ខ្មែរប៉ុស្ដិ៍ Close

    អភិបាលខេត្តបន្ទាយមានជ័យ ដឹកនាំកម្លាំងជួយជួសជុលផ្ទះប្រជាពលរដ្ឋរងគ្រោះដោយខ្យល់កន្ត្រាក់ នៅស្រុកថ្មពួក

    ដោយ៖ ប្រាជ្ញ សុវណ្ណរ៉ា ​​ | ថ្ងៃព្រហស្បតិ៍ ទី១ ខែមេសា ឆ្នាំ២០២១ ផ្ទះហ្វេសប៊ុក 1167
    អភិបាលខេត្តបន្ទាយមានជ័យ ដឹកនាំកម្លាំងជួយជួសជុលផ្ទះប្រជាពលរដ្ឋរងគ្រោះដោយខ្យល់កន្ត្រាក់ នៅស្រុកថ្មពួកអភិបាលខេត្តបន្ទាយមានជ័យ ដឹកនាំកម្លាំងជួយជួសជុលផ្ទះប្រជាពលរដ្ឋរងគ្រោះដោយខ្យល់កន្ត្រាក់ នៅស្រុកថ្មពួក

    អភិបាលខេត្តបន្ទាយមានជ័យ ឯកឧត្តម អ៊ុំ រាត្រី កាលពីព្រឹកថ្ងៃទី០១ ខែមេសា ឆ្នាំ២០២១ បានដឹកនាំកម្លាំងចុះជួយជួសជុល និងរៀបចំផ្ទះសម្បែងឡើងវិញជូនដល់បងប្អូនប្រជាពលរដ្ឋ​ចំនួន០៧គ្រួសារ ស្មើនឹង០៧ខ្នងផ្ទះ ដែលទទួលរងគ្រោះដោយសារខ្យល់កន្ត្រាក់ នៅឃុំគោក​ឋិន ស្រុកថ្មពួក ដែលបានកើតឡើង កាលពីល្ងាចថ្ងៃទី៣១ ខែមីនា ឆ្នាំ២០២១ នេះ។

    ឯកឧត្តម អ៊ុំ រាត្រី បានសម្ដែងនូវការសោកស្ដាយចំពោះការខូចខាតផ្ទះសម្បែង​ទ្រព្យ​សម្បត្តិពីគ្រោះធម្មជាតិខ្យល់កន្រ្តាក់ដែលជាគ្រោះមហន្តរាយគ្មាននរណាម្នាក់ចង់​ជួបប្រទះ​នោះឡើយ។ ឯកឧត្តមបានលើកឡើងថា​ក្រោយពេលកើតហេតុគ្រោះធម្មជាតិនេះ​ភ្លាម​អាជ្ញាធរដែនដីរួមជាមួយនឹងក្រុមការងារកងកម្លាំងប្រដាប់អាវុធបានអន្តរាគមន៍ចុះភ្លាមៗជួយជាបន្ទាន់ដល់ប្រជាពលរដ្ឋនៅតំបន់រងគ្រោះនេះដោយបានជួយប្រមូលរៀបចំទីជំរកស្នាក់នៅនិងធ្វើការជួសជុលផ្ទះ​សម្បែងជូនប្រជាពលរដ្ឋ​ដើម្បីជួយសម្រួលដល់ការលំបាក​របស់ពួក​គាត់​នោះ។

    ជាមួយគ្នានេះ ដោយមើលឃើញផ្ទះ១គ្រួសាររងគ្រោះខូចខាតធ្ងន់ធ្ងរ​ឯកឧត្តមអភិបាល​ខេត្ដក៏ត្រូវចំណាយថ្លៃទិញសរសរឈើថ្លៃជាងស្ទួចផ្ទះរៀបចំឡើងវិញ និងឧបត្ថម្ភថវិកា​មួយ​ចំនួនទៀតដល់កងកម្លាំងប្រដាប់អាវុធដែលកំពុងជួយធ្វើផ្ទះជូនប្រជាពលរដ្ឋរងគ្រោះ​ផងដែរ។

    ឯកឧត្ដមអភិបាលខេត្តក៏បានក្រើនរម្លឹកដល់ប្រជាពលរដ្ឋយើងសូមឱ្យមានការប្រុងប្រយ័ត្នខ្ពស់ ខណៈដែលមានភ្លៀងផ្គររន្ទះខ្យល់កន្ត្រាក់ត្រូវប្រញាប់ប្រញាល់​រកទីកន្លែងជ្រកដែល​មានសុវត្ថិភាពដើម្បីចៀសវាងគ្រោះថ្នាក់ដល់អាយុជីវិតនោះ។ ឯកឧត្ដមបានជំរុញ​ដល់កម្លាំង​ប្រដាប់អាវុធរួមក្រុមការឱ្យបង្កើនការយកចិត្តទុកដាក់ជួយជួសជុលផ្ទះប្រជាពលរដ្ឋរងគ្រោះឱ្យបានលឿនដើម្បីឱ្យពួក​គាត់មានទី​ជំរករស់នៅបានសមរម្យឡើងវិញនោះ៕

    អត្ថបទទាក់ទង