ទីប្រឹក្សាក្រសួងការបរទេសអាមេរិក នឹងធ្វើទស្សនកិច្ចទៅឥណ្ឌូណេស៊ី និងកម្ពុជា ចាប់ពីថ្ងៃទី ៨-១៣ ធ្នូ
លោក Derek Chollet
ទីប្រឹក្សាក្រសួងការបរទេសអាមេរិក លោក Derek Chollet នឹងធ្វើដំណើរទស្សនកិច្ចទៅកាន់ប្រទេសកម្ពុជានិងឥណ្ឌូណេស៊ី នៅថ្ងៃទី ៨-១៣ ខែធ្នូ ដើម្បីចូលរួមជាមួយភាគីពាក់ព័ន្ធជុំវិញ បញ្ហាសំខាន់ៗក្នុងតំបន់ បូករួមទាំងវិបត្តិនៅក្នុងប្រទេសមីយ៉ាន់ម៉ាផងដែរ។
ដំណើរទស្សនកិច្ចរបស់លោកទីប្រឹក្សា Chollet នឹងពង្រឹងមជ្ឈភាពអាស៊ាន និងតួនាទីរបស់អាស៊ានក្នុងការរក្សាស្ថិរភាពតំបន់, កំណើនសេដ្ឋកិច្ច និងការរក្សាសណ្តាប់ធ្នាប់ដែនសមុទ្រដោយផ្អែកលើច្បាប់ ជាពិសេសនៅសមុទ្រចិនខាងត្បូង។
នៅទីក្រុងភ្នំពេញ លោកទីប្រឹក្សានឹងពិភាក្សាអំពីតួនាទីជាប្រធានអាស៊ាននាពេលខាងមុខរបស់កម្ពុជា ហើយលោកក៏នឹងពង្រឹងការគាំទ្ររបស់សហរដ្ឋអាមេរិកចំពោះក្រុមសង្គមស៊ីវិល ក៏ដូចជាចំពោះប្រជាជនកម្ពុជា។
នៅទីក្រុងហ្សាកាតា លោក Chollet នឹងផ្តោតលើ ការពង្រឹងឱ្យកាន់តែស៊ីជម្រៅនូវភាពជាដៃគូយុទ្ធសាស្ត្ររវាងសហរដ្ឋអាមេរិកនិងឥណ្ឌូណេស៊ី ក៏ដូចជាការបង្កើនការចូលរួមនៅក្នុងប្រទេសឥណ្ឌូណេស៊ី ម៉ាឡេស៊ី និងថៃ។
ពេញមួយដំណើរទស្សនកិច្ចរបស់លោក លោកនឹងគូសបញ្ជាក់អំពីសារៈសំខាន់នៃការពង្រឹងកិច្ចសហប្រតិបត្តិការ រវាងសហរដ្ឋអាមេរិកជាមួយនិងអាស៊ាន ដើម្បីជំរុញឱ្យរបបយោធាមីយ៉ាន់ម៉ាបញ្ឈប់អំពើហិង្សា, ដោះលែងអ្នកដែលត្រូវបានឃុំឃាំងដោយអយុត្តិធម៌, អនុញ្ញាតឱ្យមានដំណើរការមនុស្សធម៌ និងការស្តារមាគ៌ារបស់មីយ៉ាន់ម៉ាឆ្ពោះទៅកាន់លទ្ធិប្រជាធិបតេយ្យ ប្រកបដោយបរិយាប័ន្នឡើងវិញ។
