មេបក្សជួង ឆ្លើយតបទៅនឹងការអំពាវនាវរបស់លោក សម រង្ស៊ី កុំអោយពលរដ្ឋទៅបោះឆ្នោត
មេបក្សជួង ឆ្លើយតបទៅនឹងការអំពាវនាវរបស់លោក សម រង្ស៊ី កុំអោយពលរដ្ឋទៅបោះឆ្នោត
នៅវេលាល្ងាចថ្ងៃទី ១៦ ខែ ឧសភា អម្បាញ់មិញនេះនេះ លោក ខឹម វាសនា ប្រធានគណបក្សសម្ព័ន្ធដើម្បីប្រជាធិបតេយ្យ ឬហៅថាបក្សជួង បានសរសេរនៅលើគណនីហ្វេសប៊ុករបស់ខ្លួនឆ្លើយតបទៅនឹងការអំពាវនាវកុំអោយពលរដ្ឋទៅចូលរួមការបោះឆ្នោតជាតិនៅថ្ងៃទី ២៩ ខែកក្កដា ខាងមុខនេះ។ ខាងក្រោមនេះជាសំណេរទាំងស្រុងរបស់លោក ខឹម វាសនា៖
រឿងទៅបោះឆ្នោតឬដេកនៅផ្ទះជាសិទ្ធិសំរេចរបស់ពលរដ្ឋម្ចាស់ប្រទេស ខ្ញុំគ្មានសិទ្ធិអ្វីទៅបង្ខំពួកគាត់ ហើយក៏គ្មានចិត្តអ្វីទៅជំរុញអោយពួកគាត់សំរេចបែបនេះឬបែបនេះដែរ។ តួនាទីរបស់ខ្ញុំគឺបំភ្លឺដោយការវែកញែកហេតុផលសំរាប់បានជាមូលដ្ឋានអោយពួកគាត់ពិចារណាតែប៉ុណ្ណោះ។ ដើម្បីច្បាស់ពីចិត្តលោកសម រង្សីុចំពោះសុខទុក្ខរបស់ពលរដ្ឋខ្មែរ ខ្ញុំសូមលើកយកការអំពាវរបស់លោកសម រង្ស៊ីដែលសូមកុំអោយពលរដ្ឋទៅបោះឆ្នោតមកវែកញែករកមើលចិត្តរបស់គាត់ចំពោះពលរដ្ឋខ្មែរបន្តិច។ បើលោកសម រង្ស៊ីមានចិត្តគិតដល់សុខទុក្ខមនុស្សខ្មែរមែន គាត់មិនអាចអំពាវនាវអោយពលរដ្ឋអ្នកគាំទ្រគាត់ កុំអោយទៅបោះឆ្នោតនោះទេ ព្រោះថាផ្លូវនេះជាហេតុធ្វើអោយចំណេញដល់CPPច្បាស់ណាស់ ព្រោះកៅអីតំណាងរាស្ត្រដែលត្រូវបានគណនាលើតែចំនួនអ្នកទៅបោះឆ្នោត នឹងត្រូវបានទៅCPPយ៉ាងលើសលុប ព្រោះថាអ្នកគាំទ្រCPPនឹងចេញទៅបោះឆ្នោត ហើយCPPនឹងពន្យល់មហាជននិងអន្តរជាតិថា ទីមួយនៅកម្ពុជាគ្មានច្បាប់ចែងពីចំនួនឬភាគរយនៃអ្នកទៅបោះឆ្នោតដើម្បីអោយកាបោះឆ្នោតយកជាបានការនោះទេ។ ទីពីរ អតីតគណៈបក្សសង្គ្រោះជាតិ មិនអាចយកលេសថាអ្នកមិនទៅបោះឆ្នោតទាំងអស់សុទ្ធតែជាអ្នកគាំទ្រខ្លួនទេ ព្រោះថារៀងរាល់តែអាណត្តិដែលCNRPក៏ចូលរួមបោះឆ្នោតដែរនោះ ក៏មានអ្នកមិនទៅបោះឆ្នោតប្រហែលជាងពីរលាននាក់តែដដែលហ្នឹង អីចឹងវាជាហេតុផលមួយបញ្ជាក់យ៉ាងច្បាស់ថា អ្នកមិនទៅបោះឆ្នោតក្នុងអាណត្តិ២០១៨ខាងមុខនេះ មិនមែនសុទ្ធតែជាអ្នកគាំទ្របក្សសង្គ្រោះជាតិទាំងអស់នោះដែរ។ ម្យ៉ាងទៀតយើងត្រូវយល់អោយច្បាស់ថាទោះជាយ៉ាងណាក៏CPPមិនអាចអោយលទ្ធផលបោះឆ្នោតឆាចោលបានជាដាច់ខាត