អ្នកជំនាញថា ក្រោយការបោះឆ្នោត វិស័យអចលនទ្រព្យនៅកម្ពុជានឹងរីកចម្រើនកាន់តែខ្លាំង
អ្នកជំនាញថា ក្រោយការបោះឆ្នោត វិស័យអចលនទ្រព្យនៅកម្ពុជានឹងរីកចម្រើនកាន់តែខ្លាំង
វិស័យអចលនទ្រព្យកម្ពុជានឹងមានភាពរីកចម្រើនខ្លាំង នៅក្រោយការបោះឆ្នោត ជ្រើសតាំងតំណាងរាស្រ្តអាណត្តិទី៦ នាថ្ងៃទី២៩ កក្កដាខាងមុខ។ នេះបើតាមការអះអាងក្រុមអ្នកជំនាញអចលនវត្ថុកម្ពុជា។
លោក Ken Lo អគ្គនាយកក្រុមហ៊ុនអចលនវត្ថុ Century21 Dream Property ថ្លែងក្នុងពិធីអបអរក្រុមហ៊ុន Century21 ចំនួន៨ ដែលទទួលបានពានរង្វាន់ចំនួន៨ ពីសហរដ្ឋអាមេរិកនៅព្រឹកថ្ងៃទី១៤ កក្កដា នេះថា វិស័យអចលនទ្រព្យនៅកម្ពុជា នឹងមានភាពរីកចម្រើនកាន់តែខ្លាំងថែមទៀត ក្រោមការបោះឆ្នោតនាពេលខាងមុខនេះ។
លោកថា៖ «ក្រោយការបោះឆ្នោត ស្ថានភាពវិស័យនេះនឹងរីកចម្រើនបន្តទៀត ប្រសិនជាស្ថានភាពនយោបាយ មិនមានការប្រែប្រួលជាដុំកំភួនណាមួយនោះ»។ នេះគឺជាឱកាសសម្រាប់ភ្នាក់ងារអចលនវត្ថុកម្ពុជានានា ត្រូវកសាងសមត្ថភាពខិតខំប្រឹងប្រែងឲ្យបានខ្លាំងក្លាថែមទៀត ដើម្បីពង្រីកសក្ដានុពល និងជំរុញទំនុកចិត្តក្នុងវិស័យនេះ។
លោក គុយ វ៉ាត
លោក គុយ វ៉ាត ដែលជាអ្នកជំនាញអចលនទ្រព្យមួយរូបនៃក្រុមហ៊ុនខាងលើ បានគូសបញ្ជាក់ថា អ្វីដែលត្រូវធ្វើបន្តគឺពង្រីកសេវាកម្មរបស់យើង និងផ្តល់ទំនុកចិត្តដល់អ្នកវិនិយោគជាតិ និងអន្តរជាតិ ទើបយើងអាចជំរុញឲ្យវិស័យនេះមានការរីកចម្រើនប្រកបដោយនិរន្តរភាព។
ក្រុមអ្នកជំនាញខាងលើ បង្ហាញទស្សនៈស្រដៀងគ្នាជុំវិញវិស័យអចលនវត្ថុក្នុងរយៈពេលមួយទសវត្សរ៍ចុងក្រោយនេះ ទឹកប្រាក់រាប់ពាន់លានដុល្លារបានចាក់ចូលក្នុងវិស័យនេះនៅកម្ពុជា ដែលធ្វើឲ្យទីក្រុងភ្នំពេញឈានទៅកាន់កម្រិតថ្មីមួយទៀត ក្នុងនាមជាទីក្រុងពាណិជ្ជកម្មនិងហិរញ្ញវត្ថុអន្តរជាតិ៕
