កាំកុងត្រូលខេត្តប៉ៃលិន បង្កើនការត្រួតពិនិត្យទំនិញដែលដាក់តាំងលក់នៅលើទីផ្សារ ដើម្បីលើកកម្ពស់សុខមាលភាព អ្នកប្រើប្រាស់
កាំកុងត្រូលខេត្តប៉ៃលិន បង្កើនការត្រួតពិនិត្យទំនិញដែលដាក់តាំងលក់នៅលើទីផ្សារ ដើម្បីលើកកម្ពស់សុខមាលភាព អ្នកប្រើប្រាស់
ក្នុងឱកាសបុណ្យកាន់បិណ្ឌ បានចូលមកដល់ នៅថ្ងៃទី២ ខែតុលា ឆ្នាំ២០១៨ លោក គិត សុវណ្ណា អនុប្រធានសាខាកាំកុងត្រូលខេត្តប៉ៃលិន ដឹកនាំមន្រ្តីជំនាញ សហការជាមួយសមត្ថកិច្ចចម្រុះ បានបង្កើនការទប់ស្កាត់ទំនិញហួសសុពលភាព ខូចគុណភាព និងធ្វើតេស្តបឋម (TEST KIT) លើចំណីអារហារបរិភោគ នៅផ្សារប៉ាហ៊ី ស្ថិតក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ខេត្តប៉ៃលិន ដែលធ្វើអោយប៉ះពាល់សុខភាព និងបង្កជាក្តីបារម្ភយ៉ាងខ្លាំង ព្រោះចំណីអាហារ ខូចគុណភាព និងមានផ្ទុកសារធាតុគីមី បានក្លាយជាឃាតករបំផ្លាញសុខភាព និងសេដ្ឋកិច្ចគ្រួសាររបស់ប្រជាពលរដ្ឋ ។
លោក គិត សុវណ្ណា មានប្រសាសន៍ថា ក្នុងប្រតិបត្តិការចុះពិនិត្យទំនិញ និងតេស្តស្គីតនៅពេលនេះ គឺធ្វើឡើងតាមការណែនាំពីប្រធានប្រតិភូទទួលបន្ទុកអគ្គនាយកដ្ឋានកាំកុងត្រូល និងលោកប្រធានសាខាកាំកុងត្រូលខេត្តប៉ៃលិន អោយខិតខំយកចិត្តទុកដាក់ទប់ស្កាត់លើម្ហូបអាហារមិនមានគុណភាព ដែលមានសារធាតុគីមី ធ្វើអោយប៉ះពាល់ដល់បងប្អូនប្រជាពលរដ្ឋយកទៅបរិភោគជាប្រចាំ និងធ្វើម្ហូបអាហារប្រគេនព្រះសង្ឃនៅក្នុងឱកាសបុណ្យភ្ជំបិណ្ឌនៅពេលនេះ។ លោកបញ្ជាក់ថាម្ហូបអាហារដែលបានតេស្តស្គីតនៅពេលនេះរួមមាន មឹក បង្គា ណែម ប្រហិត និងសរសៃគុយទាវ រកឃើញថាពុំមានសារធាតុគីមីឡើយ គឺអាចប្រើប្រាស់និងបរិភោគបានតាមតំរូវការជាក់ស្តែង បើសិនមានសារធាតុអ្វីកើតឡើងមន្រ្តីកាំកុងត្រូលនឹងធ្វើការណែនាំអោយយល់ពីការផលប៉ះពាល់នៃសារធាតុទាំងនោះ ក្នុងការទប់ស្កាត់ម្ហូបអាហារធ្វើអោយប៉ះពាល់ដល់សុខភាពរបស់បងប្អូនប្រជាពលរដ្ឋគឺមិនអោយប្រើប្រាស់ឡើយ។ លោកបន្តថា ទំនិញដែលមន្រ្តីរបស់លោកតែងធ្វើសកម្មភាពពិនិត្យជាប្រចាំ គឺពិនិត្យទៅកាលបរិច្ឆេទ លើសំបកវិចខ្ចប់ រួមទាំងពិនិត្យរកសារជាតិគីមីនៅលើបន្លែត្រីសាច់ ជាដើម ហើយប្រតិបត្តិការធ្វើតេស្តបឋមរកសារធាតុគីមីលើចំណីអាហារ គឺដើម្បីចូលរួមចំណែកទប់ស្កាត់ចរាចរណ៍ទំនិញដែលខូចគុណភាព និងមានសារធាតុគីមី និងរឹតបន្តឹងនៃការនាំចូលផលិតផលម្ហូបអាហារពីប្រទេសថៃ ចូលមកប្រទេសកម្ពុជា នៅមាត់ច្រកទ្វារព្រំដែនអន្តរជាតិព្រំដែនខេត្តប៉ៃលិន ពិសេសបានធ្វើការពន្យល់ណែនាំដល់ ពលរដ្ឋ និងអាជីវករទាំងអស់ ឲ្យបានយល់ដឹងពីប្រភេទទំនិញ ដែលគ្មានគុណភាពផងដែរ។
លោកក៏បានសំនូមពរដល់អាជីវករទាំងអស់ និងអ្នកប្រើប្រាស់ ក្នុងឱកាសបុណ្យកាន់បិណ្ឌ និងបុណ្យភ្ជុំបិណ្ឌឈានចូលមកដល់ ត្រូវរួមគ្នាលុបបំបាត់ការដាក់តាំងលក់ និងប្រើប្រាស់ទំនិញ ខូចគុណភាព ឬទំនិញប្រើប្រាស់សារធាតុគីមី ព្រោះវាបានបង្ករផលប៉ះពាល់ខ្លាំងសម្រាប់សុខភាព និងរស់នៅជីវភាពប្រចាំថ្ងៃ ៕