គេនឹងរកគ្រប់មធ្យោបាយដើម្បីបញ្ជាក់ថាការបោះឆ្នោតនេះជាការបោះឆ្នោតដែលអាចទទួលយកបាន។ យើងស្គាល់CPPហើយ គេធ្លាប់ឆ្លងកាត់រឿងបែបៗនេះរាប់ភ្លេច គេដឹងសន្ទុះចិត្តបរទេសចំពោះខ្មែរច្បាស់ណាស់ថាយូរឬឆាប់គង់តែជៀសទទួលស្គាល់ថារដ្ឋាភិបាលក្រោយការបោះឆ្នោះជារដ្ឋាភិបាលស្របច្បាប់មិនរួចទេ យើងអាចស្ទង់មើលសន្ទុះអន្តរជាតិក្រោយការរំលាយបក្សសង្គ្រោះជាតិ ដែលលោកសមរង្សីុ និងមន្ត្រីផ្សេងទៀតរបស់គាត់បានទៅបរទេសកៀងគររកការគាំទ្រនោះទៅមើល យើងនឹងអាចយល់របៀបដែលបរទេសប្រកាន់យកចំពោះខ្មែរហើយ។ ក្នុងករណីនេះ បើលោកសម រង្សីុជាមនុស្សមានសណ្តានជាអ្នកគិតដល់សុខទុក្ខប្រជាពលរដ្ឋជាចំបងជាងមុខមាត់ខ្លួនមែននោះ ផ្លូវគឺមានតែមួយគត់៖ គឺលោកសម រង្ស៊ីនឹងអំពាវប្រាប់ទៅអ្នកគាំទ្រខ្លួនថា យើងគ្មានជំរើសទេ ក្នុងករណីយើងមានបក្សសង្គ្រោះជាតិជាជំរើសនោះវាល្អហើយ តែជាក់ស្តែងយើងគ្មានទេ អីចឹងសូមបងប្អូនទៅបោះឆ្នោតអោយគណៈបក្សណាមួយតួយ៉ាងគណបក្សប្រជាធិបតេយ្យមូលដ្ឋានទៅ ទោះយ៉ាងណាក៏គ្រាន់ជាងទៅបោះឆ្នោតអោយCPPដែរណាបងប្អូន។ តែនេះ អោយតែមិនបានមកអញ គឺអញគ្មានជួយគិតរកផ្លូវបន្ទាប់អោយពលរដ្ឋអ្នកគាំទ្រគាត់ឡើយ។ កុំសូម្បីតែគ្មានបក្សណាល្អជាងបក្សសង្គ្រោះជាតិរបស់គាត់ សូម្បីតែមានបក្សល្អជាងបក្សសង្គ្រោះជាតិរបស់គាត់ ក៏គាត់នៅតែលាបពណ៌ថាសុទ្ធតែបក្សអាយ៉ង បក្សរណប បក្សអាប បក្សបង្គ្រប់កិច្ចជាដើម ព្រោះថាអោយតែមិនបានមកអញហើយ អញគ្មានគិតអោយអ្នកណាចំរើនអីទេ។ នេះឬជាចិត្តអ្នកស្នេហាជាតិហ៊ានប្តូរជីវិតដើម្បីក្តីសុខរបស់ពលរដ្ឋនោះ? អោយតែមិនបានមកអញ ទោះពលរដ្ឋទៅរើសបានបក្សណាល្អជាងបក្សខ្លួនក៏មិនព្រមដែរ សុខចិត្តនាំពលរដ្ឋទៅផ្លូវងាប់អោយតែបានសង្គ្រោះមុខមាត់ខ្លួន មិនជួយគិតពលរដ្ឋដើម្បីជ្រើសរើសជំរើសល្អបន្ទាប់ក្នុងករណីទាល់ច្រកនោះទេ។ មើលប៉ុណ្ណឹងមិនយល់សណ្តានចិត្តលោកសមរង្ស៊ីចំពោះខ្លួនទៀតអ្នកគាំទ្របក្សសង្គ្រោះជាតិ។ ពិតជាគួរអោយសង្វេគស្រណោះដែលពួកគាត់ក្លាយទៅជាឈ្នាន់សំរាប់សំរេចមហិច្ឆិតារបស់មេដឹកនាំដែលធ្វើនយោបាយដើម្បីប្រយោជន៍ខ្លួនតួយ៉ាងលោកសម រង្ស៊ីនិងមន្ត្រីទាំងឡាយរបស់គាត់៕
