ព្រោះស្រលាញ់ខ្លាំង ទើប វណ្ណៈបូរមី សុខចិត្តទ្រាំ ឲ្យគេវាយឡើងឈឺពេញខ្លួន
ព្រោះស្រលាញ់ខ្លាំង ទើប វណ្ណៈបូរមី សុខចិត្តទ្រាំ ឲ្យគេវាយឡើងឈឺពេញខ្លួនតារាម៉ូដែលរាងតូចច្រឡឹង វណ្ណៈ បូរមី សុខចិត្តឲ្យគេវាយទាត់ធាក់ ទ្រាំឈឺពេញខ្លួន ដោយមិនប្រើតួជំនួសឡើយ ដើម្បីឲ្យខ្សែរឿងបែបវាយប្រហារដែលខ្លួនស្រលាញ់ និងពេញចិត្តសម្ដែង ទទួលបានការគាំទ្រច្រើន។
តាមរយៈរឿងភាគ “បេសកកម្មមួយ” បូរមី បានបញ្ចេញស្ទីលសម្ដែងថ្មីមួយបែបទៀត ខុសពីរឿងមុនដាច់ស្រលះ ដោយសម្ដែងជាតួអង្គស៊ើបអង្កេតឈ្មោះ ម៉ូកា ហើយនាងខំទៅហាត់រៀនក្បាច់ល្បុកតោអស់រយៈពេល៣ខែ ដើម្បីឲ្យចេះវ៉ៃបានល្អ។ ដោយសារនាងត្រូវប៉ះឈុតឆាកវាយប្រហារច្រើន ពេលខ្លះត្រូវហក់លោត ប្រើកម្លាំង ម្ល៉ោះហើយត្រូវជាំពេញខ្លួន ហើមមុខក៏មានដែរ។ តែដោយចិត្តស្រលាញ់ខ្លាំង ការលំបាកប៉ុណ្ណឹង និស្សិតរូបនេះប្រឹងប្រែងធ្វើវាឲ្យបានល្អ ហើយនាងក៏សង្ឃឹមយ៉ាងមុតមាំថា រឿងបែបវាយប្រហារដំបូងរបស់ខ្លួន នឹងទទួលបានការគាំទ្រច្រើនពីប្រិយមិត្ត។
ចំពោះលោក ហូត រ៉ាវី អ្នកដឹកនាំរឿងខាងលើ ប្រាប់ពីមូលហេតុជ្រើសយក បូរមី សម្តែងតួអង្គនេះ ព្រោះសម្លឹងឃើញពីសមត្ថភាពសម្ដែង និងភាពរឹងមាំ ម៉ឺងម៉ាត់របស់នាង។ ម្យ៉ាងទៀត តារាម៉ូដែលនេះធ្លាប់ប្រលយថាមានក្តីប្រាថ្នាចង់ក្លាយជាទាហាន ដូច្នេះបើ បូរមី សម្ដែងជាតួអង្គបែបវាយប្រហារ គឺពិតជាស័ក្ដិសម។
រឿងនេះក្លាយពីប្រលោមលោមដ៏ពេញនិយមក្នុងស្រទាប់យុវវ័យ មកផលិតជាខ្សែភាពយន្ត ដោយបានថតបញ្ចប់ហើយ និងគ្រោងដាក់បញ្ចាំងនៅដើមខែកក្កដា ខាងមុខផងដែរ៕
