សមត្ថកិច្ចឆែករកឃើញភ័ស្តុតាង ក្នុងធុងសំរាមតាមបន្ទប់បញ្ចាំងកុនគេងកើយជាគូៗ

ដោយ៖ ប្រាជ្ញ សុវណ្ណរ៉ា | ថ្ងៃព្រហស្បតិ៍ ទី៣ ខែឧសភា ឆ្នាំ២០១៨ ព័ត៌មានទូទៅ 63

ភ្នំពេញ ៖ ជុំវិញការឆ្មក់បង្ក្រាបរបស់កម្លាំងចម្រុះខណ្ឌចំការមន លើទីតាំងបញ្ចាំងកុនគ្មានច្បាប់១កន្លែង ត្រួតពិនិត្យទីតាំងមានលក្ខណៈជាបន្ទប់គ្រែពូក ដែលអាចឲ្យយុវវ័យប្រព្រឹត្តរឿងក្តៅសាច់បាន សំណុំរឿងនេះ មន្រ្តីជំនាញកំពុងតែប្រមូលភ័ស្តុតាង និងឯកសារពាក់ព័ន្ធនានា បន្តនីតិវិធីស៊ើបអង្កេតតាមផ្លូវតុលាការ ។

កម្លាំងសមត្ថកិច្ចចម្រុះខណ្ឌចំការមន ក្រោមការសម្របសម្រួលពីលោកស្រី កែវ សុគន្ធា ព្រះរាជអាជ្ញារងអមសាលាដំបូងរាជធានីភ្នំពេញ នៅម៉ោង២ និង៣០នាទីរសៀលថ្ងៃទី១២ ខែកុម្ភៈ ឆែកឆេរទីតាំងផ្ទះល្វែងមួយកន្លែងក្បែរផ្សារសុវណ្ណា យីហោ Home Cinema បន្ទាប់ពីសង្ស័យថា កំពុងធ្វើអាជីវកម្មបើកបញ្ចាំងកុនគ្មានច្បាប់អនុញ្ញាត ដោយបានឃាត់ខ្លួនយុវវ័យប្រុសស្រីចំនួន១៩នាក់ ដែលបានមកពពាក់ពពូនគ្នាចូលមកមើលកុនក្តៅសាច់ និងបានដកហូតម៉ូតូចំនួន១៥គ្រឿង ។

ប្រតិបត្តិការនេះ បើតាមប្រភពពីសមត្ថកិច្ចបានប្រាប់ឲ្យដឹងថា ប្រជាពលរដ្ឋនៅក្បែរទីតាំងរោងកុនខុសច្បាប់ នៅចំណុចផ្ទះល្វែងលេខអេហ្វ៣២ ផ្លូវបេតុង ភូមិ៤ សង្កាត់ទំនប់ទឹក ខណ្ឌចំការមន បានរាយការណ៍ដល់អាជ្ញាធរមូលដ្ឋាន អំពីសកម្មភាពចម្លែកក្នុងចំណោមក្មេងសិស្សាសាលាមកពពាក់ពពូនគ្នាចូលមើលកុន ដោយអ្នកខ្លះមើលក្នុងបន្ទប់មួយមានគ្នាតែ២នាក់ ចំណែកអ្នកខ្លះចូលមើលក្នុងបន្ទប់មានទាំងពូកដេកសម្រាប់មើលកុនក្តៅសាច់ថែមទៀតផង ដោយសង្ស័យថា ពួកគេអាចប្រព្រឹត្តទង្វើមិនសមស្របណាមួយ ។

ជាលទ្ធផល នៃការឆែកឆេរទីតាំងខាងលើនេះ សមត្ថកិច្ចបានរកឃើញថា អាជីវកម្មបញ្ចាំងកុន គឺគ្មានច្បាប់អនុញ្ញាតឲ្យធ្វើអាជីវកម្មត្រឹមត្រូវឡើយ ជាពិសេស ទីតាំងនេះកំពុងធ្វើសកម្មភាពពង្វក់ស្មារតីសិស្សសាលាមួយចំនួនឲ្យភ្លើតភ្លើនភ្លេចការសិក្សា ដោយឈ្លក់វង្វេងស្នេហាអូនបងយ៉ាងត្រេកត្រអាល ក្នុងបន្ទប់ក្តៅសាច់នៅទីតាំងបញ្ចាំកុននេះ ។

