មន្រ្តីជំនាញសុខាភិបាលខេត្តសៀមរាប សម្រេចដុតកម្ទេចចោលឱសថបំប៉នសុខភាពគ្មានលេខបញ្ជិកាជាង១តោន
មន្រ្តីជំនាញសុខាភិបាលខេត្តសៀមរាប សម្រេចដុតកម្ទេចចោលឱសថបំប៉នសុខភាពគ្មានលេខបញ្ជិកាជាង១តោន
លោកស្រី លី វណ្ណៈ ប្រធានការិយាល័យនិយ័តកម្មសុខាភិបាល នៃមន្ទីរសុខាភិបាល ខេត្តសៀមរាបបានឱ្យដឹងថា បន្ទាប់ពីមានការអនុញ្ញាតពីរដ្ឋបាលខេត្តសៀមរាប ឱ្យមន្ទីរ សុខាភិបាលធ្វើការកម្ទេចចោលឱសថបំប៉នសុខភាព ដែលមន្ទីរសុខាភិបាលសហការ ជាមួយនគរបាលប្រឆាំបទល្មើសសេដ្ឋកិច្ចរឹបអូសបានកន្លងមក។
នៅថ្ងៃទី០៧ ខែកញ្ញា ឆ្នាំ២០២១នេះ លោកវេជ្ជបណ្ឌិត អ៊ាប ប៊ុនលឿន អនុប្រធាន មន្ទីរសុខាភិបាល បានដឹកនាំមន្រ្តីជំនាញពាក់ព័ន្ធធ្វើការដុតកម្ទេចចោលឱសថបំប៉នសុខភាព គ្មានលេខបញ្ជិកាចំនួន១,៣០១គីឡូក្រាម មាន៧០មុខស្មើ នឹង១,២០២,៣៦៦គ្រាប់ នៅ ចំណុចទីលានចាក់សំរាម ស្ថិតនៅភូមិអន្លង់ពីរ ឃុំត្រពាំងធំ ស្រុកប្រាសាទបាគង ខេត្តសៀមរាប។
លោកស្រី លី វណ្ណៈ បានបន្តថា ឱសថបំប៉នសុខភាពគ្មានចុះបញ្ជិកា ហើយត្រូវដុត កម្ទេចចោលនៅពេលនេះ ជាផលិតផលរបស់សហរដ្ឋអាមេរិក និងចាប់រឹបអូសកាលពីថ្ងៃទី ២៦ ខែមីនា ឆ្នាំ២០១៦ ដោយក្រុមការងារមន្ទីរសុខាភិបាល និងនគរបាលសេដ្ឋកិច្ច ខេត្តសៀមរាប។
លោកស្រី បានអំពាវនាវឱ្យ អ្នកប្រកបអាជីវកម្មលើឱសថទាំងអស់ត្រូវអនុវត្តន៍ឱ្យបាន ត្រឹមត្រូវតាមច្បាប់ដែលកម្ពុជាមាន ជាពិសេសកុំឃោសនាភូតកុហកបោកប្រាស់ ប្រជា ពលរដ្ឋឱ្យប្រើប្រាស់ ឱសថ ឬអាហារបំប៉នណា គ្មានការត្រួតពិនិត្យត្រឹមត្រូវ ដើម្បីចៀសវាងការខាតបង់ថវិកា ប៉ះពាល់ដល់សុខភាព ឬឈានដល់ការបាត់បង់ជីវិតរបស់ប្រជាពលរដ្ឋ។
លោកស្រី លី វណ្ណៈ បានបញ្ជាក់ថា បច្ចុប្បន្ននេះ មន្រ្តីជំនាញសុខាភិបាលខេត្ត សៀមរាបសហការជាមួយមន្រ្តីជំនាញពាក់ព័ន្ធតែងតែបានចុះត្រួតពិនិត្យមើលឱសថឬអាហារ បំប៉នណា គ្មានលេខបញ្ជិកាត្រឹមត្រូវ និងឱសថហួសកាលកំណត់ប្រើប្រាស់ និងខូចគុណ ភាព នៅតាមឱសថស្ថាននានានៅក្នុងខេត្តសៀមរាប ដើម្បីដកហូតយកទៅដុតកម្ទេកចោល៕ ឃុត សៅ – AKP
