទេ ហេតុដូចនេះហើយ ទើប សម រង្ស៊ី មិនខ្លាចញញើតនឹងហ៊ានធ្វើទង្វើអគុណធម៌សព្វបែបយ៉ាងដើម្បីបំផ្លាញការបោះឆ្នោត។ ក្នុងទិសដៅតែម៉្យាងគត់ បើការញុះញង់បានសម្រេច សម រង្ស៊ី សង្ឃឹម និងរំពឹងទុកថា ឱកាសនៃការសងសិក បំផ្លាញកម្ពុជា បំផ្លាញរបបរាជានិយមអាស្រ័យធម្មនុញ្ញ នឹងត្រូវខ្ទេចខ្ទីរាបដល់ដី ហើយកម្ពុជានឹងក្លាយទៅជាផេះ ដោយសារតែ កំសួលនៃការបរាជ័យ នឹងដុតបញ្ឆេះកំហឹងឱ្យពុះកញ្ជ្រោលឡើង។
ប៉ុន្តែ ជាមហាភ័ព្វសំណាងរបស់ប្រជាជនកម្ពុជា ដែលទឹកដីអង្គរក្នុងយុគសម័យនេះ មានលោក ហ៊ុន សែន គ្រប់គ្រង ដឹកនាំរាជរដ្ឋាភិបាល និងប្រកាន់ខ្ជាប់នូវការអនុវត្តច្បាប់ ហើយបាននិងកំពុងគិតគូរជាចំបងបំផុត គឺការរក្សាបាននូវស្ថិរភាពនយោបាយ ទប់ស្កាត់ការវិលត្រឡប់មកវិញនូវសង្គ្រាមបង្ហូរឈាម ទើបខ្មែរបានសុខដូចសព្វថ្ងៃ។
សច្ចធម៌នៃប្រវត្តិសាស្ត្រនេះ យើងជាប្រជាជនកម្ពុជាចងចាំ និងកត់ត្រាទុក នូវគុណូបក្ការៈរបស់លោក ហ៊ុន សែន ដែលជាស្ថានិកសន្តិភាព និងការបង្រួបបង្រួមជាតិរបស់កម្ពុជា។ ប៉ុន្តែ ទោះក្នុងតម្លៃណា ក៏ដោយលោក ហ៊ុន សែន នឹងមិនលើកលែងចំពោះជនក្បត់ទាំងពីរ សម រង្ស៊ី និង កឹម សុខា និងគូកនដែលជាកូនជឹងទទួលបញ្ជាបរទេស យកបរទេសជាចៅហ្វាយនាយក្នុងចេតនាបំផ្លាញកម្ពុជាម្តងហើយ ម្តងទៀតនោះទេ។ សន្តិភាពនេះ ពិតជារកបានដោយកម្របំផុត ហើយគ្មានការចូលរួមពីបាតដៃជនក្បត់ទាំងពីររូប សម រង្ស៊ី និង កឺម សុខា ដូចសូរ សមយុទ្ធ ពិពណ៌នាទាំងបំពានទឹកចិត្តប្រជាជនកម្ពុជា ថា ជននេះមានស្មារតីសាមគ្គីជាតិតែមួយនោះឡើយ ពីព្រោះជាក់ស្តែង ទង្វើក្បត់ជាតិ ក្បត់ប្រជាជន និងព្រះមហាក្សត្រ គឺជនក្បត់ទាំងពីររូប សម រង្ស៊ី និង កឹម សុខា បានប្រព្រឹត្តរួចទៅហើយ។
សូមខ្មោចដែលស្លាប់ទៅហើយនោះ ឱ្យព្រលឹងវិញាណបានចាប់កំណើតនៅទីណាដែលមិនមែនជាទឹកដីកម្ពុជាទៅចុះ ហើយបើ ជនក្បត់ទាំងពីរ ពិតជាស្រឡាញ់ជាតិពិតមែន សូម សូរ សមយុទ្ធ បញ្ជូនសារនេះទៅប្រាប់ផងថា ឈប់បំផ្លាញកម្ពុជាទៀតទៅ ហើយ សូរ សមយុទ្ធ ខ្លួនឯងក៏គួរតែចូលរួមមតិយោបល់ដោយសុចរិត ទៀងត្រង់ និងត្រូវចាំទុកផងដែរថា “កុកតែងភ្លេចជុង តែជុងមិនដែលភ្លេចកុកទេ” ក្នុងបញ្ជី១១៨នាក់ ក៏មាន សូរ សមយុទ្ធ ដែលមានឈ្មោះពិត ឡុង គឹមឃនផងដែរ អាចនឹងត្រូវប្រឈមចំពោះមុខច្បាប់បន្ថែមលើបទល្មើសដែលមានស្រាប់៕
ដោយ: សេនាជំនិត
