ក្រសួងសេដ្ឋកិច្ចដំណើរគម្រោងផ្តល់ឥណទានការប្រាក់ទាប សម្រាប់សហគ្រាសធុនតូច និងមធ្យម
ក្រសួងសេដ្ឋកិច្ចដំណើរគម្រោងផ្តល់ឥណទានការប្រាក់ទាប សម្រាប់សហគ្រាសធុនតូច និងមធ្យម
ក្រសួងសេដ្ឋកិច្ចដំណើរគម្រោងផ្តល់ឥណទានការប្រាក់ទាប សម្រាប់សហគ្រាសធុនតូច និងមធ្យម
គម្រោងសហហិរញ្ញប្បទានទ្រទ្រង់សហគ្រាស ធុនតូច និងមធ្យម បានដាក់ឲ្យដំណើរការ កាលពីថ្ងៃទី៣ ខែមេសាម្សិលមិញ ក្នុងគោលបំណងផ្តល់ឥណទាន មានការប្រាក់ទាប ដើម្បីជំរុញការអភិវឌ្ឍសហគ្រាសធុនតូច និងមធ្យមនៅកម្ពុជា។ នេះបើតាមក្រសួងសេដ្ឋកិច្ច។ គម្រោងហិរញ្ញប្បទាននេះ មានទំហំទឹកប្រាក់១០០លានដុល្លារ។
គម្រោងសហហិរញ្ញប្បទាន នឹងផ្តល់ឥណទាន សម្រាប់សហគ្រាសធុនតូច និងមធ្យម ក្នុងវិស័យអាទិភាព ដូចជាផ្នែកកម្មន្តសាល និងសិប្បកម្ម សម្រាប់ជំនួសឲ្យការនាំចូលបម្រើសេចក្តីត្រូវការក្នុងស្រុក ឬបម្រើជាធាតុចូលនៅក្នុងការផលិតរបស់ក្រុមហ៊ុនធំៗ ជាដើម។
ក្រសួងសេដ្ឋកិច្ចក្នុងសេចក្តីប្រកាសកាលពីថ្ងៃទី៣ ខែមេសា បញ្ជាក់ទៀតថា មូលនិធិក្រោមគម្រោងនេះ មានទំហំទឹកប្រាក់ ១០០លានដុល្លារ ដែលជាការផ្តល់សហហិរញ្ញប្បទានបដិភាគស្មើគ្នារវាងធនាគារសហគ្រាសធុនតូច និងមធ្យមកម្ពុជា និងគ្រឹះស្ថានធនាគារ និងមីក្រូហិរញ្ញវត្ថុ(គ្រឹះស្ថានហិរញ្ញវត្ថុចូលរួម)។
សហគ្រាសធុនតូច និងមធ្យម ដែលមានតម្រូវការឥណទាន អាចដាក់ពាក្យស្នើសុំឥណទាន ក្រោមគម្រោងសហហិរញ្ញប្បទាននេះ នៅតាមគ្រឹះស្ថានហិរញ្ញវត្ថុចូលរួម ណាមួយ ដោយគោរពតាមលក្ខខណ្ឌរបស់គម្រោងសហហិរញ្ញប្បទាន និងលក្ខខណ្ឌផ្តល់ឥណទានរបស់គ្រឹះស្ថានហិរញ្ញវត្ថុចូលរួមនីមួយៗ។ បើតាមក្រសួងសេដ្ឋកិច្ចដដែល សហគ្រាសធុនតូច និងមធ្យមអាចទទួលបានឥណទានសម្រាប់ប្រើជាទុនបង្វិល ច្រើនបំផុត២០ម៉ឺនដុល្លារអាមេរិក និងឥណទានសម្រាប់ជាចំណាយមូលធនច្រើនបំផុត៣០ម៉ឺនដុល្លារ។
https://www.facebook.com/ministry.economy.finance/posts/2837653306330789
ការដាក់ឲ្យដំណើរការគម្រោង សហហិរញ្ញប្បទានទ្រទ្រង់សហគ្រាសធុនតូច និងមធ្យម ត្រូវបានធ្វើឡើងខណៈកម្ពុជាកំពុងតែប្រឈមនឹងជំងឺរាតត្បាតកូវីដ១៩ ដូចបណ្តាប្រទេសផ្សេងទៀតនៅលើពិភពលោក ដែលបណ្តាលឲ្យប៉ះពាល់ដល់សេដ្ឋកិច្ច។
លោក ង៉ែត ជូ ទីប្រឹក្សាសេដ្ឋកិច្ចនៃក្រុមហ៊ុន EMC និងជាអ្នកវិភាគសេដ្ឋកិច្ច បានអះអាងប្រាប់វិទ្យុបារាំងអន្តរជាតិថា នេះគឺជាវិធីមួយ ដើម្បីជំរុញការទម្លាក់ទុនទៅដល់សហគ្រាសធុនតូច និងមធ្យម តាមរយៈការផ្តល់ ការប្រាក់ទាប ហើយជាធម្មតានៅពេលអត្រាការប្រាក់ទាបនោះបង្កើនការទាក់ទាញ។ បន្តែក្នុងស្ថានភាពបែបនេះ ភាគច្រើនអ្នកខ្ចីគឺមិនមែនយកទៅពង្រីកអាជីវកម្មទេ តែខ្ចីយកទៅទប់ទល់ ដើម្បីឲ្យអាជីវកម្មមានដំណើរការ៕ RFI
