ប្រាយុទ្ធ ចាន់អូចា បញ្ជាឲ្យស្ថាប័នកំពូល២ សិក្សាគម្រោង «ព្រែកជីកក្រា»
ប្រាយុទ្ធ ចាន់អូចា បញ្ជាឲ្យស្ថាប័នកំពូល២ សិក្សាគម្រោង «ព្រែកជីកក្រា»
លោក ប្រាយុទ្ធ ចាន់អូចា នាយករដ្ឋមន្រ្ដីថៃ បានបញ្ជាឲ្យក្រុមប្រឹក្សាភិបាលអភិវឌ្ឍន៍សេដ្ឋកិច្ច និងសង្គម និងការិយាល័យនៃក្រុមប្រឹក្សាសន្ដិសុខជាតិ ពិនិត្យលើគម្រោងព្រែកជីកក្រា ដែលភ្ជាប់ពីឈូងសមុទ្រថៃ ទៅសមុទ្រ Andaman។ នេះបើតាមការចុះផ្សាយរបស់ Bangkok Post នៅថ្ងៃទី៣០ ខែតុលា ឆ្នាំ២០១៨នេះ។
គម្រោងព្រែកជីកក្រា ១២គីឡូម៉ែត្រ ត្រូវបានគាំទ្រ និងជំរុញដោយសមាគមន៍ព្រែកជីកថៃ អ្នកវិនិយោគក្នុងតំបន់ និងមន្រ្តីចូលនិវត្តន៍ជាច្រើន។
លោក Narong Khumthong អ្នកសម្របសម្រួលសមាគមន៍ព្រែកជីកថៃបានបញ្ជាក់ថា ក្រុមការងារបានធ្វើការស្ទង់មតិអ្នកកំពុងរស់នៅក្នុងតំបន់នោះ ដែលទទួលផលប៉ះពាល់ដោយគម្រោង ហើយនឹងបញ្ជូនព័ត៌មានត្រឡប់ទៅនាយករដ្ឋមន្រ្តី កងទ័ពភូមិភាគ៤ ក្រសួងដឹកជញ្ជូន និងក្រុមប្រឹក្សាភិបាលអភិវឌ្ឍន៍សេដ្ឋកិច្ច និងសង្គម។
លោក Somkid Jatusripitak ឧបនាយករដ្ឋមន្រ្តីថៃ ទទួលបន្ទុកកិច្ចការសេដ្ឋកិច្ច ជឿជាក់ថា បច្ចុប្បន្នមិនមែនជាពេលវេលាល្អនៅឡើយទេ សម្រាប់គម្រោងព្រែកជីកនេះ។ លោកថា “យើងត្រូវគិតអ្វីថ្មីសម្រាប់ជំនាន់បន្ទាប់ទៀត”។
សូមបញ្ជាក់ថា ប្រទេសចិន អាល្លឺម៉ង់ និងជប៉ុន ស្ថិតនៅក្នុងចំណោមប្រទេសដែលបានត្រៀមខ្លួន សម្រាប់គម្រោងវិនិយោគនេះ ដោយការសាងសង់អាចត្រូវចំណាយពេលរហូតដល់ ៥ ឬ ៦ឆ្នាំ៕
ប្រភព៖ ខ្លីៗ
