លោក គួច ចំរើន បានអញ្ជើញសំណេះសំណាលជាមួយកម្មករនិយោជិតនៅក្រុមហ៊ុន មេត ថេក
លោក គួច ចំរើន បានអញ្ជើញសំណេះសំណាលជាមួយកម្មករនិយោជិតនៅក្រុមហ៊ុន មេត ថេក
លោក គួច ចំរើន អភិបាល នៃគណៈអភិបាលខេត្តកំពង់ចាម បានអញ្ជើញជាគណៈអធិបតី ក្នុងពិធីសំណេះសំណាលជាមួយកម្មករនិយោជិតនៅក្រុមហ៊ុន មេត ថេកក្នុងឱកាសខួបអនុស្សាវរីយ៍លើកទី១៣២ ទិវាពលកម្មអន្តរជាតិ (១ ឧសភា ១៨៨៦ – ១ ឧសភា ២០១៨) ដែលមានការចូលពី លោកអភិបាលរងខេត្ត ប្រធាន អនុប្រធានមន្ទីរ មន្ត្រីមន្ទីរការងារ និងបណ្តុះបណ្តាលវិជ្ជាជីវៈ លោក ប្រធាន អនុប្រធានមន្ទីរ ជុំវិញខេត្ត កម្លាំងប្រដាប់អាវុធទាំង៣ប្រភេទ មន្រ្តីរាជការសាលាខេត្ត និងបុគ្គលិកកម្មកររោងចក្រ សរុប ៣៥៦៧នាក់
ក្នុងឱកាសនេះ ដើម្បីឆ្លើយតបទៅនឹងស្មារតីថ្ងៃទី ១ ឧសភា ក្នុងនាមឯកឧត្តមអភិបាលខេត្ត បានអំពាវនាវដល់ កម្មករនិយោជិត អង្គការសហជីព អង្គការក្រៅរដ្ឋាភិបាល និងអង្គការអន្តរជាតិពាក់ព័ន្ធទាំងអស់ សូមយកចិត្តទុកដាក់លើ៤ចំនុចដូចខាងក្រោម ៖
១. រក្សាឲ្យបានការសាមគ្គីភាពផ្ទៃក្នុង រវាងនិយោជក និងកម្មករនិយោជិត និងត្រូវមើលឃើញឲ្យច្បាស់អំពីផងប្រយោជន៍ផ្ទាល់ខ្លួន ផលប្រយោជន៍ក្រុមហ៊ុន ព្រមទាំងផលប្រយោជន៍សង្គមទាំងមូលផងដែរ ។ ត្រូវបង្កើតមនសិកាស្រឡាញ់រាប់អានគ្នា ចេះជួយគ្នាទៅវិញទៅមក ចេះទទួលខុសត្រូវចំពោះភារកិច្ចរបស់ខ្លួន នឹងត្រូវខិតខំប្រឹងប្រែងដោយខ្លួនឯង ក្នុងការបង្កើតសកម្មភាពការងារបច្ចេកទេសវិជ្ជាជីវៈដើម្បីការរីកចំរើន និងមានអនាគតរឹងមាំភ្លឺស្វាង ។
២. ត្រូវខិតខំអនុវត្តច្បាស់ស្ដីពីការងារ និងច្បាស់ស្ដីពីរបបសន្តិសុខសង្គមសម្រាប់ជនទាំងឡាយដែលស្ថិតនៅក្រោមបទប្បញ្ញតិ្តនៃច្បាប់ស្ដីពីការងារ ព្រមទាំងបទប្បញ្ញត្តិពាក់ព័ន្ធនានាដើម្បីរក្សាស្ថិរភាពរបស់សហគ្រាសគ្រឹៈស្ថាន និងជីវភាពរបស់កម្មករនិយោជិត ។
៣. ខិតខំពង្រឹងភាពសុខដុម្យនារវាងនិយោជក និងកម្មករនិយោជិតដែលជាភាគីដៃគូដ៏សំខាន់ និងមិនអាចខ្វះបានសម្រាប់ស្ថិរភាពសង្គម និងរួមចំណែកអភិវឌ្ឍប្រទេសជាតិដូចប្រសាសន៍របស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានលើកឡើងថា ” កម្មករនិយោជិតត្រូវចាត់ទុកក្រុមហ៊ុនជាឆ្នាំងបាយរបស់ខ្លួន ហើយនិយោជកត្រូវចាត់ទុកកម្មករនិយោជិតជាដៃគូជីវិតមិនអាចខ្វះបានឡើយ ” ។
៤. សូមយកឱកាសទិវាពលកម្មអន្តរជាតិថ្ងៃទី ១ ខែឧសភានេះ ធ្វើការរៀបចំសកម្មភាពវប្បធម៌សិល្បៈ ការសម្រាក លំហែ កម្សាន្តរីករាយតាមលទ្ធភាពនឹងលក្ខណៈសម្បត្តិរៀងៗខ្លួនហើយត្រូវចៀសវាងធ្វើសកម្មភាពដែលនាំឲ្យរំខានដល់សណ្ដាប់ធ្នាប់សាធារណៈ និងបរិយាកាសសប្បាយរីករាយរបស់សង្គមជាតិ ។ បន្តទៀតក៏មានរៀបចំកម្មវិធីចាប់រង្វាន់លើកទឹកចិត្តដល់កម្មករនិយោជិតផងដែរ ។
