សម្តេចតេជោ ហ៊ុន សែន ក្រើនរំលឹកប្រជាពលរដ្ឋឱ្យបន្តការពារខ្លួនពីជំងឺកូវីដ-១៩ និងរស់នៅក្នុងគន្លងប្រក្រតីភាពថ្មី

សម្តេចតេជោ ហ៊ុន សែន ក្រើនរំលឹកប្រជាពលរដ្ឋឱ្យបន្តការពារខ្លួនពីជំងឺកូវីដ-១៩ និងរស់នៅក្នុងគន្លងប្រក្រតីភាពថ្មី

សម្តេចតេជោ ហ៊ុន សែន បានថ្លែងថា យើងទទួលស្គាល់ថា ជំងឺកូវីដ-១៩មិនទាន់បានបញ្ចប់នៅឡើយទេ ដូច្នេះប្រជាពលរដ្ឋទាំងអស់ត្រូវបន្តថែរក្សាការពារខ្លួនពីការឆ្លងជំងឺកូវីដ-១៩ ស្របពេលដែលប្រទេសយើងបើកដំណើរការសេដ្ឋកិច្ច និងសង្គមឡើងវិញ។ សម្តេចបានថ្លែងដូចនេះនៅព្រឹកថ្ងៃទី១៨ ខែធ្នូ ឆ្នាំ២០២១ ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវ វិមានកីឡដ្ឋាន ដែលជាសំណង់ធំជាងគេនៃពហុកីឡដ្ឋានជាតិមរតកតេជោ ដែលកើតឡើងពីចំណងមិត្តភាព កម្ពុជា-ចិន ជាជំនួយឥតសំណងពីមិត្តចិន ដែលស្ថិតក្នុងសង្កាត់ព្រែកតាសេក ខណ្ឌជ្រោយចង្វា រាជធានីភ្នំពេញ។

សម្តេចតេជោ ហ៊ុន សែន បានគូសបញ្ជាក់ថា យើងត្រូវខិតខំប្រយុទ្ធប្រឆាំងនឹងជំងឺកូវីដ-១៩បន្តទៀត ដោយធ្វើការការពារខ្លួនតាមរយៈមនុស្សម្នាក់ៗ គ្រួសារនីមួយៗ និងសហគមន៍នីមួយៗដើម្បីកុំឱ្យប្រទេសជាតិយើងវិលទៅរកស្ថានភាពបិទខ្ទប់ជាថ្មីម្តងទៀត។

សម្តេចតេជោ ហ៊ុន សែន ក៏បានគូសបញ្ជាក់ថា យើងក៏ត្រូវខិតខំបន្តដំណើរការចាក់វ៉ាក់សាំងបន្តទៀត ទាំងអ្នកចាស់ដែលបានចាក់ដូសមូលដ្ឋានរួចហើយ និងអ្នកថ្មីដែលមិនទាន់បានចាក់វ៉ាក់សាំង៕