លោកនាយករដ្ឋមន្រ្តី ហ៊ុន សែន នឹងបើកសម្ពោធដំណើរការសាងសង់ផ្លូវល្បឿនលឿនពីទីក្រុងភ្នំពេញទៅក្រុងព្រះសីហនុ

លោកនាយករដ្ឋមន្រ្តី ហ៊ុន សែន នឹងបើកសម្ពោធដំណើរការសាងសង់ផ្លូវល្បឿនលឿនពីទីក្រុងភ្នំពេញទៅក្រុងព្រះសីហនុ

នៅព្រឹកថ្ងៃទី២១ ខែមីនា ឆ្នាំ២០១៩នេះ លោកនាយករដ្ឋមន្រ្តី ហ៊ុន សែន បានអញ្ជើញជួបពិភាក្សាការងារជាមួយ លោក Weng Gang អនុប្រធានក្រុមហ៊ុន សាជីវកម្មស្ពាន-ថ្នល់ ចិន (CRBC) នៅវិមានសន្តិភាព។ លោក Weng Gang បានថ្លែងអំណរគុណយ៉ាងជ្រាលជ្រៅជូនចំពោះ លោកនាយករដ្ឋមន្រ្តី ហ៊ុន សែន ដែលបានគាំទ្រ និងផ្តល់ឱកាសឱ្យក្រុមហ៊ុនលោកបានរួមចំណែកក្នុងការកសាងស្ពាន-ថ្នល់ និង ហេដ្ឋារចនាសម្ព័ន្ធផ្សេងៗទៀតនៅកម្ពុជា ដែលរហូតមកដល់ពេលនេះគឺបានសម្រេចកសាងថ្នល់ប្រវែងប្រមាណ១ពាន់គីឡូម៉ែត្ររួចហើយ។

នៅថ្ងៃស្អែកទី២២ ខែកុម្ភៈ ឆ្នាំ២០១៩នេះ ក្រុមហ៊ុននឹងបើកសម្ពោធដំណើរការសាងសង់ ផ្លូវល្បឿនលឿន ពីទីក្រុងភ្នំពេញទៅក្រុងព្រះសីហនុ ដែលជាគម្រោងដ៏ធំបំផុតមួយក្នុងចំណោមគម្រោងជាង ១៥៥ ដែលក្រុមហ៊ុនបានវិនិយោគនៅក្រៅប្រទេស។ គម្រោងផ្លូវល្បឿនលឿន (Express Way) ដែលជាគម្រោងផ្លូវល្បឿនលឿនធំជាងគេទី១នៅកម្ពុជា គឺនឹងត្រូវចំណាយទឹកប្រាក់ ២ពាន់លានដុល្លារ។ លោកនាយករដ្ឋមន្រ្តី ហ៊ុន សែន នឹងអញ្ជើញផ្តល់កិត្តិយចូលរួមសម្ពោធបើកដំណើរការសាងសង់នៅថ្ងៃស្អែកនេះផងដែរ។

លោក Weng បានគោរពជម្រាបជូនលោកនាយករដ្ឋមន្រ្តីអំពីជំនឿទុកចិត្តយ៉ាងខ្លាំងទៅលើកំណើនសេដ្ឋកិច្ចកម្ពុជាក្នុងអត្រាជាង ៧% ក្នុងមួយឆ្នាំ ជាមួយនឹងស្ថិរភាពនយោបាយ ដែលបានធ្វើឱ្យប្រជាពលរដ្ឋមានការងារធ្វើ និងមានជីវភាពរស់នៅកាន់តែធូរធារល្អប្រសើរ នៅក្រោមការដឹកនាំរបស់លោកនាយករដ្ឋមន្រ្តី ហ៊ុន សែន ។ លោក Weng បានបញ្ជាក់ផងដែរថា ទំនាក់ទំនងជាមិត្តភាពដូចជាបងប្អូនរវាងកម្ពុជាចិន គឺបានផ្តល់នូវទំនុកចិត្ត និងភាពកក់ក្តៅដល់គម្រោងវិនិយោគធំជាច្រើនទៀតនៅកម្ពុជា។

ក្នុងថ្ងៃសម្ពោធការដ្ឋានសាងសង់ថ្ងៃស្អែកនេះ ក្រុមហ៊ុនលោកនឹងប្រគល់សម្ភារៈថែទាំ និងជួសជុលថ្នល់មួយដល់រាជរដ្ឋាភិបាលកម្ពុជាផងដែរ។ លោកមានជំនឿថា ការវិនិយោគនៅកម្ពុជា គឺនឹងបានចូលរួមចំណែកជំរុញកំណើនការអភិវឌ្ឍសេដ្ឋកិច្ចកម្ពុជា ដែលនឹងធ្វើឱ្យជីវភាពរស់នៅរបស់ប្រជាពលរដ្ឋខ្មែរកាន់តែល្អប្រសើរឡើងថែមទៀង។

លោកនាយករដ្ឋមន្រ្តី ហ៊ុន សែន បានមានប្រសាសន៍កោតសរសើរ និងគាំទ្រនូវគម្រោងវិនិយោគទាំងឡាយរបស់ក្រុម CRBCដែលភាគច្រើនគឺបានសាងសង់ស្ពានថ្នល់ធំៗជាច្រើននៅក្នុងប្រទេសកម្ពុជា។ គម្រោងសាងសង់ផ្លូវល្បឿនលឿនពីទីក្រុងភ្នំពេញទៅក្រុងព្រះសីហនុ គឺនឹងកាន់តែផ្តល់ផលប្រយោជន៍ជាច្រើនថែមទៀតដល់កម្ពុជា។

លោកនាយករដ្ឋមន្រ្តី ហ៊ុន សែន បានបញ្ជាក់ផងដែរថា គម្រោងវិនិយោគធំៗបែបនេះនៅកម្ពុជានឹងមិនអាចសម្រេចបានឡើយ ប្រសិនបើគ្មានការគាំទ្រ និងជួយជ្រោមជ្រែងពី លោកប្រធានាធិបតីចិន ស៊ី ជីនពីង និងលោកនាយករដ្ឋមន្រ្តី លី ឃឺជាង។ លោក បានរំលឹកអំពីចំណងមិត្តភាព និងសហប្រតិបត្តិការរល្អដែលប្រទេសយើងទាំងពីរបានក្លាយជាបងប្អូន និងជាដៃគូយុទ្ឋសាស្រ្តគ្រប់ជ្រុងជ្រោយដែលមានលក្ខណៈរឹងមាំដូចដែកថែប។ កម្ពុជាសូមអរគុណរដ្ឋាភិបាលចិន និងប្រជាជនចិនដែលបានចូលរួមចំណែកអភិវឌ្ឍន៍ប្រទេសកម្ពុជាឱ្យកាន់តែរីកចម្រើនទៅមុខ៕