ក្រោយពីឆែកឆេររួចមក កម្លាំងចម្រុះរបស់ខណ្ឌចំការមន បានឲ្យដឹងទៀតថា រោងកុនយីហោ Home Cinema ក៏ជាប់សង្ស័យបង្កប់សេវាកម្មផ្លូវភេទ និងជាកន្លែងប្រើប្រាស់សារធាតុញៀនខុសច្បាប់ផងដែរ ព្រោះកម្លាំងចម្រុះខណ្ឌចំការមន បានឆែកឆេរតាមបន្ទប់ ដែលមានផ្ទាំងពណ៌សធំៗសម្រាប់បញ្ចាំងកុន ព្រមទាំងឆែកតាមធុងសំរាម ដោយរកឃើញស្រោមអនាម័យប្រើរួច និងក្រដាសដិតដាមដោយឈាម ដែលសង្ស័យថា ជាឈាមរបស់ស្ត្រីចូលមើលកុនក្តៅសាច់ជាមួយគូស្នេហ៍របស់ខ្លួន ។

ទោះជាបែបណាយុវជនប្រុសស្រីចំនួន១៦នាក់គឺ៨គូ (ប្រុស៨ និងស្រី៨នាក់) ក្រុមក្មេងៗជាភ្ញៀវតម្រូវឱ្យអាណាព្យាបាលមកធានាតែប៉ុណ្ណោះ រួចអនុញ្ញាតឲ្យត្រឡប់ទៅផ្ទះវិញផងដែរ ។

បើតាមការសាកសួរ យុវជនយុវតីម្នាក់សុំមិនបញ្ចេញឈ្មោះ បានប្រាប់អ្នកយកព័ត៌មានថា គាត់មិនបានដឹងថា ទីតាំងខាងលើនេះមានច្បាប់ ឬក៏គ្មានច្បាប់អាជីវកម្មទេ ហើយពួកគាត់មកជួលបន្ទប់មើលកុនសំរាប់គ្នា២នាក់ តម្លៃថោកក្នុងមួយរឿងខ្មែរ ឬភាពយន្តបរទេសត្រឹមតែ៧ដុល្លារប៉ុណ្ណោះ ។ ចំពោះខ្សែភាពយន្តដែលពួកគេកុំម្មង់មើលនោះ គឺជារឿងធម្មតា មិនមែនជាប្រភេទរឿងអាសអាភាសនោះទេ អាចជារឿងមនោសញ្ចេតនាជ្រាលជ្រៅកន្ត្រាក់អារម្មណ៍ ។

មន្ត្រីនគរបាលបានឱ្យដឹងថា ទីតាំងនោះត្រូវគេសង្ស័យជាកន្លែងក្ដៅសាច់នៅគ្រាដែលសមត្ថកិច្ចចុះពិនិត្យបានរកឃើញមានក្មេងៗប្រុសស្រីជាច្រើននាក់ពពាក់ពពូនសង្ងំក្នុងបន្ទប់មានគ្រែពូកដេកមានលក្ខណៈអាចបម្រើដល់សេវាផ្លូវភេទបែបលួចលាក់ ក៏ថាបាន ។

បច្ចុប្បន្នកម្លាំងជំនាញកំពុងតែប្រមូលភ័ស្តុតាង និងឯកសារពាក់ព័ន្ធនានា កសាងសំណុំរឿងរបស់រោងភាពយន្តមួយនេះទៅតុលាការ ចំណែកទីតាំងអាជីវកម្មខុសច្បាប់នេះ សម្រេចឃ្លុំបេបិទទ្វារជាបណ្តោះអាសន្ន រងចាំបន្តនីតិវិធីស៊ើបអង្កេតតាមផ្លូវតុលាការ ៕

ពាក់ព័ន្ធរឿងខាងលើនេះដែរ មានដូចជា បិទកន្លែងគេងកើយមើលកុនជាគូៗ ដែលអាចឲ្យយុវវ័យប្រព្រឹត្តខុសប្រពៃណីខ្មែរ ។ និង ឆ្មក់ចូលបង្ក្រាបទីតាំងបញ្ចាំងកុនដែលអាចឲ្យយុវវ័យប្រព្រឹត្តខុសប្រពៃណីខ្មែរបាន