តើបេប៊ី និយាយអ្វីខ្លះពីរឿងពាក់ឈុតព្រះនាងឥន្ទ្រទេវី?
តើបេប៊ី និយាយអ្វីខ្លះពីរឿងពាក់ឈុតព្រះនាងឥន្ទ្រទេវី?នៅក្នុងកម្មវិធីជប់លៀងខួប ២ ឆ្នាំរបស់ គ្រួសារកម្ពុជា កាលពីយប់មិញនេះមានពិតជាមិនធម្មតាទេ ដោយសារសិល្បករសិល្បការីនីដែលចូលរួមសុទ្ធសឹងតែតុបតែងខ្លួនស្រស់ស្អាតទៅតាមប្រពៃណីខ្មែរ សម្រាប់តារាស្រីរូបស្រស់ បេប៊ី បានជ្រើសរើសយកឈុតសម្លៀកបំពាក់ព្រះនាងឥន្ទ្រទេវីយកមកប្រកួតប្រជែង ជាលទ្ធផលគឺនាងទទួលបានពានរង្វាន់ដូចអ្វីដេលខ្លួនប៉ងប្រាថ្នា ប៉ុន្តែអ្វីដែលគួរឱ្យចាប់អារម្មណ៍ជាងនេះទៅទៀតនោះ គឺពេលដែលស្លៀកឈុតនេះភ្លាម បេប៊ី មានអារម្មណ៍មិនស្រួលក្នុងខ្លួនឡើយ ប្រៀបដូចជាមានអ្វីចូលសណ្ឋិតក្នុងខ្លួន សូម្បីតែនាងផ្ទាល់ក៏ព្រឺសប្បុរដែរនៅពេលដែលនិយាយដល់រឿងនេះ។
នេះជាលើកដំបូងហើយដែល បេប៊ី ស្លៀកនូវឈុតសម្លៀកបំពាក់ព្រះនាងឥន្ទ្រទេវី។ នាងថែមទាំងនិយាយទៀតថា «ខ្ញុំតែងស្រមៃថានឹងស្លៀកឈុតសម្លៀក បំពាក់នេះតាំងតែពីក្មេងមកម្ល៉េះ ប៉ុន្តែមិនដែលមានឱកាសសោះ ទើបតែថ្ងៃនេះខ្ញុំមានឱកាសបានស្លៀកឈុតក្នុងក្តីស្រមៃរបស់ខ្លួន ខ្ញុំមានអារម្មណ៍រំភើប និងសប្បាយចិត្ត ប្លែកស្រស់ស្អាត ទោះបីជាធ្ងន់បន្តិច តែខ្ញុំចូលចិត្ត។ មានរឿងមួយដែលខ្ញុំចង់និយាយគឺនៅពេលដែលស្លៀកឈុតព្រះនាងឥន្ទ្រទេវីភ្លាម ក្នុងខ្លួនខ្ញុំមានអារម្មណ៍ត្រជាក់ៗ មិនស្រឡះខ្លួនសោះ និងព្រឺសម្បុរយ៉ាងម៉េចមិនដឹង ក្រោយមកទៀតខ្ញុំបានបួងសួងសុំក្តីសុខ និងទទួលបានជោគជ័យ ទើបមានអារម្មណ៍ស្ងប់បន្តិច។ ខ្ញុំភ័យដែរហ្នឹង ពេលដំបូងខ្លាចមានរឿងអ្វីកើតឡើងដូចដែងបងៗបានប្រាប់នៅពេលដែលស្លៀកឈុតបុរាណបែបនេះ»។
បេប៊ី ពិតជាស្រស់ស្អាតមែនក្នុងឈុតសម្លៀកបំពាក់ប្រពៃណីបុរាណខ្មែរ ទោះជាឈុតនេះធ្ងន់ និងពិបាកដើរ តែនាងសប្បាយចិត្ត ថែមទាំងទទួលបានការកោតសរសើរយ៉ាងច្រើន ជាពិសេសនាងថែមទាំងជាប់ពានរង្វាន់ឆ្នើមទៀតផងក្នុងការប្រកួតប្រជែងកាលពីយប់មិញ៕
