ក្រសួងសុខាភិបាលអនុញ្ញាតឲ្យមន្ទីរពេទ្យឯកជនផ្ដល់សេវាព្យាបាលអ្នកជំងឺកូវីដកម្រិតស្រាលនៅតាមផ្ទះ
ក្រសួងសុខាភិបាលអនុញ្ញាតឲ្យមន្ទីរពេទ្យឯកជនផ្ដល់សេវាព្យាបាលអ្នកជំងឺកូវីដកម្រិតស្រាលនៅតាមផ្ទះ
កាលពីថ្ងៃចន្ទ ក្រសួងសុខាភិបាលកម្ពុជា បានផ្ដល់សិទ្ធិដល់មន្ទីរពេទ្យឯកជនដែលមានច្បាប់អនុញ្ញាតត្រឹមត្រូវ ក្នុងការផ្ដល់សេវាថែទាំ ព្យាបាលអ្នកជំងឺកូវីដ-១៩ កម្រិតស្រាលនៅតាមផ្ទះ។ ការអនុញ្ញាតរបស់ក្រសួងសុខាភិបាលដូច្នេះធ្វើឡើងដើម្បីផ្ដល់ឱកាសចូលរួមពីវិស័យឯកជន ស្របពេលដែលកម្ពុជាកំពុងពង្រឹងវិធានការសុខាភិបាលដើម្បីទប់ទល់នឹងការឆ្លងចូលសហគមន៍នៃមេរោគបំប្លែងខ្លួនថ្មី Delta។
ដើម្បីធ្វើឲ្យវិសាលភាពនៃការទប់ស្កាត់ជំងឺកូវីដ-១៩កាន់តែមានភាពទូលាយ ក្រសួងសុខាភិបាលបានផ្ដល់ឱកាសដល់វិស័យសុខាភិបាលឯកជនរួមចំណែកព្យាបាលអ្នកជំងឺកូវីដ-១៩ កម្រិតស្រាលនៅតាមផ្ទះ។ ដោយឡែក មិនទាន់មានការបញ្ជាក់ច្បាស់ពីក្រសួងនៅឡើយទេអំពីកាលបរិច្ឆេទនៃការចាប់អនុវត្តន៍វិធានការនេះ ប៉ុន្តែក្រសួងបានបញ្ចេញនូវល័ក្ខខ័ណ្ឌចាំបាច់មួយចំនួនដែលម្ចាស់សេវាសុខាភិបាលឯកជនត្រូវគោរពតាម។
លក្ខខ័ណ្ឌទាំងនោះមានជាអាទិ៍ តម្រូវឲ្យមូលដ្ឋានសុខាភិបាលឯកជនមានច្បាប់អនុញ្ញាតពីក្រសួងសុខាភិបាល បុគ្គលិកពេទ្យត្រូវឆ្លងកាត់ការបណ្ដុះបណ្ដាលច្បាស់លាស់ ត្រូវធានាឲ្យមានប្រព័ន្ធបញ្ជូនអ្នកជំងឺពីផ្ទះទៅមន្ទីរពេទ្យរដ្ឋ ឬឯកជនក្នុងករណីជំងឺវិវត្តន៍ធ្ងន់ធ្ងរ និងត្រូវទទួលបានការអនុញ្ញាតពីអាជ្ញាធរមូលដ្ឋានក្នុងការព្យាបាលជាដើម។
បន្ថែមពីនេះ ក្រសួងសុខាភិបាលក៏បានប្រាប់ទៅម្ចាស់សេវាសុខាភិបាលឯកជនឲ្យដាក់លិខិតស្នើរសុំការអនុញ្ញាតដោយមានភ្ជាប់ជាមួយឯកសារសំខាន់ៗដូចជាកិច្ចសន្យា លិខិតព្រមព្រៀងផ្ដល់សេវាព្យាបាលអ្នកជំងឺកូវីដ-១៩។ល។
លោក ហុក គីមចេង អគ្គនាយកបច្ចេកទេសនៃក្រសួងសុខាភិបាលបានអះអាងប្រាប់វិទ្យុបារាំងអន្តរជាតិនារសៀលថ្ងៃច័ន្ទនេះថា ការផ្ដល់ឱកាសឲ្យវិស័យសុខាភិបាលឯកជននេះអាចព្យាបាលអ្នកជំងឺកូវីដ-១៩តាមផ្ទះបានគឺមិនមែនមានន័យថារដ្ឋខ្វះលទ្ធភាពនោះទេ ប៉ុន្តែនេះជាការការផ្ដល់ឱកាសឲ្យវិស័យឯកជនបានចូលរួមចំណែកក្នុងការទប់ស្កាត់ជំងឺកូវីដ-១៩ទៅវិញទេ។
គួរបញ្ជាក់ថា រហូតមកទល់ពេលនេះ អ្នកជំងឺកូវីដកម្រិតស្រាលដែលបានទទួលសេវាព្យាបាលព្យាបាលនៅតាមផ្ទះ បានកើនឡើងដល់ប្រមាណជាង៣ពាន់នាក់ទៅហើយ។ ក្នុងនោះ មានអ្នកជំងឺលើសពី៨០% មានការស្ថានភាពសុខភាពល្អប្រសើរឡើងវិញក្រោយការព្យាបាល។ នេះបើតាមការបញ្ជាក់ឲ្យដឹងពីក្រសួងសុខាភិបាល។
គួរឲ្យដឹងដែរថា សេចក្ដីជូនដំណឹងលើការអនុញ្ញាតឲ្យវិស័យសុខាភិបាលឯកជនផ្ដល់សេវាព្យាបាលនៅតាមផ្ទះនេះធ្វើឡើងក្រោយពីការដាក់ចេញយន្តការព្យាបាលអ្នកជំងឺកូវីដ-១៩កម្រិតស្រាលនៅតាមគេហដ្ឋានក្នុងក្របខណ្ឌរាជធានីភ្នំពេញកាលពីខែមេសាកន្លងទៅដើម្បីផ្ដល់អទិភាពដល់អ្នកជំងឺកម្រិតធ្ងន់ឲ្យទទួលបានការព្យាបាលកាន់តែពេញលេញ៕ RFI
